SOERA GESITERA FAZA 8.
FAZA 8.
I. Tebaliʼõ salaw̃a Morodochai, fangali Hamano. II. Tetehe ba Niha Jehoeda lalaoe mbalõ ba zamoenoe jaʼira enaʼõ, niʼandrõ Gesitera chõ razo. III. Faʼomoeso dõdõ Niha Jehoeda ba daʼõ.
1I. Ba me loeo daʼõ, ba ibeʼe boealania chõ Gesitera razo nomo Hamano, oedoe Niha Jehoeda. Ba molala chõ razo Morodochai, me no iʼombachaʼõ chõ razo Esitera, wa sahatõ chõnia Morodochai. 2Ba iheta laedoeroenia razo, laedoeroe si so tandro, nihalõnia mangawoeli chõ Hamano mege, ba ibeʼe chõ Morodochai. Ba Esitera, ba ibeʼe satoea baomo ba nomo Hamano Morodochai. (Moz. I. 41, 42).
3II. Ba ifoeli hoemede Gesitera chõ razo, itoehi zalo fõnania, megeʼege ia, ba iʼandrõ waʼahachõ dõdõ razo, enaʼõ itolo, fa bõi aloea nifachai Hamano andrõ, maʼoewoe Agagi, ba Niha Jehoeda, famoenoe andrõ. 4Ba iʼoroʼõ ziʼonia anaʼa andrõ chõ Gesitera. Ba maoso Gesitera, iʼagõ fõna razo, 5ba imane: Na atoelõ chõ razo, ba na no faloechado waʼahachõ dõdõnia, ba na si nangea iw̃aʼõ razo ba na omasi ia ndraʼodo, ba jamoefaʼoheʼõ zoera, jamoeʼoroiʼõ wangai mangawoeli zoera no, tõdõ Hamano andrõ, ono Hamedata, maʼoewoe Agagi, nifasoeraʼõnia, ba wamoenoe Niha Jehoeda ba danõ barõ mbawa razo, fefoe. 6Tebai sa oetaha oefaigi wamoenoe andrõ, si gõna niwama enaʼõ, ba tebai oetaha oefaigi wangohori iwama andrõ! 7Ba imane razo Ahasiwero chõ woʼomonia Esitera, ba chõ Morodochai Niha Jehoeda: Noa sa oebeʼe boealagoe chõ Gesitera nomo Hamano, ba jaʼia, ba no moetaw̃i ba gatoenga, me no ibabaja Niha Jehoeda. 8Ba jaʼami, ba hana na mifaʼoheʼõ zoera, hana na tõi razo mibeʼe ba Niha Jehoeda andrõ, he wisa zomasi ami, ba mifotandro tandro ba laedoeroe chõ razo. Me no tebai niwoeʼai li ba zoera, nibeʼe tõi razo ba si no moefotandro tandro andrõ ba laedoeroe chõ razo. 9Ba hoemede ira ba doeroetoeli razo, me loeo daʼõ, ba zi 23, ba mbaw̃a si tõloe — baw̃a Siwana — ba lafazõchi, zoera laʼoʼõ niw̃aʼõ Morodochai, ba Niha Jehoeda, ba ba nifataro razo ba ba goemandroe ba ba zalaw̃a, ba nõri andrõ fefoe, si 127, iʼotarai danõ Ndrawa Hindroe, noemalõ ba danõ Gaitiofia, dali wanoera ba zi sarasara õri ba he li zi samboesamboea soi, ba ba Niha Jehoeda, ba ba wanoerara ba ba lira. 10Ba ifabeʼeʼõ dõi razo Ahasiwero ba ifotandro tandro andrõ ba laedoeroe chõ razo; ba ifaʼoheʼõ ba zinenge si fakoedo, saõsõ, koedo ba kandra chõ razo koedora. 11Soera andrõ, ba no fanehe razo ba Niha Jehoeda ba mbanoea misa fefoe, hana na laʼowoeloi ira, ba wanimba samoenoe jaʼira, ba wangohori sato andrõ, ba danõ misa samoenoe jaʼira enaʼõ, ba he iraono, ba he ira alawe, ba wamoenoe, ba wamakiko, ba hana na laraboe zi so chõra, amaedola zi lõ sochʼṍ, 12ha maʼõmaʼõchõ, ba nõri barõ mbawa razo Ahasiwero, fefoe, ba zi me 13, ba mbaw̃a si 12, — baw̃a Adara. 13Ba taroma li ba zoera andrõ, ba nibeʼe oroisa, nidozigõ õri, enaʼõ dozi soi zamondrongo, ba enaʼõ na si no teʼanõ Niha Jehoeda, na loeo daʼõ, ba wolaoe balõra ba nemalira. 14Ba ha siʼaikõ tebeʼe goroisa andrõ, ba gõdo ba Zoesa, ba mofanõ zinenge andrõ, saõsõ, si fakoedo ba hoeloe koedo chõ razo, salio ahe, laʼoʼõ niw̃aʼõ razo, laʼaliogõ ira, lafandroeo koedo.
15III. Ba mõi tooe Morodochai, irõi razo, baroe zalaw̃a mbaroenia, biroe-law̃i ba safoesi, ba mosaemboe anaʼa ia ba mobaroe seboea, tarafali ba oengoe, ba owoeawoea dõdõ mbanoea Zoesa, ba omoeso dõdõra. 16Noa sa faloecha waʼohahaoe dõdõ ba faʼomoeso dõdõ ba faʼowoeawoea dõdõ ba soemange Niha Jehoeda. 17Ba dozi õri ba dozi banoea, heza iroegi niw̃aʼõ razo ba oroisania andrõ, ba so waʼomoeso dõdõ ba Niha Jehoeda ba faʼowoeawoea dõdõ ba femangamanga, ba owoeloa. Ba ato zi tobali Niha Jehoeda niha baero, me no ihawoei ira faʼataʼoera Niha Jehoeda.
Currently Selected:
SOERA GESITERA FAZA 8.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.