SOERA NGAʼÕTÕ I. FAZA 22.
FAZA 22.
I. Ihonogõi naha gosali Dawido, ba ihõna geoe, awõ gara. II. Ifarooe dõdo Zelomo, ba wolaoe osali dania, III. ba tõdõ zatoea, ba wanolo.
1I. Ba imane Dawido: Ba daʼe dania nahia Lowalangi, Jehowa, ba daʼe naha wameʼe soemange nitoenoe andrõ, nibeʼe Ndraono Gizeraëli. (Ngaʼõt. II. 3, 1). 2Ba iw̃aʼõ Dawido, laʼowoeloi zi fatewoe ba danõ Ndraono Gizeraëli ba ifataro zanoto kara, ba wanoto kara si õfa sagi andrõ sogoena ba wolaoe osali Jehowa. (Ngaʼõt. II. 2, 16). 3Ba ihõna ziʼõli Dawido, nibaliʼõ osõʼosõ lagõ mbawandroehõ ba famachai; ba tõla ihõna, irege lõ moetaha moetoelo, ba eoe balo, eresi, 4si tebai saʼae laʼerai; oja sibai sa laʼohe chõ Dawido balo eresi banoea Zidona ba banoea Diro. 5Imane sa dõdõnia Dawido: Iraono na nonogoe Selomo, sambõ faʼabeʼe na; ba osali andrõ, nilaoe chõ Jehowa, ba lõ tola lõ eboea sibai, enaʼõ fangeboea dõi ba faʼamoadoe ia ba daʼõ dania, wamaigi niha bõʼõ fefoe. Ba daʼoehõna chõnia zogoena. Ba ihõna sibai Dawido, gasagasa waʼamatenia. (F. 29, 1).
6II. Ba hoemede ia chõ nononia Selomo ba ibeʼe li chõnia, ba wolaoe osali chõ Jehowa, Lowalangi Ndraono Gizeraëli. 7Imane Dawido chõ Zelomo: He onogoe! No oew̃aʼõ tõdõgoe, jaʼo zolaoe osali, nahia dõi Lowalangigoe Jehowa. (F. 17, 1—14; 27, 2—7). 8Ba hoemede chõgoe Jehowa, imane: No oja adoewa do niha õbeʼe, ba no abõlõ wanoewõoe: lõ tola jaʼoegõ zolaoe nahia dõigoe, me no oja adoewa ba danõ do niha, õbeʼe, ba zanehe ndraʼodo. 9Ba toemboe chõoe nono matoea dania, ba niha sahonohono dania daʼõ, ba oetimba chõnia nemalinia fefoe, fasoei. Selomo sa dõinia; ba faʼatoelõ ba faʼahono oebeʼe ba Ndraono Gizeraëli, ba gõtõnia. 10Daʼõ dania zolaoe osali, nahia dõigoe; onogoe ia, ba amania ndraʼo, ba oeʼaʼaroʼõ dadaoma zalaw̃a chõnia, ba Ndraono Gizeraëli, iroegi zi lõ aetoe. 11Ba ijaʼe saʼae, jaʼoegõ onogoe, ba jamoetoloʼõ Jehowa, enaʼõ mofozoe wolaoemõ, ba enaʼõ õlaoe gosali andrõ cho Lowalangioe, Jehowa, si mane nifaboeʼoenia, nitandrõsaigõ chõoe. 12Jamoebeʼe chõoe waʼatoeatoea ba faʼaboto ba dõdõ Jehowa, ba jamoefataro razo Ndraono Gizeraëli ndraʼoegõ, ba enaʼõ õʼoʼõ goroisa Lowalangioe Jehowa. 13Awena dania mofozoe wolaoemõ, na õtõrõ sibai gamachoita andrõ, awõ nihoekoe andrõ, niw̃aʼõ Jehowa chõ Moze, nifaʼema ba Ndraono Gizeraëli. Abeʼeʼõ dõdõoe, ja sabõlõ ndraʼoegõ! Bõi boesi dõdõoe ba bõi beʼe nikeani ndraʼoegõ! (Raz. I. 2, 2. 3). 14Hiza, lõ lai wamakaogoe andrõ, ba no oehõna zogoena ba wolaoe osali Jehowa andrõ: 397,050,000 balaki ganaʼa ba 220,500,000 balaki wirõ, ba tõla ba siʼõli, si lõ moetaha moeʼerai, me no fahõna manõ. Ba he eoe balo, ba he kara, ba no oehõna, ba õnõnõ na dania. (F. 29, 2). 15Ba he toeka — sanoto kara ba samaʼanõ, ba sotomo, — ba no fahõna chõoe, ba sonecheneche ba ngawalõ hadia ia, 16ba ngawalõ halõw̃õ, ba ganaʼa ba ba wirõ ba ba dõla ba ba ziʼõli, ato sibai ira. Ba laboe, ba jamoetoloʼõ Jehowa!
17III. Ba ibeʼe li Dawido, ba zalaw̃a ba Ndraono Gizeraëli fefoe, ba wanolo ononia Selomo, [imane]: 18Hadia, tenga no itolo ami Lowalangimi, Jehowa, ba tenga no ibeʼe, lõ hadia ia chõmi fasoei manõ? Noa sa ibeʼe ba dangagoe niha [si tohõna] ba danõ, ba lõ tola lõ mangaloeloe ira chõ Jehowa ba ba mbanoeania. (A. 9. F. 23, 25). 19Ba mibeʼe dõdõmi, ba eraʼera, ba wangaloei Lowalangimi, Jehowa. Milaboe, milaoe nahia niʼamoniʼõ andrõ chõ Lowalangimi, Jehowa, enaʼõ ba daʼõ bacha mibeʼe dawõla goroisa Jehowa andrõ, fabaja fakake niʼamoniʼõ andrõ chõ Lowalangi, ba gosali andrõ, nilaoe ba dõi Jehowa.
Currently Selected:
SOERA NGAʼÕTÕ I. FAZA 22.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.