1 CORINTIOS 2

El mensaje de Cristo crucificado

1Mʉja tʉpʉ Dio ye quetire buioʉ ejaʉ, “Caroaro ca-buio majii ãmi, capee ca-majii ãmi Pablo,” yʉre na ĩi tʉjʉato ca-ĩire bairo yʉ ca-baiquẽpʉ. 2Mʉja mena ãcʉ̃ Jesucristore na majiato ĩi yucʉ tẽorica pãipʉ cʉ̃ ca-bai yajirique jetore na yʉ buiogʉ ĩi, yʉ ca-baiwʉ. 3Ca-buio ocabʉtiquẽcʉ yʉ ca-ãmʉ mʉja tʉpʉ buioʉ ejaʉ. “Caroaro yʉ buio majiquẽe,” ĩi tʉgooñabacʉ yʉ ca-nanaa uwiwʉ. 4-5Yʉ majuuna yʉ ca-majiri wamere mʉja ca-nʉcʉbʉgoparore bairo yʉ ca-baiquẽpʉ. To bairi ca-majirã majuu na ca-wadanucurore bairo yʉ ca-buioquẽpʉ. Camaja, “Caroaro ca-majirã majuu na ca-tʉgooña majiri wamere buioʉmi, tiere mani nʉcʉbʉgogarã,” yʉ ĩirema ĩi cawatoa macacʉre bairo mʉjaare yʉ ca-ĩi buionucuwʉ. Dio ca-tutua majuʉre, ca-maji majuʉre mʉja ca-nʉcʉbʉgope boʉ Dio Espíritu Santo yʉre cʉ̃ ca-ocabʉtioro mena mʉjaare yʉ ca-buiowʉ.

Dios se da a conocer por medio de su Espíritu

6To bairo ca-baii anibacʉ quena netoro Jesucristore ca-nʉcʉbʉgorã macare pairo majirique mena na yʉ buio. Ati yepa macana na ca-majiri wame unie me ãa Dio ye cʉ̃ ca-majirije maca. Na ʉparã quena na ca-majiri wame unie me ãa. Na ca-majibatie maca yajicoagaro. 7Dio cʉ̃ ca-majirije nemoo camajare na cʉ̃ ca-majioquetajere jã ĩi buio. “Ati ʉmʉrecóo átigʉ jʉgoye cʉ̃ mena caroaro mani ca-anicõa aninucupere ca-quenoo jʉgoyeye peocõa tʉgayupi,” ca-ĩrijere jã ĩi buio. 8Jicãʉ maca ati yepa macana ʉpaʉ ucʉ̃ atie majiriquere ca-api majiquẽjupi. Ca-api majirã na ca-ãmata mani Ʉpaʉ Jesucristo seeto ca-roti majiire jĩaquetiboricarãma. 9Dio ye queti ucarica pũuripʉ ca-ĩirore bairona bai:

Cʉ̃re ca-boorãre caroa majuure na ca-quenoo yuubojayupi Dio. Camaja na ca-tʉjʉñaquetajere, na ca-queti apiñaquetajere, “To bairona baigaro,” na ca-ĩi tʉgooñaquetajere na ca-quenoo yuubojayupi Dio, ĩi ucarique ãa.#Isaías 64.4

10Tie ca-ñuurijere Dio Espíritu Santo jʉgori manire majiomi Dio. Nipetirore ca-majii ãmi Espíritu Santo. Camajare Dio cʉ̃ ca-majioquẽtie quenare ca-majii ãmi.

11Apeĩ cʉ̃ ca-tʉgooñarijere mani majiquẽe. Cʉ̃ jeto cʉ̃ ca-tʉgooñarijere majimi. To bairona baimi Espíritu Santo. Cʉ̃ jeto majimi Dio cʉ̃ ca-tʉgooñarijere. 12To bairi cʉ̃ Espíritu Santore mani ca-jooyupi Dio cʉ̃re ca-api nʉcʉbʉgorãre. To bairo manire joʉ, ati yepa macanare bairo na tʉgooñaqueticõato ĩi ca-jooyupi. Yʉ ca-aniere caroare na yʉ ca-joorije macare na tʉgooña majiato ĩi manire ca-jooyupi Dio cʉ̃ Espíritu Santore. 13To bairi tiere caroa macajere jã queti buionucu Espíritu Santo jãare cʉ̃ ca-majiorije mena. Jã majuuna jã ca-majirije mena jã ca-tʉgooña jʉgo atáje me ãa. To bairi Espíritu Santore ca-cʉgorã aniri cʉ̃re ca-cʉgorãrena jã buio.

14Ati yepa macana Espíritu Santore ca-cʉgoquẽna maca jã ca-buiorijere apigaquẽema. Espíritu Santo jãare cʉ̃ ca-buio rotirijere apirã, “To bairo ĩi mecʉcõarã ĩima,” jã ĩima. Espíritu Santo jʉgori Dio yere mani maji. To bairi cʉ̃re ca-cʉgoquẽna maca Dio yere api majiquẽema. 15Espíritu Santore ca-cʉgorã maca nipetiro queti buiorica wamerire, “¿Cariape macaje to ãtí?” ĩi beje majima. To bairo ca-ãnare, “Cariape átiquẽema,” na ĩi majiquẽema aperã, ca-tʉgooña beje majirã macare. 16Dio ye queti ucarica pũuripʉ oco bairo ĩi ucarique ãa:

“Jicãʉ maca mani Ʉpaʉ Dio cʉ̃ ca-tʉgooñarijere majiquẽemi. ‘Oco bairo cariape cá-átipe ãa,’ Diore ĩi majiquẽemi.” To bairo to ca-anibato quena mani maca Espíritu Santore ca-cʉgorã aniri Jesucristo caroaro cʉ̃ ca-tʉgooñarore bairo mani tʉgooñarique cʉti mania.#Isaías 40.12

Currently Selected:

1 CORINTIOS 2: TAVNT2

Highlight

Copy

Compare