ܪ̈ܗ݇ܘܿܡܝܐ 9

ܓܲܒܵܝܬܵܐ ܕܐܲܠܵܗܵܐ

1ܫܪܵܪܵܐ ܗܲܡܙܘܼܡܹܐ ܝܘܸܢ ܒܡܫܝܼܚܵܐ، ܘܠܹܐ ܝܘܸܢ ܕܲܓܘܼܠܹܐ، ܘܐܸܢܝܲܬܝܼ ܒܸܣܗܵܕܵܐ ܝܠܵܗ̇ ܥܲܠܝܼ ܒܪܘܼܚܵܐ ܕܩܘܼܕܫܵܐ، 2ܕܦܵܫܲܡܬܵܐ ܓܘܼܪܬܵܐ ܐܝܼܬ ܠܝܼ، ܘܚܲܫܵܐ ܡ̣ܢ ܓܵܘ ܠܸܒܝܼ ܠܹܐ ܝܠܹܗ ܒܸܦܪܵܩܵܐ. 3ܣܵܒܵܒ ܐܵܢܵܐ ܒܵܥܹܝܢ ܗ݇ܘܵܐ ܕܒܓܵܢܝܼ ܗܵܘܹܝܢ ܗ݇ܘܵܐ ܡܘܼܚܪܸܡܵܐ ܡ̣ܢ ܡܫܝܼܚܵܐ ܒܘܼܬ ܚܵܬܸܪ ܕܐܲܚܘܿܢܘܵܬܝܼ̈، ܘܚܸܙܡܵܢܝܼ̈ ܒܦܲܓ݂ܪܵܐ، 4ܕܝܼܢܵܐ ܒܢܲܝ̈ ܝܼܣܪܵܝܹܠ، ܘܕܝܼܲܝܗܝ ܝܠܵܗ̇ ܒܪܘܿܢܘܼܬܵܐ، ܘܚܸܩܪܵܐ، ܘܘܲܥܕܹ̈ܐ، ܘܝܲܗ݇ܒܲܠܬܵܐ ܕܢܵܡܘܿܣܵܐ، ܘܣܓ݂ܵܕܬܵܐ ܘܩܵܘܠܹ̈ܐ، 5ܘܕܝܼܲܝܗܝ ܝܢܵܐ ܐܲܒ݂ܵܗܵܬܹ̈ܐ، ܘܡܸܢܲܝܗܝ ܝܠܹܗ ܡܫܝܼܚܵܐ ܡ̣ܢ ܐ݇ܢܵܫܘܼܬܹܗ ܓܹܒܵܐ، ܗ̇ܘ ܕܝܼܠܹܗ ܐܲܠܵܗܵܐ ܥܲܠ ܟܠ، ܡܒܘܼܪܟ݂ܵܐ ܠܥܵܠܡܝܼܢ، ܐܵܡܹܝܢ. 6ܐܝܼܢܵܐ ܠܹܐ ܝܠܵܗ̇ ܒܛܝܼܠܬܵܐ ܗܹܡܸܙܡܵܢ ܕܐܲܠܵܗܵܐ. ܣܵܒܵܒ ܟܠܲܝܗܝ ܐܵܢܝܼ ܕܝܼܢܵܐ ܡ̣ܢ ܒܢܲܝ̈ ܝܼܣܪܵܝܹܠ ܠܹܐ ܝܢܵܐ ܝܼܣܲܪ̈ܠܵܝܹܐ، 7ܘܠܵܐ ܐܵܢܝܼ ܕܝܼܢܵܐ ܡ̣ܢ ܙܲܪܥܵܐ ܕܐܲܒ݂ܪܵܗܵܡ ܒܢܘܿܢܹ̈ܐ ܕܐܲܒ݂ܪܵܗܵܡ ܝܼܢܵܐ، ܐܸܠܵܐ

ܒܐܝܼܣܚܵܩ ܒܸܬ ܦܵܐܹܫ ܝܘܼܗ݇ܒ݂ܵܐ ܐܸܠܘܼܟ݂ ܙܲܪܥܵܐ.#ܒܪܝܬܐ 21‏:12

8ܝܲܥܢܹܐ، ܠܹܐ ܝܠܵܗ̇ ܕܒܢܘܿܢܹ̈ܐ ܕܦܲܓ݂ܪܵܐ ܕܝܼܢܵܐ ܒܢܘܿܢܹ̈ܐ ܕܐܲܠܵܗܵܐ، ܐܸܠܵܐ ܒܢܘܿܢܹ̈ܐ ܕܩܵܘܠܵܐ، ܐܲܢܹܐ ܝܢܵܐ ܚܘܼܫܒܸܢܹܐ ܠܙܲܪܥܵܐ. 9ܣܵܒܵܒ ܐܵܗܵܐ ܝܠܵܗ̇ ܗܹܡܸܙܡܵܢ ܕܩܵܘܠܵܐ ܕܦܝܼܫܬܵܐ ܝܗ݇ܘܵܐ ܐ݇ܡܝܼܪܬܵܐ:

ܡܐܲܝܟ݂ ܐܵܗܵܐ ܥܕܵܢܵܐ ܒܸܬ ܐܵܬܹܝܢ، ܘܣܲܪܵܐ ܒܸܬ ܗܵܘܹܐ ܠܵܗ̇ ܒܪܘܿܢܵܐ.#ܒܪܝܬܐ 18‏:10، 14

10ܘܠܵܐ ܐܲܚܟ̰ܝܼ ܐܵܗܵܐ، ܐܝܼܢܵܐ ܐܘܼܦ ܪܲܦܩܵܐ ܙܘܼܘܸܓ ܠܵܗ̇ ܥܲܡ ܚܲܕ، ܥܲܡ ܒܵܒܲܢ ܐܝܼܣܚܵܩ. 11ܣܵܒܵܒ ܡ̣ܢ ܩܵܕ݇ܡ ܕܦܵܝܫܝܼ ܗ݇ܘܵܘ ܝ݇ܠܝܼܕܹܐ ܒܢܘܿܢܹ̈ܐ، ܘܡ̣ܢ ܩܵܕ݇ܡ ܕܥܵܒ݂ܕܝܼ ܗ݇ܘܵܘ ܛܵܒ݂ܬܵܐ ܝܲܢ ܒܝܼܫܬܵܐ، ܦܝܼܫ ܠܹܗ ܡܘܼܩܘܝܼܵܐ ܢܝܼܫܵܐ ܕܐܲܠܵܗܵܐ ܒܓܲܒܵܝܬܵܐ، 12ܠܵܐ ܒܝܲܕ ܦܘܼܠܚܵܢܹ̈ܐ ܐܸܠܵܐ ܒܝܲܕ ܗ̇ܘ ܕܟܹܐ ܓܲܒܹܐ ܦܝܼܫ ܠܹܗ ܐ݇ܡܝܼܪܵܐ ܐܸܠܘܼܗ̇:

ܗ̇ܘ ܓܘܼܪܵܐ ܒܸܬ ܥܵܒܹܕ ܚܸܠܡܲܬ ܠܗ̇ܘ ܙܥܘܿܪܵܐ.#ܒܪܝܬܐ 25‏:23

13ܐܲܝܟ݂ ܕܝܼܠܹܗ ܟܬܝܼܒ݂ܵܐ:

ܠܝܲܥܩܘܿܒ݂ ܡܘܼܚܸܒ ܠܝܼ، ܘܠܥܹܣܘܿ ܣܢܹܐ ܠܝܼ.#ܡܠܐܟ݂ܝ 1‏:2‏‐3

14ܡܘܿܕܝܼ ܐܵܡܪܲܚ؟ ܠܲܝܬ ܫܪܵܪܵܐ ܠܟܸܣ ܐܲܠܵܗܵܐ؟ ܚܵܣ ܠܝܼ. 15ܣܵܒܵܒ ܐ݇ܡܝܼܪܹܗ ܠܡܘܼܫܹܐ:

ܒܸܬ ܥܵܒ݂ܕܹܢ ܪ̈ܲܚܡܹܐ ܥܲܠ ܡ̇ܢ ܕܥܵܒ݂ܕܹܢ ܪ̈ܲܚܡܹܐ، ܘܒܸܬ ܥܵܒ݂ܕܹܢ ܫܵܦܵܩܲܬ ܥܲܠ ܡ̇ܢ ܕܥܵܒ݂ܕܹܢ ܫܵܦܵܩܲܬ.#ܡܦܩܢܐ 33‏:19

16ܗܲܕܟ݂ܵܐ، ܠܹܐ ܝܠܵܗ̇ ܟܠܝܼܬܵܐ ܥܲܠ ܗ̇ܘ ܕܒܵܥܹܐ، ܘܠܵܐ ܥܲܠ ܗ̇ܘ ܕܓ̰ܲܪܸܒ ܒܚܲܝܠܹܗ، ܐܸܠܵܐ ܥܲܠ ܪ̈ܲܚܡܹܐ ܕܐܲܠܵܗܵܐ. 17ܣܵܒܵܒ ܦܝܼܫ ܠܹܗ ܐ݇ܡܝܼܪܵܐ ܓܵܘ ܟܬܵܒ݂ܵܐ ܠܦܸܪܥܘܿܢ:

ܩܵܐ ܐܵܗܵܐ ܢܝܼܫܵܐ ܩܲܡ ܡܲܩܸܡܸܢܘܼܟ݂، ܕܡܲܚܙܹܝܢ ܚܲܝܠܝܼ ܒܝܼܘܼܟ݂، ܘܕܦܵܐܹܫ ܝ݇ܕܝܼܥܵܐ ܫܸܡܝܼ ܓܵܘ ܟܠܵܗ̇ ܐܲܪܥܵܐ.#ܡܦܩܢܐ 9‏:16

18ܗܲܕܟ݂ܵܐ، ܐܲܠܵܗܵܐ ܟܹܐ ܥܵܒܹܕ ܪ̈ܲܚܡܹܐ ܠܡ̇ܢ ܕܒܵܥܹܐ ܥܵܒܹܕ ܪ̈ܲܚܡܹܐ، ܘܡܲܩܫܹܐ ܠܸܒܵܐ ܕܡ̇ܢ ܕܒܵܥܹܐ ܡܲܩܫܹܐ ܠܸܒܹܗ. 19ܩܵܘܡܵܐ ܒܸܬ ܐܵܡܪܹܬ ܐܸܠܝܼ، ”ܩܵܡܘܿܕܝܼ ܐܲܠܵܗܵܐ ܒܸܬ ܕܵܒܹܩ ܓܢܵܗܵܐ ܥܲܠܲܢ؟ ܣܵܒܵܒ ܡܵܢܝܼ ܡܵܨܹܐ ܟܵܠܹܐ ܕܲܠܩܘܼܒ݂ܠ ܕܨܸܒ݂ܝܵܢܹܗ؟“ 20ܠܵܐ. ܡܵܢܝܼ ܝܘܸܬ ܐܲܢ݇ܬ ܝܵܐ ܒܲܪܢܵܫܵܐ ܕܓ̰ܲܘܸܒܸܬ ܠܐܲܠܵܗܵܐ؟ ܡܵܨܝܵܐ ܐܵܡܪܵܐ ܓܒ݂ܝܼܠܬܵܐ ܠܓܵܒ݂ܠܵܢܵܐ، ”ܩܵܡܘܿܕܝܼ ܗܲܕܟ݂ܵܐ ܩܲܡ ܓܵܒ݂ܠܹܬ ܠܝܼ؟“#ܐܫܥܝܐ 29‏:16، 45‏:9 21ܠܲܝܬ ܠܹܗ ܦܲܚܵܪܵܐ ܫܘܼܠܛܵܢܵܐ ܥܲܠ ܛܝܼܢܵܐ ܕܥܵܒܹܕ ܗܲܪ ܡ̣ܢ ܚܕܵܐ ܓܒ݂ܝܼܠܬܵܐ ܕܛܝܼܢܵܐ ܚܲܕ ܡܵܐܢܵܐ ܠܐܝܼܩܵܪܵܐ ܘܗ̇ܘ ܐ݇ܚܹܪ݇ܢܵܐ ܠܡܲܣܠܵܝܬܵܐ؟ 22ܡܘܿܕܝܼ ܐܸܢ ܐܲܠܵܗܵܐ ܒܥܹܐ ܠܹܗ ܕܡܲܚܙܹܐ ܟܲܪܒܹܗ ܘܡܲܕܸܥ ܚܲܝܠܹܗ، ܡܘܼܪܝܸܟ݂ ܠܹܗ ܒܹܐܢܹܗ ܥܲܠ ܡܵܐܢܹ̈ܐ ܕܟܲܪܒܵܐ ܕܝܼܢܵܐ ܗܘܼܕܪܹܐ ܠܛܠܵܩܵܐ؟ 23ܘܕܡܲܚܙܹܐ ܝܘܼܬܪܵܢܵܐ ܕܫܘܼܒ݂ܚܹܗ ܠܐܵܢܝܼ ܕܝܼܢܵܐ ܗܘܼܕܪܹܐ ܠܪ̈ܲܚܡܹܐ، ܐܵܢܝܼ ܕܡ̣ܢ ܩܵܕ݇ܡܵܝܬܵܐ ܗܘܼܕܪܲܝ ܠܹܗ ܠܚܸܩܪܵܐ، 24ܐܘܼܦ ܐܲܚܢܲܢ، ܐܵܢܝܼ ܕܐܲܠܵܗܵܐ ܓܘܼܒܝܲܝ ܠܹܗ، ܠܵܐ ܐܲܚܟ̰ܝܼ ܡ̣ܢ ܝܗܘܼܕܵܝܹ̈ܐ ܐܝܼܢܵܐ ܐܘܼܦ ܡ̣ܢ ܐܸܡܘܵܬܹ̈ܐ. 25ܕܵܐܟ݂ܝܼ ܕܐܘܼܦ ܗܘܿܫܲܥ ܢܒ݂ܝܼܵܐ ܐ݇ܡܝܼܪܹܗ:

ܐܵܢܝܼ ܕܠܹܐ ܝܢܵܐ ܥܲܡܝܼ، ܒܸܬ ܩܵܪܹܝܢܗܘܿܢ ܥܲܡܝܼ، ܘܗ̇ܝ ܕܠܹܐ ܝܠܵܗ̇ ܡܘܼܚܸܒܬܵܐ، ܒܸܬ ܩܵܪܹܝܢܵܗ̇ ܡܘܼܚܸܒܬܵܐ.#ܗܘܫܥ 2‏:23

26ܘܒܸܬ ܗܵܘܝܵܐ ܒܕܘܼܟܵܐ ܕܦܝܼܫܬܵܐ ܝܗ݇ܘܵܐ ܐ݇ܡܝܼܪܬܵܐ ܐܸܠܲܝܗܝ: ܠܹܐ ܝܬܘܿܢ ܥܲܡܝܼ، ܬܵܡܵܐ ܒܸܬ ܦܵܝܫܝܼ ܩܸܪܝܹܐ ܒܢܘܿܢܹ̈ܐ ܕܐܲܠܵܗܵܐ ܚܵܝܵܐ.#ܗܘܫܥ 1‏:10

27ܐܹܫܲܥܝܵܐ ܡܘܼܩܘܸܚ ܠܹܗ ܒܘܼܬ ܝܼܣܪܵܝܹܠ ܘܐ݇ܡܝܼܪܹܗ:

ܐܘܼܦ ܐܸܢ ܕܗܵܘܹܐ ܡܸܢܝܵܢܵܐ ܕܒܢܲܝ̈ ܝܼܣܪܵܝܹܠ ܐܲܝܟ݂ ܣܹܠܵܐ ܕܝܵܡܵܐ، ܐܲܚܟ̰ܝܼ ܚܲܕ ܣܵܗܡܵܐ ܡܸܢܲܝܗܝ ܒܸܬ ܦܵܪܹܩ.

28ܣܵܒܵܒ ܡܵܪܝܵܐ ܒܓ̰ܲܠܕܘܼܬܵܐ ܒܸܬ ܬܲܡܸܡ ܠܹܗ ܫܘܼܠܹܗ ܥܲܠ ܐܲܪܥܵܐ.#ܐܫܥܝܐ 10‏:22‏‐23

29ܐܲܝܟ݂ ܕܐ݇ܡܝܼܪܹܗ ܐܹܫܲܥܝܵܐ ܡ̣ܢ ܩܵܕ݇ܡܵܝܬܵܐ:

ܐܸܢ ܡܵܪܝܵܐ ܚܲܝܠܬܵܢܵܐ ܠܵܐ ܗܵܘܹܐ ܗ݇ܘܵܐ ܫܒ݂ܝܼܩܵܐ ܐܸܠܲܢ ܙܲܪܥܵܐ، ܒܸܬ ܗܵܘܲܚ ܗ݇ܘܵܘ ܐܲܝܟ݂ ܣܕܘܿܡ ܘܒܸܬ ܕܵܡܲܚ ܗ݇ܘܵܘ ܠܥܵܡܘܿܪܵܐ.#ܐܫܥܝܐ 1‏:9

30ܒܘܼܬ ܐܵܗܵܐ ܐܵܡܪܲܚ، ܕܐܸܡܘܵܬܹ̈ܐ ܕܠܹܐ ܝܗ݇ܘܵܘ ܒܸܛܥܵܝܵܐ ܠܙܲܕܝܼܩܘܼܬܵܐ ܡܘܼܫ݇ܟ̰ܸܚ ܠܗܘܿܢ ܙܲܕܝܼܩܘܼܬܵܐ، ܙܲܕܝܼܩܘܼܬܵܐ ܕܝܼܠܵܗ̇ ܒܗܲܝܡܵܢܘܼܬܵܐ. 31ܐܝܼܢܵܐ ܒܢܲܝ̈ ܝܼܣܪܵܝܹܠ، ܕܒܸܛܥܵܝܵܐ ܝܗ݇ܘܵܘ ܠܙܲܕܝܼܩܘܼܬܵܐ ܕܟܹܐ ܐܵܬܝܵܐ ܡ̣ܢ ܢܵܡܘܿܣܵܐ، ܠܵܐ ܡܘܼܫ݇ܟ̰ܚܵܐ ܠܗܘܿܢ. 32ܩܵܡܘܿܕܝܼ؟ ܣܵܒܵܒ ܠܹܐ ܝܗ݇ܘܵܘ ܒܸܛܥܵܝܵܐ ܒܗܲܝܡܵܢܘܼܬܵܐ ܐܸܠܵܐ ܒܦܘܼܠܚܵܢܹ̈ܐ ܕܢܵܡܘܿܣܵܐ. ܒܘܼܬ ܐܵܗܵܐ ܬܘܼܪܩܸܠ ܠܗܘܿܢ ܒܟܹܐܦܵܐ ܕܬܲܪܩܲܠܬܵܐ. 33ܕܵܐܟ݂ܝܼ ܕܝܼܠܹܗ ܟܬܝܼܒ݂ܵܐ:

ܒܸܬ ܡܲܬܒܸܢ ܓܵܘ ܨܸܗܝܘܿܢ ܟܹܐܦܵܐ ܕܬܲܪܩܲܠܬܵܐ، ܘܩܵܝܵܐ ܕܢܦܵܠܬܵܐ، ܘܡ̇ܢ ܕܗܲܡܸܢ ܒܝܼܹܗ ܠܹܐ ܢܵܟܹܦ.#ܐܫܥܝܐ 8‏:14، 28‏:16

Currently Selected:

ܪ̈ܗ݇ܘܿܡܝܐ 9: ABTAB

Highlight

Copy