ܪ̈ܗ݇ܘܿܡܝܐ 10
10
1ܐܲܚܘܿܢܘܵܬܝܼ̈، ܫܲܗܘܲܬܬܵܐ ܕܠܸܒܝܼ ܘܦܲܪܦܲܠܬܝܼ ܒܐܲܠܵܗܵܐ ܒܘܼܬ ܒܢܲܝ̈ ܝܼܣܪܵܝܹܠ ܝܼܠܵܗ̇ ܕܦܵܪܩܝܼ. 2ܣܵܒܵܒ ܒܸܣܗܵܕܵܐ ܝܘܸܢ ܡ̣ܢ ܓܹܒܲܝܗܝ ܕܛܲܢܵܢܹ̈ܐ ܝܢܵܐ ܩܵܐ ܐܲܠܵܗܵܐ، ܐܝܼܢܵܐ ܠܵܐ ܒܝ݇ܕܲܥܬܵܐ. 3ܟܲܕ ܠܵܐ ܒܝܼܕܵܥܵܐ ܟܹܐܢܘܼܬܵܐ ܕܐܲܠܵܗܵܐ، ܘܒܸܛܥܵܝܵܐ ܕܡܲܫ݇ܟ̰ܚܝܼ ܟܹܐܢܘܼܬܵܐ ܕܓܵܢܲܝܗܝ، ܠܵܐ ܗܘܹܐ ܠܗܘܿܢ ܙܲܒܛ ܠܟܹܐܢܘܼܬܵܐ ܕܐܲܠܵܗܵܐ. 4ܣܵܒܵܒ ܡܫܝܼܚܵܐ ܝܠܹܗ ܚܘܼܬܵܡܵܐ ܕܙܲܕܝܼܩܘܼܬܵܐ ܕܟܹܐ ܐܵܬܝܵܐ ܒܝܲܕ ܢܵܡܘܿܣܵܐ، ܕܗܵܘܝܵܐ ܙܲܕܝܼܩܘܼܬܵܐ ܠܟܠ ܕܗܲܡܸܢ. 5ܡܘܼܫܹܐ ܟܬܝܼܒ݂ ܠܹܗ ܒܘܼܬ ܙܲܕܝܼܩܘܼܬܵܐ ܕܟܹܐ ܐܵܬܝܵܐ ܒܝܲܕ ܢܵܡܘܿܣܵܐ ܘܐ݇ܡܝܼܪܹܗ:
ܟܠ ܡ̇ܢ ܕܥܵܒܹܕ ܐܲܢܹܐ ܒܸܬ ܚܵܝܹܐ ܒܝܼܲܝܗܝ.#ܟܗܢ̈ܐ 18:5
6ܐܝܼܢܵܐ ܙܲܕܝܼܩܘܼܬܵܐ ܕܟܹܐ ܐܵܬܝܵܐ ܒܝܲܕ ܗܲܝܡܵܢܘܼܬܵܐ ܟܹܐ ܐܵܡܪܵܐ، ”ܠܵܐ ܐܵܡܪܹܬ ܓܵܘ ܠܸܒܘܼܟ݂، ’ܡܵܢܝܼ ܒܸܬ ܐܵܣܹܩ ܠܫܡܲܝܵܐ؟‘#ܬܢܝܢ ܢܡܘܣܐ 30:12 ܝܲܥܢܹܐ ܕܡܲܨܠܹܐ ܠܡܫܝܼܚܵܐ، 7”ܝܲܢ ’ܡܵܢܝܼ ܒܸܬ ܨܵܠܹܐ ܠܥܘܼܡܩܵܐ؟‘#ܬܢܝܢ ܢܡܘܣܐ 30:13 ܝܲܥܢܹܐ ܕܡܲܐܣܸܩ ܠܡܫܝܼܚܵܐ ܡ̣ܢ ܡܝܼܬܹ̈ܐ.“ 8ܐܝܼܢܵܐ ܡܘܿܕܝܼ ܟܹܐ ܐܵܡܪܵܐ؟ ܟܹܐ ܐܵܡܪܵܐ، ”ܗܹܡܸܙܡܵܢ ܩܘܼܪܒܘܼܟ݂ ܝܼܠܵܗ̇، ܐܘܼܦ ܓܵܘ ܦܘܼܡܘܼܟ݂ ܘܠܸܒܘܼܟ݂ ܝܼܠܵܗ̇،“#ܬܢܝܢ ܢܡܘܣܐ 30:14 ܝܲܥܢܹܐ ܗܹܡܸܙܡܵܢ ܕܗܲܝܡܵܢܘܼܬܵܐ ܕܡܲܟܪܘܼܙܘܼܗ̇ ܝܘܲܚ، 9ܕܐܸܢ ܡܵܘܕܹܝܬ ܒܦܘܼܡܘܼܟ݂ ܕܝܼܫܘܿܥ ܡܵܪܲܢ ܝܼܠܹܗ، ܘܗܲܡܸܢܸܬ ܒܠܸܒܘܼܟ݂ ܕܐܲܠܵܗܵܐ ܡܘܼܩܸܡ ܠܹܗ ܐܸܠܹܗ ܡ̣ܢ ܓܵܘ ܡܝܼܬܹ̈ܐ، ܒܸܬ ܦܵܪܩܹܬ. 10ܣܵܒܵܒ ܒܠܸܒܘܼܟ݂ ܟܹܐ ܗܲܡܸܢܸܬ ܘܟܹܐ ܦܵܝܫܹܬ ܡܘܼܟܫܸܛܵܐ، ܘܒܦܘܼܡܘܼܟ݂ ܟܹܐ ܡܵܘܕܹܝܬ ܘܟܹܐ ܦܵܪܩܹܬ. 11ܕܵܐܟ݂ܝܼ ܕܒܹܐܡܵܪܵܐ ܝܠܹܗ ܟܬܵܒ݂ܵܐ:
ܟܠ ܡ̇ܢ ܕܗܲܡܸܢ ܒܝܼܹܗ ܠܹܐ ܢܵܟܹܦ.#ܐܫܥܝܐ 28:16
12ܣܵܒܵܒ ܠܲܝܬ ܦܘܼܪܫܘܼܢܝܵܐ ܒܹܝܠ ܝܗܘܼܕܵܝܵܐ ܘܝܵܘܢܵܝܵܐ، ܣܵܒܵܒ ܚܲܕ ܡܵܪܝܵܐ ܝܠܹܗ ܥܲܠ ܟܠܲܝܗܝ، ܘܪܵܒܵܐ ܟܹܐ ܒܲܪܸܟ݂ ܠܐܵܢܝܼ ܕܩܵܪܝܼ ܠܹܗ. 13ܣܵܒܵܒ ܟܠ ܡ̇ܢ ܕܩܵܪܹܐ ܒܫܸܡܵܐ ܕܡܵܪܝܵܐ ܒܸܬ ܦܵܪܹܩ.#ܝܘܐܝܠ 2:32 14ܐܝܼܢܵܐ ܕܵܐܟ݂ܝܼ ܒܸܬ ܩܵܪܝܼ ܒܫܸܡܵܐ ܕܚܲܕ ܕܠܹܐ ܗܲܡܸܢܝܼ ܒܝܼܹܗ؟ ܘܕܵܐܟ݂ܝܼ ܒܸܬ ܗܲܡܸܢܝܼ ܒܚܲܕ ܕܠܹܐ ܝܢܵܐ ܫܡܝܼܥܹܐ ܒܘܼܬ ܕܝܼܹܗ؟ ܘܕܵܐܟ݂ܝܼ ܒܸܬ ܫܵܡܥܝܼ ܕܠܵܐ ܡܲܟܪܸܙܵܢܵܐ؟ 15ܘܕܵܐܟ݂ܝܼ ܒܸܬ ܡܲܟܪܸܙܝܼ ܐܸܢ ܠܹܐ ܝܢܵܐ ܦܝܼܫܹܐ ܫܘܼܕܪܹܐ؟ ܐܲܝܟ݂ ܕܝܼܠܹܗ ܟܬܝܼܒ݂ܵܐ:
ܟܡܵܐ ܫܲܦܝܼܪܹ̈ܐ ܝܢܵܐ ܐܲܩܠܵܬܹ̈ܐ ܕܡܲܫܚܸܕܵܢܹ̈ܐ ܕܐܹܘܲܢܓܲܠܝܼܘܿܢ!#ܐܫܥܝܐ 52:7
16ܐܝܼܢܵܐ ܟܠܲܝܗܝ ܒܢܲܝ̈ ܝܼܣܪܵܝܹܠ ܠܵܐ ܩܘܼܒܸܠ ܠܗܘܿܢ ܠܐܹܘܲܢܓܲܠܝܼܘܿܢ. ܐܲܝܟ݂ ܕܐ݇ܡܝܼܪܹܗ ܐܹܫܲܥܝܵܐ:
ܡܵܪܝܼ، ܡܵܢܝܼ ܗܘܼܡܸܢܹܗ ܠܗܹܡܸܙܡܵܢܲܢ؟#ܐܫܥܝܐ 53:1
17ܗܲܕܟ݂ܵܐ، ܗܲܝܡܵܢܘܼܬܵܐ ܟܹܐ ܐܵܬܝܵܐ ܡ̣ܢ ܫܡܵܥܬܵܐ، ܘܫܡܵܥܬܵܐ ܡ̣ܢ ܗܹܡܸܙܡܵܢ ܕܡܫܝܼܚܵܐ.
18ܐܝܼܢܵܐ ܐܵܢܵܐ ܒܲܩܘܼܪܹܐ ܝܘܸܢ: ܠܹܐ ܝܢܵܐ ܫܡܝܼܥܹܐ ܐܵܢܝܼ؟ ܗܹܐ، ܫܡܝܼܥܹܐ ܝܢܵܐ.
ܒܟܠܵܗ̇ ܐܲܪܥܵܐ ܦܠܝܼܛ ܠܹܗ ܩܵܠܲܝܗܝ، ܘܒܡܲܪ̈ܙܵܢܹܐ ܕܕܘܼܢܝܹܐ ܗܹܡܸܙܡܵܢܲܝܗܝ.#ܡܙܡܘܪ̈ܐ 19:4
19ܡܸܢܕܪܸܫ ܒܲܩܘܼܪܹܐ ܝܘܸܢ، ܠܵܐ ܝ݇ܕܝܼܥ ܠܗܘܿܢ ܒܢܲܝ̈ ܝܼܣܪܵܝܹܠ؟ ܡ̣ܢ ܩܵܕ݇ܡܵܝܬܵܐ ܡܘܼܫܹܐ ܐ݇ܡܝܼܪܹܗ:
ܒܸܬ ܥܵܒ݂ܕܹܢܵܘܟ݂ܘܿܢ ܕܒܲܚܸܠܝܼܬܘܿܢ ܒܐܘܼܡܬܵܐ ܕܠܹܐ ܝܠܵܗ̇ ܐܘܼܡܬܵܐ، ܘܒܸܬ ܡܲܟܪܸܒܸܢܵܘܟ݂ܘܿܢ ܒܐܘܼܡܬܵܐ ܕܠܵܐ ܦܲܪܡܵܝܬܵܐ.#ܬܢܝܢ ܢܡܘܣܐ 32:21
20ܐܹܫܲܥܝܵܐ ܩܘܼܫܕܸܪܹܗ ܘܐ݇ܡܝܼܪܹܗ:
ܦܝܼܫ ܠܝܼ ܡܘܼܫ݇ܟ̰ܚܵܐ ܠܐܵܢܝܼ ܕܠܵܐ ܛܥܹܐ ܠܗܘܿܢ ܐܸܠܝܼ، ܘܦܝܼܫ ܠܝܼ ܓܸܠܝܵܐ ܠܐܵܢܝܼ ܕܠܵܐ ܒܘܼܩܸܪܗܘܿܢ ܥܲܠܝܼ.#ܐܫܥܝܐ 65:1
21ܐܝܼܢܵܐ ܒܘܼܬ ܝܼܣܪܵܝܹܠ ܐ݇ܡܝܼܪܹܗ:
ܟܠܹܗ ܝܵܘܡܵܐ ܦܘܼܫܸܛ ܠܝܼ ܐܝܼܕܵܬܝܼ̈ ܠܟܸܣ ܥܲܡܵܐ ܠܵܐ ܡܲܨܝܸܬܵܢܵܐ، ܘܡܲܩܪܸܨܵܢܵܐ.#ܐܫܥܝܐ 65:2
Currently Selected:
ܪ̈ܗ݇ܘܿܡܝܐ 10: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
