ܡܬܠ̈ܐ 20
20
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܡܲܣܚܸܪܵܢܵܐ ܝܠܹܗ ܚܲܡܪܵܐ، ܒܲܪܒܸܪܵܢܵܐ ܝܠܹܗ ܫܲܟ݂ܪܵܐ،
ܘܟܠ ܕܪܵܘܹܐ ܒܝܼܹܗ ܠܹܐ ܝܠܹܗ ܚܲܟܝܼܡܵܐ.
2ܚܸܡܬܵܐ ܕܡܲܠܟܵܐ ܐܲܝܟ݂ ܓܲܪܓܲܡܬܵܐ ܕܐܲܪܝܵܐ ܝܠܵܗ̇،
ܘܗ̇ܘ ܕܡܲܟܪܸܒ ܠܹܗ ܟܹܐ ܚܵܛܹܐ ܥܲܠ ܓܵܢܹܗ.
3ܐܝܼܩܵܪܵܐ ܝܠܵܗ̇ ܠܐ݇ܢܵܫܵܐ ܪܚܵܩܬܵܐ ܡ̣ܢ ܕܘܼܪܵܫܵܐ،
ܐܝܼܢܵܐ ܟܠ ܣܲܟ݂ܠܵܐ ܟܹܐ ܡܲܩܪܸܨ.
4ܒܥܕܵܢܵܐ ܕܙܪܘܼܥܬܵܐ ܡܲܟܣܸܠܵܢܵܐ ܠܹܐ ܡܵܚܹܐ ܦܕܵܢܵܐ،
ܒܥܕܵܢܵܐ ܕܚܸܨܕܵܐ ܒܸܬ ܛܵܠܹܒ ܕܲܚܠܵܐ، ܐܝܼܢܵܐ ܠܲܝܬ.
5ܡ̈ܝܼܵܐ ܥܲܡܘܼܩܹ̈ܐ ܝܠܹܗ ܡܸܠܟܵܐ ܒܠܸܒܵܐ ܕܐ݇ܢܵܫܵܐ،
ܐܲܚܟ̰ܝܼ ܐ݇ܢܵܫܵܐ ܦܲܪܡܝܼܵܢܵܐ ܟܹܐ ܓܵܪܹܫ ܠܹܗ.
6ܪܵܒܵܐ ܐ݇ܢܵܫܹ̈ܐ ܟܹܐ ܩܵܪܝܼ ܠܵܗ̇ ܓܵܢܲܝܗܝ ”ܐ݇ܢܵܫܵܐ ܕܫܵܦܵܩܲܬ،“
ܐܝܼܢܵܐ ܐ݇ܢܵܫܵܐ ܡܗܘܼܡܢܵܐ ܡܵܢܝܼ ܡܲܫ݇ܟ̰ܸܚ؟
7ܟܹܐ ܚܵܕܹܪ ܒܬܲܡܝܼܡܘܼܬܹܗ ܙܲܕܝܼܩܵܐ،
ܛܘܼܒ݂ܵܐ ܠܒܢܘܿܢܘܼ̈ܗܝ ܡ̣ܢ ܒܵܬ݇ܪ ܕܝܼܹܗ.
8ܡܲܠܟܵܐ ܕܝܵܬܹܒ݂ ܥܲܠ ܟܘܼܪܣܝܵܐ ܕܕܝܵܢܬܵܐ،
ܟܹܐ ܣܵܪܹܕ ܒܥܲܝܢܘܼ̈ܗܝ ܟܠ ܒܝܼܫܬܵܐ.
9ܡܵܢܝܼ ܡܵܨܹܐ ܐܵܡܹܪ، ”ܕܘܼܟܹܐ ܠܝܼ ܠܸܒܝܼ،
ܚܘܼܠܸܠ ܠܝܼ ܡ̣ܢ ܚܛܝܼܬܝܼ؟“
10ܡܲܬܩܵܠܵܐ ܦܪܝܼܫܵܐ ܡ̣ܢ ܡܲܬܩܵܠܵܐ ܘܟܝܘܼܠܵܐ ܦܪܝܼܫܵܐ ܡ̣ܢ ܟܝܘܼܠܵܐ،
ܬܸܪܘܲܝܗܝ ܛܲܡܐܘܼܬܵܐ ܝܢܵܐ ܠܡܵܪܝܵܐ.
11ܐܘܼܦ ܒܥܒ݂ܵܕܘܼ̈ܗܝ ܟܹܐ ܦܵܐܹܫ ܝ݇ܕܝܼܥܵܐ ܝܵܠܵܕ݇ܐ،
ܐܸܢ ܕܸܟ݂ܝܵܐ ܘܐܸܢ ܬܪܘܼܨܵܐ ܝܠܹܗ ܦܘܼܠܚܵܢܹܗ.
12ܢܵܬܵܐ ܫܵܡܥܵܢܬܵܐ، ܘܥܲܝܢܵܐ ܚܵܙܝܵܢܬܵܐ،
ܬܸܪܘܲܝܗܝ ܥܒ݂ܝܼܕܲܝ ܠܹܗ ܡܵܪܝܵܐ.
13ܠܵܐ ܡܲܚܸܒܸܬ ܫܸܢܬܵܐ، ܕܠܵܐ ܗܵܘܹܝܬ ܡܸܣܟܹܢܵܐ،
ܦܬܘܿܚ ܥܲܝܢܘܼ̈ܟ݂، ܣܒܸܥ ܒܠܲܚܡܵܐ.
14”ܚܸܪܒܵܐ، ܚܸܪܒܵܐ،“ ܟܹܐ ܐܵܡܹܪ ܙܵܒ݂ܢܵܢܵܐ،
ܐܝܼܢܵܐ ܐܝܼܡܲܢ ܕܐܵܙܹܠ، ܟܹܐ ܗܵܘܹܐ ܒܸܚܩܵܪܵܐ.
15ܐܝܼܬ ܕܲܗܒ݂ܵܐ ܘܦܸܪܝܘܼܬܵܐ ܕܟܹܐܦܹ̈ܐ ܛܝܼܡܵܢܹ̈ܐ،
ܐܝܼܢܵܐ ܡܵܐܢܵܐ ܒܘܼܫ ܡܵܪܹܐ ܛܝܼܡܵܐ ܝܢܵܐ ܣܸܦܘܵܬܹ̈ܐ ܕܝ݇ܕܲܥܬܵܐ.
16ܫܩܘܿܠ ܠܒ݂ܘܼܫܵܐ ܕܐ݇ܢܵܫܵܐ ܟܲܕ ܗܵܘܹܐ ܥܲܪܵܒ݂ܵܐ ܠܩܵܪܝܼܒܵܝܵܐ،
ܘܟܲܕ ܗܵܘܹܐ ܒܘܼܬ ܢܘܼܟ݂ܪ̈ܵܝܹܐ ܫܩܘܿܠ ܠܹܗ ܓܸܪܵܘ.
17ܒܲܣܝܼܡܵܐ ܝܠܹܗ ܠܐ݇ܢܵܫܵܐ ܠܲܚܡܵܐ ܩܸܢܝܵܐ ܒܕܘܼܓܠܵܐ،
ܐܝܼܢܵܐ ܒܵܬ݇ܪ ܗܵܕܵܐ ܒܸܬ ܦܵܐܹܫ ܡܸܠܝܵܐ ܦܘܼܡܹܗ ܒܲܩܠܘܼܫܹ̈ܐ.
18ܚܘܼܫܵܒܹ̈ܐ ܒܡܸܠܟܵܐ ܟܹܐ ܩܵܘܝܼ،
ܒܘܼܬ ܐܵܗܵܐ، ܒܡܕܲܒܪܵܢܘܼܬܵܐ ܥܒ݂ܘܿܕ ܦܠܵܫܵܐ.
19ܟܹܐ ܓܵܠܹܐ ܐ݇ܪܵܙܵܐ ܗ̇ܘ ܕܚܵܕܹܪ ܒܸܕܪܵܝܵܐ ܒܘܼܚܬܵܢ،
ܒܘܼܬ ܐܵܗܵܐ، ܥܲܡ ܦܵܬܚܵܢܵܐ ܕܣܸܦܘܵܬܹ̈ܗ ܠܵܐ ܚܵܒ݂ܛܹܬ.
20ܗ̇ܘ ܕܨܲܥܸܪ ܠܒܵܒܘܼܗܝ ܝܲܢ ܠܝܸܡܹܗ،
ܒܸܬ ܟ̰ܵܡܥܵܐ ܫܪܵܓ݂݇ܝܹܗ ܒܥܘܼܡܩܵܐ ܕܚܸܫܟܵܐ.
21ܝܵܪܬܘܼܬܵܐ ܕܗܵܘܝܵܐ ܒܫܘܼܪܵܝܵܐ ܩܢܝܼܬܵܐ ܒܡܲܠܝܲܙܬܵܐ،
ܒܚܲܪܬܘܼܗ̇ ܠܹܐ ܦܵܝܫܵܐ ܒܘܼܪܸܟ݂ܬܵܐ.
22ܠܵܐ ܐܵܡܪܹܬ، ”ܒܸܬ ܦܵܪܥܹܢ ܒܝܼܫܬܵܐ،“
ܣܦܘܿܪ ܠܡܵܪܝܵܐ ܘܗ̇ܘ ܒܸܬ ܦܲܪܸܩ ܠܘܼܟ݂.
23ܛܲܡܐܘܼܬܵܐ ܝܠܹܗ ܠܡܵܪܝܵܐ ܡܲܬܩܵܠܵܐ ܦܪܝܼܫܵܐ ܡ̣ܢ ܡܲܬܩܵܠܵܐ،
ܘܡܲܣܲܐܬܵܐ ܦܠܝܼܡܬܵܐ ܠܹܐ ܝܠܵܗ̇ ܨܦܵܝܝܼ.
24ܡ̣ܢ ܡܵܪܝܵܐ ܝܢܵܐ ܦܵܣܘܿܥܝܵܬܹ̈ܐ ܕܐ݇ܢܵܫܵܐ،
ܘܒܲܪܢܵܫܵܐ ܕܵܐܟ݂ܝܼ ܦܲܪܡܹܐ ܐܘܼܪܚܹܗ؟
25ܢܸܫܒ݂ܵܐ ܝܠܹܗ ܠܒܲܪܢܵܫܵܐ ܕܡܲܠܝܸܙ ܠܸܢܕܵܪܵܐ ܠܩܘܼܕܫܵܐ،
ܘܒܵܬ݇ܪ ܕܥܒ݂ܵܕܬܵܐ ܕܢܸܕܪܹ̈ܐ ܨܲܚܨܹܐ ܥܲܠܲܝܗܝ.
26ܟܹܐ ܒܲܕܸܪܗܘܿܢ ܪ̈ܲܫܝܼܥܹܐ ܡܲܠܟܵܐ ܚܲܟܝܼܡܵܐ،
ܘܟܹܐ ܡܲܚܕܸܪ ܥܲܠܲܝܗܝ ܓܸܓ݂ܠܵܐ.
27ܫܪܵܓ݂݇ܝܵܐ ܕܡܵܪܝܵܐ ܝܠܵܗ̇ ܐܸܢܝܲܬ ܕܒܲܪܢܵܫܵܐ،
ܟܹܐ ܬܲܦ̮ܬܸܫܵܐ ܟܠܲܝܗܝ ܕܘܼܟܵܢܹ̈ܐ ܥܲܡܘܼܩܹ̈ܐ ܕܓܵܘܹܗ.
28ܫܵܦܵܩܲܬ ܘܫܪܵܪܵܐ ܟܹܐ ܢܵܛܪܝܼ ܠܡܲܠܟܵܐ،
ܘܟܘܼܪܣܝܹܗ ܟܹܐ ܣܵܢܹܕ ܒܫܵܦܵܩܲܬ.
29ܚܸܩܪܵܐ ܕܥܠܲܝܡܹ̈ܐ ܚܲܝܠܲܝܗܝ ܝܠܹܗ،
ܘܣܸܩܠܵܐ ܕܣܵܒܹ̈ܐ ܣܲܝܒܘܼܬܵܐ.
30ܡܚܵܝܵܬܹ̈ܐ ܕܲܪ̈ܒܸܢܵܢܹܐ ܟܹܐ ܡܵܪܩܝܼ ܠܵܗ̇ ܒܝܼܫܬܵܐ،
ܘܡܲܚܘܵܬܹ̈ܐ ܟܹܐ ܕܵܩܪܝܼ ܒܥܘܼܡܩܹ̈ܐ ܕܓܵܢܵܐ.
Currently Selected:
ܡܬܠ̈ܐ 20: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
