ܡܬܠ̈ܐ 11
11
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܡܲܣܲܐܝܵܬܹ̈ܐ ܦܠܝܼܡܹ̈ܐ ܛܲܡܐܘܼܬܵܐ ܝܢܵܐ ܠܡܵܪܝܵܐ،
ܐܝܼܢܵܐ ܡܲܬܩܵܠܵܐ ܬܪܘܼܨܵܐ ܨܸܒ݂ܝܵܢܹܗ ܝܠܹܗ.
2ܐܲܝܟܵܐ ܕܐܵܬܹܐ ܫܘܼܒ݂ܗܵܪܵܐ، ܟܹܐ ܐܵܬܹܐ ܐܘܼܦ ܒܘܼܨܵܪܵܐ،
ܐܝܼܢܵܐ ܥܲܡ ܡܲܟܝܼܟܹ̈ܐ ܐܝܼܬ ܚܸܟ݂ܡܬܵܐ.
3ܬܲܡܝܼܡܘܼܬܵܐ ܕܬܪ̈ܘܼܨܹܐ ܒܸܬ ܡܕܲܒܪܵܐ ܠܗܘܿܢ،
ܐܝܼܢܵܐ ܦܟ̰ܝܼܠܘܼܬܵܐ ܕܚܵܝܝܼܢܹ̈ܐ ܒܸܬ ܛܲܠܩܵܐ ܠܗܘܿܢ.
4ܥܘܼܬܪܵܐ ܠܲܝܬ ܠܹܗ ܝܘܼܬܪܵܢܵܐ ܒܝܵܘܡܵܐ ܕܟܲܪܒܵܐ،
ܐܝܼܢܵܐ ܙܲܕܝܼܩܘܼܬܵܐ ܟܹܐ ܦܲܨܝܵܐ ܡ̣ܢ ܡܵܘܬܵܐ.
5ܙܲܕܝܼܩܘܼܬܵܐ ܕܬܲܡܝܼܡܵܐ ܒܸܬ ܥܵܒ݂ܕܵܐ ܬܪܘܼܨܬܵܐ ܐܘܼܪܚܹܗ،
ܐܝܼܢܵܐ ܒܪܲܫܝܼܥܘܼܬܹܗ ܒܸܬ ܢܵܦܹܠ ܪܲܫܝܼܥܵܐ.
6ܙܲܕܝܼܩܘܼܬܵܐ ܕܬܪ̈ܘܼܨܹܐ ܒܸܬ ܦܲܨܝܵܐ ܠܗܘܿܢ،
ܐܝܼܢܵܐ ܚܵܝܝܼܢܹ̈ܐ ܒܫܲܗܘܲܬܬܲܝܗܝ ܒܸܬ ܦܵܝܫܝܼ ܕܒ݂ܝܼܩܹܐ.
7ܒܡܵܘܬܵܐ ܕܐ݇ܢܵܫܵܐ ܪܲܫܝܼܥܵܐ ܟܹܐ ܛܵܠܹܩ ܣܲܒ݂ܪܵܐ،
ܘܣܦܵܪܬܵܐ ܕܥܵܘܵܠܹ̈ܐ ܟܹܐ ܛܵܠܩܵܐ.
8ܙܲܕܝܼܩܵܐ ܡ̣ܢ ܐܘܼܠܨܵܢܵܐ ܟܹܐ ܦܵܐܹܫ ܦܘܼܨܝܵܐ،
ܐܝܼܢܵܐ ܒܫܵܘܦܹܗ ܟܹܐ ܥܵܒܹܪ ܪܲܫܝܼܥܵܐ.
9ܒܦܘܼܡܹܗ ܚܲܢܦܵܐ ܟܹܐ ܡܲܚܪܸܒ݂ ܠܚܲܒ݂ܪܹܗ،
ܐܝܼܢܵܐ ܙܲܕܝܼܩܹ̈ܐ ܒܝ݇ܕܲܥܬܵܐ ܟܹܐ ܚܵܠܨܝܼ.
10ܒܛܵܒ݂ܵܬܹ̈ܐ ܕܙܲܕܝܼܩܹ̈ܐ ܟܹܐ ܚܵܕܝܵܐ ܡܕܝܼܢ݇ܬܵܐ،
ܘܒܛܠܵܩܬܵܐ ܕܪ̈ܲܫܝܼܥܹܐ ܐܝܼܬ ܦܨܵܚܵܐ.
11ܒܒܘܼܪܟܬܵܐ ܕܬܪ̈ܘܼܨܹܐ ܟܹܐ ܪܵܝܡܵܐ ܡܕܝܼܢ݇ܬܵܐ،
ܐܝܼܢܵܐ ܒܦܘܼܡܵܐ ܕܪ̈ܲܫܝܼܥܹܐ ܟܹܐ ܦܵܝܫܵܐ ܬܠܝܼܚܬܵܐ.
12ܡܲܣܠܝܼܵܢܵܐ ܕܚܲܒ݂ܪܹܗ ܚܣܝܼܪ ܗܵܘܢܵܐ ܝܠܹܗ،
ܐܝܼܢܵܐ ܐ݇ܢܵܫܵܐ ܕܦܲܪܡܵܝܬܵܐ ܟܹܐ ܫܵܬܹܩ.
13ܗ̇ܘ ܕܚܵܕܹܪ ܒܸܕܪܵܝܵܐ ܒܘܼܚܬܵܢ ܟܹܐ ܓܵܠܹܐ ܐ݇ܪܵܙܵܐ،
ܐܝܼܢܵܐ ܡܗܘܼܡܢܵܐ ܒܪܘܼܚܹܗ ܟܹܐ ܟܲܣܹܐ ܚܲܒܪܵܐ.
14ܟܲܕ ܠܲܝܬ ܡܕܲܒܪܵܢܘܼܬܵܐ ܟܹܐ ܢܵܦܹܠ ܥܲܡܵܐ،
ܐܝܼܢܵܐ ܐܝܼܬ ܦܘܼܪܩܵܢܵܐ ܒܦܸܪܝܘܼܬܵܐ ܕܡܵܠܘܿܟܹ̈ܐ.
15ܒܸܬ ܩܲܒܸܠ ܒܝܼܫܬܵܐ ܗ̇ܘ ܕܗܵܘܹܐ ܥܲܪܵܒ݂ܵܐ ܠܢܘܼܟ݂ܪܵܝܵܐ،
ܐܝܼܢܵܐ ܗ̇ܘ ܕܣܵܢܹܐ ܥܲܪܵܒ݂ܘܼܬܵܐ ܐܲܡܝܼܢܵܐ ܝܠܹܗ.
16ܒܲܟ݂ܬܵܐ ܡܵܪܹܐ ܚܢܵܢܵܐ ܟܹܐ ܩܲܒܠܵܐ ܐܝܼܩܵܪܵܐ،
ܐܝܼܢܵܐ ܛܵܠܘܿܡܹ̈ܐ ܟܹܐ ܩܵܦܝܼ ܥܘܼܬܪܵܐ.
17ܟܹܐ ܩܵܢܹܐ ܦܘܼܪܥܵܢܵܐ ܠܓܵܢܹܗ ܐ݇ܢܵܫܵܐ ܕܫܵܦܵܩܲܬ،
ܐܝܼܢܵܐ ܟܹܐ ܚܲܙܕܸܓ ܠܦܲܓ݂ܪܹܗ ܐ݇ܢܵܫܵܐ ܛܵܠܡܵܢܵܐ.
18ܪܲܫܝܼܥܵܐ ܟܹܐ ܥܵܒܹܕ ܦܘܼܠܚܵܢܵܐ ܣܪܝܼܩܵܐܝܼܬ،
ܐܝܼܢܵܐ ܙܵܪܥܵܢܵܐ ܕܙܲܕܝܼܩܘܼܬܵܐ ܟܹܐ ܩܲܒܸܠ ܐܲܓ݂ܪܵܐ ܫܲܪܝܼܪܵܐ.
19ܗܲܕܟ݂ܵܐ ܙܲܕܝܼܩܘܼܬܵܐ ܟܹܐ ܠܲܒܠܵܐ ܠܚܲܝܹ̈ܐ،
ܐܝܼܢܵܐ ܢܵܦܠܵܢܵܐ ܒܵܬ݇ܪ ܒܝܼܫܬܵܐ ܟܹܐ ܐܵܙܹܠ ܠܡܵܘܬܹܗ.
20ܛܲܡܐܘܼܬܵܐ ܝܢܵܐ ܠܡܵܪܝܵܐ ܦܟ̰ܝܼܠܹ̈ܐ ܕܠܸܒܵܐ،
ܐܝܼܢܵܐ ܟܹܐ ܒܵܣܡܵܐ ܠܹܗ ܒܬܲܡܝܼܡܹ̈ܐ ܕܐܘܼܪܚܵܐ.
21ܗܘܝܼ ܚܵܬܸܪܓ̰ܲܡܥ، ܒܝܼܫܵܐ ܠܹܐ ܗܵܘܹܐ ܙܲܟܵܝܵܐ،
ܐܝܼܢܵܐ ܙܲܪܥܵܐ ܕܙܲܕܝܼܩܹ̈ܐ ܒܸܬ ܦܵܐܹܫ ܦܘܼܨܝܵܐ.
22ܐܲܝܟ݂ ܚܸܙܡܬܵܐ ܕܕܲܗܒ݂ܵܐ ܒܢܵܚܝܼܪܵܐ ܕܚܙܘܼܪܵܐ،
ܗܲܕܟ݂ܵܐ ܝܠܵܗ̇ ܒܲܟ݂ܬܵܐ ܫܲܦܝܼܪܬܵܐ ܕܠܲܝܬ ܠܵܗ̇ ܦܲܪܡܵܝܬܵܐ.
23ܫܲܗܘܲܬܬܵܐ ܕܙܲܕܝܼܩܹ̈ܐ ܐܲܚܟ̰ܝܼ ܛܵܒ݂ܬܵܐ ܟܹܐ ܡܲܝܬܝܵܐ،
ܐܝܼܢܵܐ ܣܲܒ݂ܪܵܐ ܕܪ̈ܲܫܝܼܥܹܐ ܟܲܪܒܵܐ.
24ܚܲܕ ܕܝܲܗ݇ܒܸܠ ܒܐܝܼܕܵܐ ܦܬܘܼܚܬܵܐ، ܟܹܐ ܡܲܙܝܸܕ،
ܘܗ̇ܘ ܕܚܵܣܹܟ݂ ܡ̣ܢ ܕܝܼܠܹܗ ܠܵܙܸܡ، ܟܹܐ ܡܵܛܹܐ ܠܡܸܣܟܹܢܘܼܬܵܐ.
25ܓܵܢܵܐ ܕܒܲܪܟ݂ܵܐ ܒܸܬ ܗܵܘܝܵܐ ܡܲܢܬܝܼܵܢܬܵܐ،
ܘܗ̇ܘ ܕܡܲܫܬܹܐ، ܐܘܼܦ ܗ̇ܘ ܒܸܬ ܦܵܐܹܫ ܡܘܼܫܬܝܼܵܐ.
26ܚܵܣܟ݂ܵܢܵܐ ܕܕܲܚܠܵܐ ܒܸܬ ܠܵܝܛܝܼ ܠܹܗ ܛܵܝܸܦܵܐ،
ܐܝܼܢܵܐ ܒܘܼܪܟܬܵܐ ܒܸܬ ܗܵܘܝܵܐ ܠܙܲܒܢܵܢܵܐ.
27ܩܲܕܡܵܢܵܐ ܕܛܵܒ݂ܬܵܐ، ܟܹܐ ܒܵܥܹܐ ܫܵܦܵܩܲܬ،
ܐܝܼܢܵܐ ܗ̇ܘ ܕܛܵܥܹܐ ܒܵܬ݇ܪ ܒܝܼܫܬܵܐ، ܒܸܬ ܐܵܬܝܵܐ ܥܲܠܘܼܗܝ.
28ܣܵܒܪܵܢܵܐ ܒܥܘܼܬܪܹܗ ܒܸܬ ܢܵܦܹܠ،
ܐܝܼܢܵܐ ܙܲܕܝܼܩܹ̈ܐ ܒܸܬ ܒܲܪܛܸܢܝܼ ܐܲܝܟ݂ ܛܲܪ̈ܦܹܐ.
29ܚܲܙܕܸܓܵܢܵܐ ܕܒܲܝܬܹܗ ܒܸܬ ܝܵܪܹܬ ܦܵܘܚܵܐ،
ܘܣܲܟ݂ܠܵܐ ܒܸܬ ܗܵܘܹܐ ܪܹܓܵܐ ܠܚܲܟܝܼܡܵܐ ܕܠܸܒܵܐ.
30ܛܥܘܼܢܬܵܐ ܕܙܲܕܝܼܩܵܐ ܐܝܼܠܵܢܵܐ ܕܚܲܝܹ̈ܐ ܝܠܵܗ̇،
ܘܦܲܪܩܵܢܵܐ ܕܓܵܢܵܬܹ̈ܐ ܚܲܟܝܼܡܵܐ ܝܠܹܗ.
31ܐܸܢ ܙܲܕܝܼܩܵܐ ܒܐܲܪܥܵܐ ܦܵܐܹܫ ܦܪܝܼܥܵܐ ܛܵܒ݂ܬܵܐ،
ܟܡܵܐ ܒܘܼܫ ܙܵܘܕܵܐ ܪܲܫܝܼܥܵܐ ܘܚܲܛܵܝܵܐ ܒܸܬ ܩܲܒܸܠ ܬܲܥܠܲܡܬܵܐ.
Currently Selected:
ܡܬܠ̈ܐ 11: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
