ܩܘܗܠܬ 5

ܙܕܸܥ ܡ̣ܢ ܐܲܠܵܗܵܐ ܘܢܛܘܿܪ ܢܸܕܪ̈ܘܼܟ݂

1ܢܛܘܿܪ ܐܲܩܠܘܼ̈ܟ݂ ܟܲܕ ܐܵܙܹܠ݇ܬ ܠܒܹܝܬ ܐܲܠܵܗܵܐ، ܘܩܲܪܒܲܢܬܵܐ ܠܸܫܡܵܥܵܐ ܒܘܼܫ ܨܦܵܝܝܼ ܝܠܵܗ̇ ܡ̣ܢ ܠܝܼܵܗ݇ܒ݂ܵܐ ܕܸܒ݂ܚܵܐ ܕܣܲܟ݂ܠܹ̈ܐ، ܣܵܒܵܒ ܠܹܐ ܝܢܵܐ ܒܝܼܕܵܥܵܐ ܕܒܸܥܒ݂ܵܕܵܐ ܝܢܵܐ ܒܝܼܫܬܵܐ. 2ܠܵܐ ܡܲܠܝܸܙܸܬ ܒܦܘܼܡܘܼܟ݂، ܘܠܸܒܘܼܟ݂ ܠܵܐ ܡܲܠܝܸܙ ܠܦܲܠܘܼܛܹܐ ܚܲܒܪܵܐ ܩܵܕ݇ܡ ܐܲܠܵܗܵܐ، ܣܵܒܵܒ ܐܲܠܵܗܵܐ ܒܫܡܲܝܵܐ ܝܠܹܗ، ܘܐܲܢ݇ܬ ܥܲܠ ܐܲܪܥܵܐ، ܘܒܘܼܬ ܐܵܗܵܐ ܗܵܘܝܼ ܚܲܒܪ̈ܵܢܘܼܟ݂ ܚܲܕ݇ܟ̰ܵܐ، 3ܣܵܒܵܒ ܟܹܐ ܐܵܬܹܐ ܚܸܠܡܵܐ ܒܟܸܟ̰ܚܵܐ ܪܵܒܵܐ، ܘܩܵܠܵܐ ܕܣܲܟ݂ܠܵܐ ܒܚܲܒܪ̈ܵܢܹܐ ܪܵܒܵܐ.

4ܟܲܕ ܢܵܕܪܹܬ ܢܸܕܪܵܐ ܠܐܲܠܵܗܵܐ، ܠܵܐ ܥܲܪܩܸܠܸܬ ܠܬܲܡܘܼܡܹܗ، ܣܵܒܵܒ ܠܲܝܬ ܠܹܗ ܒܘܼܣܵܡܵܐ ܒܣܲܟ݂ܠܹ̈ܐ. ܡܸܢܕܝܼ ܕܢܵܕܪܹܬ ܬܲܡܸܡ! 5ܒܘܼܫ ܨܦܵܝܝܼ ܝܠܵܗ̇ ܕܠܵܐ ܢܵܕܪܹܬ، ܡ̣ܢ ܕܢܵܕܪܹܬ ܘܠܵܐ ܬܲܡܸܡܸܬ. 6ܠܵܐ ܝܵܗ݇ܒܹܬ ܦܘܼܡܘܼܟ݂ ܠܡܲܚܛܘܼܝܹܐ ܐܸܠܘܼܟ݂، ܘܠܵܐ ܐܵܡܪܹܬ ܩܵܕ݇ܡ ܐܝܼܙܓܲܕܵܐ ܕܚܸܠܛܵܐ ܝܗ݇ܘܵܐ. ܩܵܡܘܿܕܝܼ ܟܵܪܹܒ ܐܲܠܵܗܵܐ ܥܲܠ ܩܵܠܘܼܟ݂، ܘܡܲܚܪܸܒ݂ ܠܥܒ݂ܵܕܵܐ ܕܐܝܼܕܵܬܘܼ̈ܟ݂؟ 7ܣܵܒܵܒ ܒܦܸܪܝܘܼܬܵܐ ܕܚܸܠܡܵܢܹ̈ܐ ܘܚܲܒܪ̈ܵܢܹܐ ܪܵܒܵܐ ܐܝܼܬ ܣܪ̈ܝܼܩܘܼܝܵܬܹܐ، ܐܝܼܢܵܐ ܡ̣ܢ ܐܲܠܵܗܵܐ ܙܕܸܥ.

ܫܘܼܠܛܵܢܵܐ ܕܛܠܘܼܡܝܵܐ

8ܐܸܢ ܛܠܘܼܡܝܵܐ ܕܡܸܣܟܹܢܵܐ ܘܚܛܘܼܦܝܵܐ ܕܕܝܼܘܵܢܲܝܗܝ ܘܗܵܩܘܼܬܲܝܗܝ ܚܵܙܹܝܬ ܓܵܘ ܡܕܝܼܢ݇ܬܵܐ، ܠܵܐ ܥܲܓ̰ܒܸܬ ܒܐܵܗܵܐ، ܣܵܒܵܒ ܥܸܠܵܝܵܐ ܥܲܠ ܥܸܠܵܝܵܐ ܟܹܐ ܡܕܲܒܸܪ، ܘܐܝܼܬ ܒܘܼܫ ܥܸܠܵܝܹ̈ܐ ܡܸܢܲܝܗܝ. 9ܘܝܘܼܬܪܵܢܵܐ ܕܐܲܪܥܵܐ ܒܟܠ ܝܼܠܹܗ، ܡܲܠܟܵܐ ܠܚܲܩܠܹܗ ܟܹܐ ܦܵܐܹܫ ܥܒ݂ܝܼܕܵܐ ܚܸܠܡܲܬ.

ܥܘܼܬܪܵܐ ܣܪܝܼܩܘܼܬܵܐ ܝܠܹܗ

10ܡܲܚܸܒܵܢܵܐ ܕܙܘܼܙܵܐ ܠܹܐ ܣܵܒܹܥ ܡ̣ܢ ܙܘܼܙܵܐ، ܘܡ̇ܢ ܕܡܲܚܸܒ ܥܘܼܬܪܵܐ، ܠܹܐ ܣܵܒܹܥ ܡ̣ܢ ܡܲܗܨܘܼܠ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇. 11ܟܲܕ ܙܵܝܕܝܼ ܒܘܼܪ̈ܟܵܬܹܐ ܟܹܐ ܙܵܝܕܝܼ ܐܵܟ݂ܠܵܢܲܝ̈ܗܝ. ܘܡܘܿܕܝܼ ܝܠܹܗ ܝܘܼܬܪܵܢܵܐ ܠܡܵܪ̈ܵܘܵܬܲܝܗܝ، ܫܒ݂ܘܿܩ ܡ̣ܢ ܚܙܵܝܬܵܐ ܒܥܲܝܢܲܝ̈ܗܝ؟ 12ܚܠܝܼܬܵܐ ܝܠܵܗ̇ ܫܸܢܬܵܐ ܕܦܲܠܵܚܵܐ، ܐܸܢ ܚܲܕ݇ܟ̰ܵܐ ܝܲܢ ܐܸܢ ܪܵܒܵܐ ܐܵܟܹܠ، ܐܝܼܢܵܐ ܣܒ݂ܵܥܬܵܐ ܕܥܲܬܝܼܪܵܐ ܠܹܐ ܫܵܒ݂ܩܵܐ ܠܹܗ ܠܸܕܡܵܟ݂ܵܐ.

13ܐܝܼܬ ܒܝܼܫܬܵܐ ܕܲܪܕܲܢܬܵܐ ܕܚܙܹܐ ܠܝܼ ܬܚܘܿܬ ܫܸܡܫܵܐ: ܥܘܼܬܪܵܐ ܢܛܝܼܪܵܐ ܩܵܐ ܡܵܪܹܗ ܠܒܝܼܫܬܹܗ. 14ܘܛܠܝܼܩ ܠܹܗ ܗ̇ܘ ܥܘܼܬܪܵܐ ܒܟܸܟ̰ܚܵܐ ܩܸܫܝܵܐ، ܘܡܘܼܠܸܕ ܠܹܗ ܒܪܘܿܢܵܐ، ܘܠܲܝܬ ܒܐܝܼܕܹܗ ܡܸܢܕܝܼ. 15ܕܵܐܟ݂ܝܼ ܕܦܠܝܼܛ ܠܹܗ ܫܘܼܠܚܵܝܵܐ ܡ̣ܢ ܒܲܛܢܵܐ ܕܝܸܡܹܗ، ܒܸܬ ܕܵܐܹܪ ܠܹܐܙܵܠܵܐ ܐܲܝܟ݂ ܕܐ݇ܬܹܐ ܠܹܗ، ܘܡܸܢܕܝܼ ܠܹܐ ܫܵܩܹܠ ܡ̣ܢ ܥܲܡܠܹܗ ܕܐܵܙܹܠ ܒܐܝܼܕܹܗ. 16ܘܐܘܼܦ ܐܵܗܵܐ ܒܝܼܫܬܵܐ ܕܲܪܕܲܢܬܵܐ ܝܠܵܗ̇: ܟܠ ܕܵܐܟ݂ܝܼ ܕܐ݇ܬܹܐ ܠܹܗ ܗܲܕܟ݂ܵܐ ܒܸܬ ܐܵܙܹܠ، ܘܡܘܿܕܝܼ ܝܘܼܬܪܵܢܵܐ ܐܝܼܬ ܠܹܗ ܕܥܵܒܹܕ ܥܲܡܠܵܐ ܠܦܵܘܚܵܐ؟ 17ܐܘܼܦ ܟܠܲܝܗܝ ܝܵܘܡܵܢܘܼ̈ܗܝ ܒܚܸܫܟܵܐ ܟܹܐ ܐܵܟܹܠ، ܘܒܟܲܪܒܵܐ ܪܵܒܵܐ ܘܒܟܘܼܪܗܵܢܵܐ ܘܒܚܸܡܬܵܐ.

ܡܵܘܗܲܒ݂ܬܵܐ ܕܐܲܠܵܗܵܐ ܝܠܵܗ̇ ܕܐ݇ܢܵܫܵܐ ܚܵܕܹܐ ܒܛܥܘܼܢܬܵܐ ܕܥܲܡܠܹܗ

18ܗܵܐ، ܡܸܢܕܝܼ ܕܚܙܹܐ ܠܝܼ ܐܵܢܵܐ ܛܵܒ݂ܵܐ ܘܫܲܦܝܼܪܵܐ، ܠܹܐܟ݂ܵܠܵܐ ܘܠܸܫܬܵܝܵܐ ܘܠܸܚܙܵܝܵܐ ܛܵܒ݂ܬܵܐ ܒܟܠܹܗ ܥܲܡܠܹܗ ܕܥܒ݂ܝܼܕ ܠܹܗ ܬܚܘܿܬ ܫܸܡܫܵܐ، ܒܡܸܢܝܵܢܵܐ ܕܝܵܘܡܵܢܹ̈ܐ ܕܚܲܝܘܼ̈ܗܝ ܕܝܘܼܗ݇ܒܸܠ ܠܹܗ ܐܸܠܹܗ ܐܲܠܵܗܵܐ، ܣܵܒܵܒ ܗ̇ܘ ܝܼܠܹܗ ܣܵܗܡܹܗ. 19ܐܘܼܦ ܟܠ ܐ݇ܢܵܫܵܐ ܕܝܘܼܗ݇ܒܸܠ ܠܹܗ ܐܸܠܹܗ ܐܲܠܵܗܵܐ ܥܘܼܬܪܵܐ ܘܕܵܘܸܠܬܵܐ، ܘܩܲܡ ܝܲܗ݇ܒܸܠ ܠܹܗ ܫܘܼܠܛܵܢܵܐ ܠܹܐܟ݂ܵܠܵܐ ܡܸܢܲܝܗܝ، ܘܠܩܲܒܘܼܠܹܐ ܣܵܗܡܹܗ، ܘܠܸܚܕܵܝܵܐ ܒܥܲܡܠܹܗ؛ ܐܵܗܵܐ ܡܵܘܗܲܒ݂ܬܵܐ ܕܐܲܠܵܗܵܐ ܝܠܵܗ̇. 20ܣܵܒܵܒ ܠܹܐ ܪܵܒܵܐ ܕܵܟܹܪ ܝܵܘܡܵܢܹ̈ܐ ܕܚܲܝܘܼ̈ܗܝ، ܣܵܒܵܒ ܐܲܠܵܗܵܐ ܟܹܐ ܓ̰ܲܘܸܒ ܠܹܗ ܒܚܲܕܘܼܬܵܐ ܕܠܸܒܹܗ.

Currently Selected:

ܩܘܗܠܬ 5: ABTAB

Highlight

Copy