Romanyon 4

Patron Abraham

1Pandr'a leveryn ytho y hwrug Abraham y gavoes, agan hendas war-lergh an kig? 2Rag mar peu Abraham justifiys der oberow, ev a'n jeves bostya, marnas a-rag Duw. 3Rag pandr'a lever an skryptor? ‘Abraham a fydhyas yn Duw ha homm o akontys dhodho avel ewnder.’ 4Lemmyn dhe neb a lavur nyns yw an gober reknys avel ro mes avel kendon. 5Ha dhe neb na lavur mes neb a drest ynno ev neb a justifi an den ongrassyes, y reknir y fydh avel ewnder. 6Yndella Davydh a gews a vennesikter an den neb yw reknys ewn gans Duw heb oberow:

7‘Gwynnvys an re gevys dhedha aga hammweythyow

ha kudhys aga feghosow;

8gwynnvys an gour ma na reken an Arloedh y begh er y bynn.’

9Yw an vennath ma war an re drodreghys, po war an re na's teves an trodreghyans ynwedh? Ni a lever, ‘Fydh Abraham a veu akontys avel ewnder.’ 10Fatell veu reknys ytho? A veu ev trodreghys po na? Ny veu trodreghys hwath, mes antrodreghys. 11Ev a'n jeva an tokyn a drodreghyans a-wosa, sel a'n ewnder a'n jevo seulabrys dre fydh hag ev hwath antrodreghys; may fo gwrys tas peub eus ow krysi kyn fo antrodreghys; may fo ewnder akontys dhedha i ynwedh. 12Hag yndella ev yw tas an re trodreghys, an re nag yns unnsel trodreghys, mes ynwedh ymons ow kerdhes yn olow fydh agan tas ni Abraham kyns ev dhe vos trodreghys.

An Ambos Kowlwrys dre Fydh

13Rag ny dheuth der an lagha an ambos dhe Abraham ha'y henedh y fedha ev her an bys mes der ewnder an fydh. 14Rag mara pydh an re a hol an lagha heryon, fydh yw gwag ha'n ambos re beu distruys. 15Rag an lagha a wra konnar, mes le nag eus lagha nyns eus torrva-lagha.

16Ytho an ambos a dheu dhiworth fydh, may fo dre ras ha may fo surhes dhe oll y dhiyskynnysi – na vo unnsel dhe'n re a hol an lagha mes ynwedh dhe'n re usi a fydh Abraham, neb yw tas dhyn ni oll. 17Dell yw skrifys, ‘My re'th wrug tas kenedhlow pals’ – a-rag an Duw may fydhyas ynno, neb a re bewnans dhe'n re varow hag a elow dhe vosva an taklow na's teves bosva. 18Neb a grysi yn govenek dres govenek y to ha bos ‘an tas dhe genedhlow pals’, dell via leverys, ‘Yndella y fydh dha henedh.’ 19Ha nyns esa ow kwannhe yn fydh pan brederi y farwsa y gorf y honan#4:19 y gorf y honan: War-lergh re a'n dornskrifow y gorf y honan seulabrys. drefenn ev dhe vos a-dro dhe gans bloedh, po pan brederi y farwsa torr Sara. 20Ny'n gwre diskryjyans vyth mayth hokya a-dro dhe ambos Duw, mes y feu krevhes y'n fydh ow kormel Duw, 21hag ow pos sur y hylli Duw gul an pyth re ambossa. 22Dredhi ynwedh ‘Rakhenna y feu akontys dhodho avel ewnder.’ 23Mes ny veu an geryow, ‘y feu akontys dhodho’ skrifys unnsel ragdho ev, 24mes ragon ni ynwedh. Akontys vydh dhyn ni hag a fydh ynno ev neb a dhrehevis Yesu agan Arloedh dhiworth an re varow, 25neb a veu res dhe'n mernans drefenn agan drogoberow ha drehevys rag may fen ni kevys ewn.

Currently Selected:

Romanyon 4: ABK

Highlight

Copy

Compare