MATHAI 24
24
Kellumki Tew’nsiarabe Rasam Isua ne Sabe
(Mrk 13.1-2; Luk 21.5,6)
1Kellumki tewgaibe ramme Isua je kechiaulia gai ra pe gu kenieme wang dege, Isua â kellumki put kai nan ze tat ti de lei. 2Kane pa ne penui je kak ze, “Airamme leine ningnui ngau kam lei, ningnui ngau mak mei? Pelingsing I ningnui je rang lei, aize tingchukâng kâng katte pebâm ge bam ra mak lei; chiramme pelane tuâkeu kam gu lei,” kacheu de lei.
Kahereube ramme benai Tewsabe ramme
(Mrk 13.3-13; Luk 21.7-19)
3Zai pa Olib loa ge ’ntau lage, kenieme pe dage wang lu, reine ze, “Airamme ’ndaitewbe ting ne chang ra lau, zai nang wangkeube mai benai kedeirei beting ga ra dezai ’ndaikau dak ka’nchetbe tewlia ra lau?” ze penui ka’nneu lei. 4Dadege Isua ne penui je kak ze, “Mi-mige ne ningnui je ngualietatrabe je ’ntîng le lau. 5Misonggame ne ‘I Krista lei,’ ze a ji gene pat kû daseu, zai misonggame je penui ne ngualietat ku lei. 6Zai kahereibe rasam ramme benai herei rasam ramme ningnui seu gu lei; ningnui lung keheu mak ra hangge ’ntîng le lau; airamme â wangchang himchang gu lei, kane betun â mak kerei lei. 7Zai hezat ne hezat ’nggi gu, zai heguangram ne heguangram ’nggi gu, zai pebâm gechâm-châmbe ge herakûm ramme, zai kedei-kaketeibe peranchibe ramme wang gu lei: 8airamme leine ze â hereulierabe pîbang putchube runne rei de lei.
9“Chidezai ningnui je tewsâ ra hangge penui ne peipat kai gu, zai ningnui je tewchat ku lei; zai a ji gene pezat leine ne ningnui je ngaugailak ku lei. 10Chidezai â misonggame ne kâukeu du, zai kat-kat je heteurei kau ba ge pei gai gu, zai kat-kat je ngaugailak ku lei. 11Zai kemeu karasame misongga pat ze ziemmena misonggame je penui ne ngualietat tu lei. 12Zai helungriaksiabe pung-ze-sadibe ziegene misonggame ne kehungbe hegeikeu du lei. 13Kane betun chang ze lielube kau je â tew’nring gai bu lei. 14Zai aipau heguangram gu gospel ze kedeirei pauruatui gai gu, zai pezat leine hangge sakki chang gu lei; dezai betun wangchang gu lei.
Ngauhingbe Miduânggabe
(Mrk 13.14-23; Luk 21.20-24)
15“Chidaze chi kemeu’mpeu Danielbe ne sabe, Mi duânggabe mi ngaukateruibe ze pebâm ka’nchibe ge sapbe ningnui ngau dezai, (peize gekiâme ne ’nningchi le lau), 16Judia ge bamme je peize peloa kehu ’mbe pak kai de lau; 17zai heki’mpûm ge bambe kau ne pe kilûng ge merua ramme lu ra peize wangkeu se lau; 18zai helu ge bambe kau je pe paînî lu ra peize wang dai se lau. 19Zai chipau ting ge penui pumritme zai hena puatungme â penui duângga-desang gu de lei! 20Hetating (kahegeibe ting) ge mei, nune ’ntakbambe mai ge mei ge ningnui pakbe chang mak ra kellum lau. 21Zai chipau ting ge â hereu-desang gu de lei, chigumbe herêu â kedei ’ndamchube gene seu ze chuna ting chang ze wang gai mak kerei lei, zai mâtew-tewsedu chigumbe zat wang de wang dai ra mak daseu. 22Zai chipau ting ze tew’ndui ’nde makchaine â ziemmena mige de ringpat le ra mak lei; kane kelânglume hang ziegene chipau ting ze tew’ndui gai bu lei. 23Chidaze mige ne ningnui je, ‘Ni, Krista aige la de lei,’ ze mei nune ‘Wîge ni’ ze acheu leusedu chize ’nnum’mmi se lau. 24Chang dui zai â kelânglume je du ngualietat ’nde ra hangge Krista karasa kau ramme benai kemeu karasa kau ramme pat ze dakka’nchetbe kedibe ramme benai ningdaulakbe ramme teilia gu lei. 25Ni, ningnui je I rang’ntua bei de lei. 26Chigum ze penui ne ningnui je, ‘Ni, hênamkang ge pa la lei,’ ze acheu dizai â, hela pat se lau; zai, ‘Pie le lau, hekilung nuksing ge pa la lei,’ ze penui ne acheu dizai â, chize ’nnum’mmi se lau. 27Tingkakepitbe tingbia ’mbene kepitpat ze tingrun bachang gum ze, ziemmena Na wangkeube du chigum gu lei. 28Herum bambe bâm ge lawai ramme wang’ndui gu lei.
Ziemmena Na Wangkeube
(Mrk 13.24-27; Luk 21.25-28)
29“Chipau ting gu kahereube kamgapkailube châng dezai tingnaimik muî du, zai hekêu ne pa’mbi pei ra mak, zai tinggîm ’mbene hegi ramme ’ngngaîkeu gu, zai tingkehube gu reziechibe ramme ze gechuî’ngngai gai gu lei; 30chidezai ziemmena Na gu dakka’nchetbe ze tinggîm ge liâ gu, chidezai kedeirei ge pezat leine ne hapdesui gu lei, zai ziemmena Na ze reziechibe benai pengêudibe gene tinggîm kemâu ramme gene wangkeube penui ngau gu lei; 31dezai hegeîluîkie kûbe kuâ gechibe gene pa ne pe gu angelme je kedeirei mik medai ge langpat ku lei, zai penui ne pe gu kelânglunme je kedeirei mik na lam gene nguawang’ndui gai gu lei.
’Mbeuchîbang gu gene Mâgeteiliabe
(Mrk 13.28-31; Luk 21.29-33)
32“’Mbeuchîbang gene aipau gu sam’nda ze chî le lau: bekeî ge pesûne tumpat ze peneu ramme pat dezai hepuakting na de lei be ningnui chî le lau. 33Chigum ze ningnui airamme leine ngau dezai pa â na da lei be zai kemui hiage la de lei be chî le lau. 34Pelingsing ze ningnui je I rang lei, airamme leine wangchang kam mak tâne hênai rehei ga ra mak lei. 35Ting benai kedei â ga gu, kane a sam ramme â ga ra mak lei.
Beting-pehî Mî de Chimakbe
(Mrk 13.32-37; Luk 17.26-30,34-36)
36“Kane chipau tingnaimikpui benai chipau hî ze â mî de chî me lei, tinggîm angelme ’nsangnedu zai Pe Na ’nsangnedu chî me lei, kane Bepeu runne chi lei. 37Noabe ting ge gum ze, ziemmena Na wangkeu beting ge du chigum gu lei. 38Hedui naîwang makge Noabe ’nneiki ge gutbe naimikpui chang ze penui teu ze sak, zai henâukû, zai henâu kai ze bam lei, 39hedui naîwang ze penui ’nteumena je teitat te mak tâne penui chî mak ze bam lei; ziemmena Na wangkeube ge du chigum gu lei. 40Dezaine helu ge hangna bam gu lei; hangkat je nguatat tu, zai hangkat je sâudiak kai gu lei. 41’Mpuimi hangna chêuniakbe bâm ge chêuniak ze bam gu, zai hangkat je nguatat tu, zai hangkat je sâudiak kai gu lei. 42Chidaze ’ntîngkua ze bam lau, ’ndaitewbe mai ningnui Wangpeu wang gu mei be ningnui chî mak daseu. 43Aize chî le lau, tingmuî ge ’ndaitewbe hî ge mâ-kahegapeu wang ra mei be pa’mpaupeu chî lu laîzai â pa reî ’ndu lei; zai pe ki riputgut ra pa lun ra mak lei. 44Chidaze ningnui du kedâkua sing ra lei, ningnui ’nnummakbe hî ge ziemmena Na â wangkeu gu daseu.
Tâka’ngguame Lungsangtewbe benai Lungsangtewmakbe
(Luk 12.41-48)
45“Chidaze châu zene, heki’mpaupeu ne kilûngkang ge penui je mâ-teu ra pehî-hî ge pei ra sumgaibeibe chi lungsangtewbe benai kaningchingbe ne tâka’ngguapeu lau? 46Pe Wangpeu wangbe luage aigum tâ’nggua ze bambe pa ne ngaube ka’ngguapeu ze yi de lei. 47Pelingsing ze ningnui je I rang lei, pe gu kebambe leine peireige besuitewpeu hangge pechu pa sum gai lei. 48Kane tâka’ngguapeu helungriaksiabe kau ne pe runne pechu ’mpau ze, ‘A Wangpeu wang ra mak kerei lei,’ ze ’nning lu ze, 49tâka’ngguame pa nguatâtewme je lakgetie, zai kameneume je pa nguateu-nguasak ze bam dizai â, 50pa ’nnummakbe mai, zai pa chimakbe hî ge chi tâka’ngguapeu Wangpeu ze wang gu lei, 51zai pechu tewsâ gu zai pa tâtewbe hî luigum ze pechu du helunglimpungme ruage kai gu lei; zai chige ziemmename hap ze hegeukegit ze bam gu lei.
Currently Selected:
MATHAI 24: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
