MATHAI 23
23
Hingde Geteiliame benai Pharisaime je Isua ne ’Ntîng ra rangbe
(Mrk 12.38,39; Luk 11.43,46; 20.45-46)
1Dadege Isua ne baudime benai pe gu kenieme dage salia ze, 2“Leisirawme benai Pharisaime â Mosabe bâm ge ’ntau-tau lei; 3chidaze penui ne ningnui je rangbe leine tewheli ze pie’mmi lau, kane penui tewgumbe â tew se lau; penui â sa lu tew mak daseu. 4Penui ne heput keritbe ramme, pungtatlakbe pi lu ziemmename keîtoa ge kai kai lei; kane penui sing ne â penui bakêrang kat du deîgaihâ mak lei. 5Penui tâtewbe leine ziemmename ngau ra runne tew tew lei; zai penui gu hingde sam rawgaibe kaibe mâ-bungpoine penui pum ge reupungbe mei ze tew’ndi zai penui paîri ze tewka’ntie lei, 6zai luube-bâm ramme ge pengêudibe benai ka’nduibeki ramme ge bâm yilangbe ramme ze ka’nchâ lei, 7zai hechaiki ramme ge miramme ne penui je heba ne kakellumbe zai miramme ne penui je rabbi ze kûbe ze penui ka’nchâ lei. 8Kane ningnui je â rabbi ze peize kû me ra de lei, ningnui dage geteiliapeu hangkat la daseu, zai ningnui â ’nteumena besikina kam lei. 9Zai kedeirei ge mî je de ningnui peu ze kû se lau, ningnui â ningnui peu hang kat tinggîm ge bampeu la daseu. 10Ningnui je kanguapeu ze du peize kû se lau, ningnui hang â Krista, kanguapeu hangkat la daseu. 11Ningnui ruage dilangbepeu ne ningnui guâ ka’ngguapeu chang ra lei; 12mi-mige de pe runne pechu suanggaibe kau je â tei’nnakeu gai bu lei, zai mi-mige de pe runne pechu tei’nnakeube kau je â suang gai bu lei.
Helunglimpungbe peireige Saka’nsiabe
(Mrk 12.40; Luk 11.39-42,44,52; 20.47)
13“Kane leisirawme benai Pharisaime, ningnui helunglimpungme nung gau, ningnui duângga gu lei! Ningnui ne ziemmename je tinggîm heguangram nam’ndibe ziegeneu, zai ningnui du gut mak, zai miramme je du ningnui ne gut ra nam ’ndi daseu. 14Leisirawme benai Pharisaime helunglimpungme gau, ningnui duângga gu lei! Kemîpuime ki gu kemakteu kam lu ze pahelî ne kellumtiebe ziegeneu; chipauziegene ningnui ’ngkui-ka’ndibe ngau gu lei. 15Leisirawme benai Pharisaime helunglimpungme gau, ningnui duângga gu lei! hangkat je herasie ge teigut kai ra hangge sungkling tatka, zai kedei ge ningnui tatrua, zai herasie ge gut bei dege â pechu ningnui gene dêt na kaisuâ ze gehenna chang ra ningnui ne tewgaibeibe ziegeneu.
16“Ningnui kanguame mikchitme gau, ‘Mi-mige ne kellumki ji gene deseu dizai â, chize mâ de ga lei; kane kellumki gu gechâk ji gene deseu dizai â, pa kadeseube zene pechu pi ’ndi de lei’ kacheume gau, ningnui duângga gu lei. 17Ningnui kemieme mikchitme gau! ’Ndaibe ze di lau, gechâk mei nune gechâk tew’nchigaibe kellumki ze lau? 18Zai ningnui ne, ‘Mi-mige ne, herâtewbe-kaira ji ne deseu dizai â, mâ de mak lei, kane mi-mige ne herâtewbe-kaira ge kela bambe ji gene deseu dizai â, pa kadeseube zene pechu pi ’ndi de lei,’ ze kacheu de lei. 19Ningnui mikchitme gau! ’Ndaibe ze di lau, kela mei, nune chi kela tew’nchigaibe herâtewbe-kaira ze lau? 20Chigum ze herâtewbe-kaira ji gene kadeseube kau â chi herâtewbe-kaira benai bepeirei ge bambe leine ji ne kadeseu de lei; 21zai kellumki ji gene kadeseube kau â chi kellumki benai chige bambepeu ji gene kadeseu de lei; 22zai tinggîm ji gene kadeseube kau â Hera bâmrak benai chige ka’ntaupeu ji gene kadeseu de lei.
23“Leisirawme benai Pharisaime helunglimpungme gau, ningnui duângga gu lei! nampelane, bakut zai zira ramme gene kereu ge kat ningnui kai lu ze hingdechukbe ramme, pelingtewbe, ka’nggiabe, keneibe je ningnui ’nningkelam di zeu; airamme ningnui tew sing ra yi lei, kêdabe ramme ze du ’nningkelam mak zeu. 24Ningnui kanguame mikchitme, tinghebe je singtua lu, put-hu je ’nzuakeulume gau?
25“Ningnui leisirawme benai Pharisaime, helunglimpungme nung gau, ningnui duângga gu lei! ningnui ne hepiak benai hekuak hela hui lu kane pe lung ge â chiramme ze sutteube benai kadekumbe ne pui daseu. 26Nang Pharisai’mpeu hemikchitbe kau gau! hepiak benai hekuak pelung hui’nchirai ne lau, dezai hela du ’nchi gu lei.
27“Leisirawme benai Pharisaime ningnui helunglimpungme gau, ningnui duângga gu lei! ningnui â heraw ze hela â ’nnukhâlube ngauyibe, kane pelung ge ziemmena kechaime ra ramme, zai kahebâbe zat leine ne puigit bambe gum daseu. 28Chigum ze ningnui du hela ziemmena mikngau ge â kapelingme gum chang lei, kane ningnui lung ge â helunglimpungbe benai helungriaksiabe ne pui ze bam lei.
Penui je Deisâ ra Isua ne Rangka’ntuabe
(Luk 11.47-51)
29“Leisirawme benai Pharisaime ningnui helunglimpungme nung gau, ningnui duângga gu lei! ningnui ne kemeume raw ramme kua gai, zai katelingme gu tingchusum ramme bepuâ teleu’mmi ze, 30‘Anui â anui peume ting ge lung ze bam di laîzai â, penui kemeume jai tewpatme ruage kebut ra mak lei,’ ze ningnui kacheu daseu. 31Chigum ze ningnui â kemeume je kegîme name lei be ningnui runne ningnui je aigum ze sakkitew de lei. 32Chidaze ningnui paume ne ’ndetkai’ndibe tâ ze ningnui tewpui ze bam de zu lau. 33Ningnui henêu ramme, henêu chaname nung gau, gehenna ge ningnui gut ra hang tew’ngkuigai’ndibe gene ’ndaigum ze ningnui ’mbiachi le ra lau? 34Chipauziegene ningnui dage kemeume, kaningchingme zai leisirawme je I lang gai de lei, zai hanggesame je ningnui ne tewchat ku, zai hanggesame je â gia gai gu, zai hanggesame je â ningnui ka’nduibeki ge hemeigeiria ne kegit ku lei, zai namdi ’nsangne ge penui je tewsabe bam gu lei, 35dezaine pemâugapeu Abelbe jai gene chu ze herâtewbe-kaira benai kakellumbe-paîki gene gîchatkai’ndibe Barakiabe na Zekariabe jai riâ chang ze kedeirei ge kapelingme leine jai patkai’ndibe ze ningnui peireige wang gai ra hangge zeu. 36Pelingsing ze ningnui je I rang lei, airamme leine henai reheime peireige wangchang gu lei.
Jerusalem je Isua Hungbe
(Luk 13.34,35)
37“Hei Jerusalem, Jerusalem, nang kemeume je tewchat ze ning dage langgaime je tingchu ne tuâchatbe kau gau! ’Nruipui ne pe poine ramme je gekumwang lu ze, pe kan kangge ka’nggumbe gum ze lua ’ndaikie I ne ning name je kebau’ndui gai bei lau? Kane nang nei mak taibe zeu! 38Pie le lau, ningnui ki hammuî ze sâu gai ’nde lei. 39Ningnui je I rang lei, ‘Tingwang ji gene wangkeupeu je peize yi lau,’ ze ningnui acheu mak tâne â ningnui ne achu ngau dai ra mak lei,” ze kacheu de lei.
Currently Selected:
MATHAI 23: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
