JOEL 2
2
Tîngkau zene Tingwang gu Naimikpui Wang ra Teiliaka’ntuabe
1Zaion ge hegeîluîkie ’mmut kai zu lau;
zai a gu ka’nchibe deiloa ge ’ntîngrabe kuâ ’nrazia gai zu lau!
Heram deiname leine ne peize hingkedun zu lau,
Tingwang gu naimikpui â wang mui daseu,
zai wang’nna de lei,
2chize â kemuîbe mai benai muîrambe mai,
tingmâube benai muiterîngtîngbe mai chang gu lei!
Tîngkaudung lungwangbe ze kedeiloa peireige muîwangbe gum lei.
Aigumbe â mâdau de wangchang mak,
zai rehei wangdairabe ge du mâdau du wang dai ra mak lei.
3Penui sua ’mbe hemi ne rû,
zai penui chai ’mbe hemimelei taube bam lei.
Penui sua ’mbe â heram ze Eden kerie gum,
kane penui chai ’mbe â,
mâ de gabe tingkangram gum lei,
zai penui dagene mâ de ’nsakpat kai mak lei.
4Penui luî â hekun luî ramme gum,
zai hereika’nggibe hekun ramme gum ze penui pak lei.
5Hekun timriang ramme ’ncheukuâ gum ze,
kedeiloa’ntûm ramme ge penui ’nsakhiau ze bam lei,
reheuzeu ge hemitau ze puakpriak bambe gum ze,
zai hereikangme herei ra wang’nduigaibe gum lei.
6Penui sua ’mbe ziemmena betedka’nsî lei,
’nteumena penui ma hâmrei bam lei.
7Heteureime gum penui ka’nggi lei,
hereikangme gum kerie peirei penui ’nzakchu lei.
Penui tatbe galuî ’nzeitun ze tat lei,
penui ’mpuî ramme gene kelitatsua mak lei.
8Kat-kat-karai penui hengei keleulia bam mak,
penui ’mpuî galuî-luî ze tat lei;
hereimerua ’nchui ge hedaupum gai lu sede penui je deî’nsau lak lei.
9Namdi peireige penui ’nsakchu lei,
kerie ramme peireige penui pakrua lei;
heki ramme lungge penui ’nzakgut lei,
mâ-kahegapeu gum ze kemuicheiki gene penui gut lei.
10Penui suage kedei-ketei’ngngailia bam lei,
zai tinggîm ramme kakedun de lei.
Naimik benai hekêu sungmuîgit ’ndi lei,
zai hegi ramme penui ’mbi ba ta di de lei.
11Tingwang ne pe gu hereikangme suage pe kuâ ’nrazia gai lei;
pe gu hereikangme kie-kadesang daseu;
pa ranggaibeibe sam pheume â reziechi lei.
Tingwang gu naimikpui â,
pengêudi mi hingbe kau lei;
zai chauge ne sapgimchi ra lau?
Helung Heli ra Kube
12Tingwang ne,
“Chunage du,
ningnui lung leine ne a dage heliwang lau,
teseurei ze kehapbe gene zai helung desuipuai ze a dage heliwang lau;
13ningnui paîni mak ze ningnui lung ramme hitpâng gai lau,”
ze kacheu de lei.
Tingwang ningnui Rapeu dage heliwang lau,
pa â ka’nggiabe benai ngauka’nggiabe ne pui lei,
zai gesutchi zai hungka’nggiabe ne puigit ze la lei,
zai gesâbe peirabe gene hungka’nggiabe teihelat-daichipeu lei.
14Tingwang ningnui Rapeu ne pe lung châmbe tew ta di heliwang dezai,
ningnui je keteu-kesak misongga ze ’nnam gai diak ku mei be châu ne chî ra lau?
Chidezai pe hangge mâ-himlei benai sakrabe peipatchi duî de lei.
15Zaion ge hegeîluîkie ’mmut kai lau;
teseureibe tew’nchi le lau;
’nsimrimbe ’ndui hang kû gai zu lau;
16ziemmena je kelau’ndui gai zu lau.
Ka’nduibe ze tew’nchi gai lau;
gechîngme je nguaheruawang gai zu lau;
napoine ramme benai ’ngngiêne ramme je du kûwang’ndui gai zu lau.
Henâukupeu je du peize pe kisîam sâu ne lau,
zai meipui je du peize pe jeiki sâu ne zu lau.
17Kegup benai herâtewbe-kaira kakge peize tingkume,
Tingwang guâ ka’ngguame hap zu lau.
Peize penui ne acheu sa ze,
“Hei Tingwang,
ning gu ziemmena je ngau’nggia gai lau,
zai nang ne kelânglume je teihenuitew ra,
heramzatme ne ngau’nna ra tew gai se lau,
’ndaitew ze pezatme ruage,
‘Penui Rapeu ’ndaige la lau?’ ze acheu ra lau,” ze kacheu de lei.
Hera ne Kedei yi ra Teleugaibe
18Chidadege Tingwang ne pe ram je ’nchâ dai di de lei,
zai pe gu ziemmename peireige ngau’nggia di de lei.
19Tingwang ne pe gume je acheu kak ze,
“Pie le lau,
ningnui hangge chêu,
wain zai mâ-châ I pei gai gu lei;
zai ningnui lungwângchang du de lei,
zai ziemmena zat leine ruagene ningnui je teihenuitew ra I tew gai dai ra mak lei.
20“Tingpeî ’mbia gu hereime je ningnui dagene kedeu ’mbe lutua gai ’ndu lei,
zai heram changbe benai peruabambe heram ’mbe kumtua gai ’ndu lei.
Keraîbe dung je naimik pat ’mbia sungkling,
zai bechaibe dung je naimik kêu ’mbia sungkling ’mbe tuâ gai ’ndu lei;
petiam rîm ne nampak bam gu lei;
misongga ze ningnui peireige pa ne tâtewgai’ndibe ziegeneu.
21“Hing se lau, Hei heram gau,
ning suiyi zai ’ntaza ze bam du lau;
Tingwang ne tâ kedibe ramme tew bei daseu.
22Hing se lau,
ningnui hênam gu hekaubena ramme gau,
tingkangram ge hereubuâ ’ndiakri pat dai la daseu;
hingbang ge pechî ’nchi la da,
’mbeuchîbang benai grepchî hiâm ’nchibiak la de lei.
23“Hei Zaionname gau,
ningnui suiyi zu lau,
zai Tingwang ning Rapeu dage hesuiyi’nta lau;
pa ne tingruikeuraibe ningnui hang kebuibe riâ pei bei,
pa ne tingsim kedibe du ningnui hangge pei gai bei,
besua’ngka ge gum ze ningnui hangge tingsim keraîbe benai kenâbe pei gai bei daseu.
24“Kechaîpung ramme ge chêu ne kebaupuigit bam gu lei,
zai hegambung ramme ge wain benai taudui lua’nniâmba bam gu lei.
25Tîngkaudung ne teu’ndibe tingkum ramme ze I ne ningnui je peiruî dai gu lei,
’nsakruabe kau tewka’nsiabe kau,
zai dûm ka’nsiabe kau,
a gu hereikangme je I ne ningnui ruage langgaibeibe zeu.
26“Ningnui teu’ngkie-desang ra ngau gu,
zai ’nggeugit bam gu lei,
zai ningnui hangge ningdaulakbe tâ tewgaipeu Tingwang ningnui Rapeu ji ningnui toa gu lei.
Zai a gu ziemmename je mâtew-tewsede tewhelêu dai ra mak lei.
27I â Israelme ruage la lei,
zai I Tingwang â ningnui Rapeu lei be,
zai hera kêdabe ga lei be ningnui chî gu lei.
Zai a gu ziemmena je mâtew-tewsede tewhelêu dai ra mak lei.
Tingwang gu Tingnaimikpui
28“Zai bechâng dezai aigum ze wangchang gu lei,
ziemmename leine peireige a gu herui ruî gai gu lei;
ningnui name ’mpeumi benai ’mpuimi ramme ne a sam paulîa gu lei,
ningnui ruage gechîngme ne hemang ramme ’mmi gu lei,
zai ningnui gu rehangme ramme ne keliâbe ramme ngau gu lei.
29Kebangme ’mpeumi benai ’mpuimi ramme peireige ’nsangdu chipau ting dezai a gu herui ruî gai gu lei.
30“I ne tingkehube ge benai kedei ge ka’nchetbe teilia gu lei, chige hejai, hemi, zai mika hiarichube ramme ngau gu lei. 31Chi Tingwang gu tingnaimikpui pengêudibe benai ngauhingbe wangchangrabe suage naimik muîgit kai du lei, zai hekêu ze hejai chang gai du lei. 32Chidezai mi-mige de Tingwang ji kube kau je â tew’nring gai bu lei; Tingwang ne ranggai’ndibe luigum ze, Zaion loa ge benai Jerusalem ge hanggesame â pak’mbiapatlube kau bam gu lei, zai ringpatme ruage Tingwang ne kûgaime â bam gu lei.
Currently Selected:
JOEL 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
