HOSIA 11
11
Hera ne Pe gu Ziemmena Hekuapheumakme je Hungbe
1Israel hena’ngka â pechu I hung ze bam de lei,
zai Ijip gene a na je I kûpat te lei.
2Penui je I kûranbi-bi,
a dagene penui tatbi-bi di de lei;
Baal je penui herâtewbe benai heraluîtewbe ramme dage mâ-perîmyibe rube ze penui tewtat ze bam de lei.
3Sede Ephraim je tatchi ra geteigaibe ze â I ne de lei,
a ba gene penui je I ne teichu gai de lei;
kane I ne penui je tew’mmi gai de lei be penui chî mak te lei.
4Ngauka’nggiabe ria ramme gene kehungbe kakbe ria ramme gene I ne penui je nguatat te lei,
zai penui hangge I â,
penui keza ramme gene heput luakpat’nchagaipeu gum chang di de lei,
zai penui dage I keikeu ze penui je guî gai bei de lei.
5A dage penui helatwangmeu di daze Ijipram ’mbe penui helatwang dai gu lei,
zai Assiriaram zene penui gu heguang chang gu lei.
6Hiazutkie zene penui gu namdi ramme peireige gechim gu,
penui gu keriekemui châp ramme tew’nsia kam gu,
zai penui gu keriengdi ramme lung gene penui je tew’ngga kam ’ndu lei.
7A gu ziemmena ramme â,
a dagene keliktat ra ran-kadesang lei;
chidaze penui hangge guangkâm teleukua gai ’nde lei,
zai mî ne de chize lutua ra mak lei.
8Hei, Ephraim ’ndaigum ze ningchu I saugaichi ra lau?
Hei Israel! ’Ndaigum ze ningchu I balapatkaichi ra lau!
’Ndaigum ze Adma peireige gum ze ningchu tewgaichi ra lau!
’Ndaigum ze Zeboiim peireige gum ze ningchu ketadau tewgaichi ra lau.
Chigum tew gai ra a lung gene ’ngnginsin de lei,
a lung ge ngauka’nggiabe zene puigit ze bam de lei.
9A lumpum-kadesangbe tâ ze I tew gai ra mak lei,
Ephraim je I tew’nsia dai ra mak lei;
I â ziemmena mak ze Hera daseu,
chi Ka’nchipeu ningnui ruage bambepeu daseu,
zai tew’nsia ra hangge I â wang ra mak lei.
10Tingwang chai penui sui gu lei,
duilui gum ze pa â ’nra gu lei;
eu lei, pa pe kuâ ’nra gu lei,
dezai tingbia ’mbene pe na ’mpeumi ramme kedun ze wang gu lei;
11’nruine gum ze Ijipram gene liamkelikrua ze,
zai Assiriaram gene depeine gum ze penui liamwang gu lei;
zai penui ki lam-lam’mbe I ne penui je tat dai ra lang gai gu lei,
ze Tingwang ne kacheu de lei.
Israel benai Juda je Chau’ngkuigaibe
12Ephraim ne karasa ne,
Israel ki choâ ne achu choapelak ’ndi de lei;
kane Hera ne Juda je â chî’mmi ze lamui rei lei,
zai ka’nchipeu kuâpheu ze lamui rei lei.
Currently Selected:
HOSIA 11: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
