HOSIA 10
10
1Israelme â perachî
’nchikeuka’mmibe grepchî hiâm de lei.
Perachî pungbi-bipat tâne herâtewbe-kaira ramme pa tew’ngkiebi-bi gai lei;
pe ram ze ’ntuahangdibe gum ze pe gu kechia’ndi ze du teleu’mmibi-bi gai de lei.
2Penui ’nningmau de lei;
chuna â penui mâu ze penui ne pung himchang gu de lei.
Tingwang ne penui gu herâtewbe-kaira ramme tewkau ’ndu,
zai penui gu gechia’ndi ramme tew’nsia ’ndu lei.
3Chunage â penui,
“Tingwang je anui hingmakbe ziegene anui gu heguang ga lei,
zai heguang zene anui hangge pa ne ’ndaikau tewchiduibe la lau?” acheu sa gu daseu.
4Pemîgabe sam ramme runne penui sa lei;
perua ne kadeseube ramme ge penui samhatkaibe ramme tew gai lei;
chidaze helu ge heningpube gepeupâkui ramme gene reheu kesiabe ramme puakpat gum ze samrambe puakpat ku lei.
5Beth-aben gu getumpoine ziegene Samaria ge lungme kakedun de lei.
Pe gu ziemmena ne chize desui gu lei,
zai chi heratluîtewbe je kakellumbe tingkume ne chipau je puîhap ku lei,
chipau gu pengêudibe chigene gadibe ziegeneu.
6Eu lei, chipau merua ze du Assiriaram ’mbe heguang kedipeu hangge kela pei gai ra teitat tu lei.
Ephraim je tew’ngngam gai bu lei,
zai pe gu heraluîtewbe je Israel ’ngngam du lei.
7Sungkling peireige mâ-telei gum ze Samaria gu heguang â ga gai du lei.
8Israelram gu hemui,
Aven gu pebâm hube ramme ze tew’nsia ’ndu lei,
hetubang benai heturia ramme ne penui gu herâtewbe-kaira peireige puakpat kû lei;
dezai penui ne peloa hube ramme je,
“Anui je ruichim gai lau,” ze acheu,
zai kedeiloa ramme je,
“Anui peireige dap kai lau,” ze acheu gu lei.
Tingwang ne Israelme peireige Samrambe
9Gibea ge bambe ting gene nang â hemui gai ’ndi de lei,
Hei Israelram, chigene penui tewchu di de lei,
Gibea ge herei ne penui je gua’nchuchang mak ta ra semei?
10Hekuapheumakbe ziemmena peireige kedeibe pei ra I wang gu lei;
zai penui gu hemui-helut dêt na bamdibe ziegene penui je kedeibe pei gai dezai heramzat ramme ne penui je tuaguâwang ra tew gai bu lei.
11Ephraim â,
chinlube getumsei chêuneibe kau chang ze bam de lei,
zai pe guang peluiyibe ze I ne ’nzâ gai ze bam de lei;
kane Ephraim je I ne guangkâm luak kai gu lei,
Juda hening pu himchang gu lei,
Jakob pe runne pe hangge hening kedaiwang himchang gu lei.
12Ningnui hang-hangge kapelingbe ling gai lau,
hungka’ntipbe rachî gat le lau;
chi pugai’ndibe kedei ze kedaiwang gai zu lau,
aize Tingwang je peurabe nehî chang di daseu,
chidezai pa wang ze ningnui peireige tewka’nringbe ruîgaichi le ra hangge zeu.
13Ningnui ne hemui-helut ling gai de lei,
ningnui ne ka’ngkuibe rachî gat lu de lei,
ningnui ne karasa rachî luteu lu de lei.
Ningnui gu hekuntimriang bambe ramme benai ningnui gu ziemmena gekuume misongga bambe geze ningnui ’nnumtew di dadegeu,
14chipauziegene ningnui gu ziemmena ruagene herei’ncheu zuapat ku lei;
zai ningnui gu keriengdi ramme tew’nsia kam ’ndu lei,
kahereibe mai ge Shalmanbe ne Beth-arbel tew’nsia ’ndi gum zeu;
hêpuime benai penui name je niakdesuirui ’ndu de lei.
15Chigum ze ningchu du tew gai gu lei,
Hei Israel ki gau, nang sia-desangdibe ziegeneu.
Chi gechibe wangbe gene Israelme gu heguang je tew’ngga’nzaû gai gu lei.
Currently Selected:
HOSIA 10: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
