EKSODAS 38

Rûkambe-râtewbe hangge Herâtewbe-kaira Kateleube

(Eks 27.1-8)

1Pa ne rûkambe-râtewbe hang akasia ching ne herâtewbe-kaira teleu gai de lei, chize petâ benai pedit ze sâu mengeu lei; chi herâtewbe-kaira ze pedit-petâ ’nsamrap ze tew gai lei, zai pehut ze â sâu chum lei. 2Zai chi pemik medai ge bekie ramme pa tew gai de lei; chi bekie ramme ze herâtewbe-kaira ge tewhelua gai lei, zai chize kangngâgeî ne pa kûm gai lei. 3Zai herâtewbe gu heli kerua ramme, heli ramme, zai mâ-tuakbe ’ngkualipi ramme mâkuak ramme, zai hegeîrang ramme, zai hemikuak ramme pa ne tewgaibe ramme ze: heli kerua ramme leine ze pa ne kangngâgeî ne tew gai lei. 4Dadege kangngâgeî ne perak hangge pa ne teleu gai de lei, zai chize herâtewbe-kaira tû kangge kai gai de lei, chidezai chi perak ze herâtewbe-kaira pa’mpi riâ ge ’nrakhangchang le ra hangge zeu. 5Kangngâgeî ne chipau ra hang tewbe pemik medai ge râchapuabe kang hang kaigimrabe hangge mâ-gua medai pa ne kai gai de lei; 6râchapuabe kang ze pa ne akasia ching ne teleu gai de lei, zai chige kangngâgeî ne kûm gai de lei. 7Zai chiramme pua ra pemik mik medai ge mâ-gua ramme lungge chi bekang ze pa ne keripela gai de lei; chize pa ne bepakpi ramme ne kûm ze pebung hang tewpat kai de lei.

Kangngâgeî ’Ntuikuak

(Eks 30.18)

8Dadege ka’nduibe-paîki kemui ge ’mpuimi tâka’ngguame gu judageî ramme bambe gene pa ne kangngâgeî gu heduikuak benai kangngâgeî ne tewbe bepî ze tew gai de lei.

Kakellumbe-paîki Rieguarabe

(Eks 27.9-19)

9Zai pa ne hetiampaîki tew gai de lei, tingpî ’mbia hangge sâu haî kat, banutlangkie ’nneulube ne kakellumbe-paîki gu paîlîmbe hang tew gai de lei; 10kechia ’ngkai zai bechia dungrabe kuiki ramme ze du ’ngkai kangngâgeî ne tew gai de lei, kane kechia ramme gu peguak ramme benai bepeirei gu paichiekang ramme ze â gepût ne tew gai de lei. 11Chipau luigum ze tingpeî ’mbia hangge sâu haî kat, kechia ramme ’ngkai zai dungrabe kuiki du ’ngkai kangngâgeî ne tew gai de lei, kane kechia ramme gu peguak ramme bepeirei gu paichiekang ramme ze â gepût ne tew gai de lei. 12Zai naimikkeu ’mbia ge pedit hangge â sâu rengeu lîm gai de lei, chige kechia kereu benai dungrabe bekuiki kereu bam de lei. 13Kiziêsua ’mbia naimikpat ’mbia ge pedit ze sâu rengeu lei. 14Kemuiki gene kat lam’mbia ge sâu kereu ze mengeu lîmnam gai de lei, zai chige kechia kechum benai dungrabe kuiki kechum kai de lei. 15Kêda ’mbia ge du sâu kereu ze mengeu lîmnam gai de lei, chige kechia kechum benai dungrabe kuiki kechum kai de lei. 16Rieguabe gu kemuiki lîmnambe paî ze petâ sâu ’ngkai lei, chize ka’nzaibe, gieremangbe, zai tologie, ze banutlangkie ’nneuzunlube ne dak lu ze ’ngngim ne heziak tewzunlube ne tew de lei; chige kechia medai benai dungrabe kuiki medai bam de lei. 17Rieguabe kechia ramme leine gepût ne tewbe paichiekang ramme ne ’ntukguâ gai de lei; pegua ramme ze du gepût ne tewbe ’nnia lei, zai kechia dungrabe kuiki ramme ze kangngâgeî ne tew gai de lei. 18Rieguabe lung gu kemuiki paî ze banutlangkie yibe benai ka’nzaibe tologie benai gieremangbe ne tew gai lei. Chi paî ge heziak ramme tew gai lei. Zai chipau paî ze petâ ge sâu ’ngkai zai pehut ze sâu mengeu lei, zai chi rieguabe ze pehut â ’nzuâ kam lei. 19Chipau paî ze bechia kangngâgeî ne tewbe medai benai bekuiki medai kai ze chakgîng lei; zai chi bechia ramme ge guakbe ze gepût ne tew lei, zai kechia ramme peî ge gepût ne kûm gai lei, zai paichiekang ze du gepût ne tew lei. 20Zai kakellumbe-paîki gu heria chakbe ’ntung ramme benai rieguabe heria chakbe ’ntung ramme leine ze kangngâgeî ne tew gai de lei.

Hera bambe Paîki ge Kerua bambe Pemîhungbe ramme Teibe

21Aize kakellumbe-paîki hingdebung kaibe paîki ge kerua pemîhungbe ramme teibe riak te lei, tingkupeu Aaronbe na Ithamarbe ne geteiliabe kang gene Lebime tâtewrabe hang Mosabe gu hingde gene teleupatkaibe luigum zeu. 22Juda kiria gene Hurbe chapeu, Uribe na Bezalelbe ne Tingwang ne Mosabe dage diegaibe ramme leine teleu gai de lei; 23zai pe dage mâ-chiamchipeu, peluiyi ra reming ze tewchipeu zai ka’nzaibe, gieremangbe zai tologie, zai banutlangkie ne ’nneuzunlube ne dakbe paî ge litok tewchipeu, Danbe kiria gene Ahisamakbe na Oholiabbe bam lei.

24Ka’nchibe hetiampaîki hangge gechâk peipatkaibe pelane ge kakellumbeki ge teibe mâ-ka’ndeube riâ gene pehit haî kat lei. 25Gepût ze pebaume gu ’mpuâhâ gene meiwangbe ze kakellumbeki ge mâ-ka’ndeube riâ gene pehit chang chum ze haî medai ze himreu lei. 26Aige ngaube riak ze kakellumbeki gu mâ-ka’ndeube sie gene hepiaurawbe ge heji bamdime, ’nteumena peiwangbe riak benai ’nzuâ lei. Hepiaurawbe ge heji guttime ziemmena kum ’ngkai benai bepeirei kau ze chang haî seruk ze kechum ze haî mengeu ze rengeu lei. 27Gepût pehit chang chum ze haî medai zene ka’nchibe hetiampaîki benai paîlîmsungbe hang kechia dungbe kuiki ramme hangge tew gai de lei, kechia dungrabe kuiki hangge tewgaibe kat ge gepût pehit himreu ze medai gut ti de lei. 28Gepût pehit himreu ’nsakpatbe zene Bezalelbe ne bechia kang ramme bechia gu peguak ramme, zai kechia peî ramme hangge kateleu de lei. 29Tingwang hang kangagei peipatkai’ndibe ze pehit chang na ze haî mengeu ze ’ngkai ze mengeu lei. 30Chize ne pa ne Tingwang bambe paîki ge gutbe kemui hang bechia pî dungrabe kuiki ramme, kangngâgeî ne tewbe kangngâgeî gu herâtewbe-kaira benai pera hang tewbe herâtewbe hangge ka’ngngâbe kerua zat leine hang, 31perie rieguabe gu bechia dungbe kuiki ramme hang, zai paîki benai perie rieguabe lungge paîgingbe ria gu pa’ntung ramme hangge tew gai de lei.

Currently Selected:

EKSODAS 38: ZEMEBSI

Highlight

Copy