EKSODAS 37

Samhatkaibe Bung Kateleube

(Eks 25.10-22)

1Bezalelbe ne akasia ching ne hingdebung tew gai de lei; petâ hangge sâu na ze bepi riâ zai pedit hangge sâu kat ze bepi riâ zai pehut hangge sâu kat ze bepi riâ zeu. 2Zai pa ne chize gechâk ’nchichiakbe ne pelung ge benai hela ge kûm gai de lei, zai gechâk ne bekunghia kûmhiâ gai de lei. 3Zai gechâk ne tewlube heriagua medai tew lu ze bepî medai ge, gua na ze kat lam’mbia hang, zai gua na ze kêda ’mbia hang kai de lei. 4Akasia ching ne puabe cha hangge pa tew gai de lei, zai gechâk ne chize kûmtui gai lei, 5zai puarabe hangge penui ne becha ramme ze pebung hiage gechâk riagua bambe lungge kerigut kai de lei. 6Zai gechâk ka’nchibe ne ka’nggiabe bâmra pa tew gai de lei; petâ ze sâu kat ze bepi lei, zai pedit ze sâu kat ze bepi lei. 7Zai gechâk ka’nchibe ne kerub kena luî hang pa tew gai de lei, ka’nggiabe bâmra tû kena ge chipau kena ze tew gai de lei, 8tû kat lam’mbia ge kerub kat tew gai, zai kêdabe tû kat lam’mbia ge kerub kat tew gai zeu. 9Kerub kena zene bepeirei ge penai kan liâmpat ze ka’nggiabe bâmra ze lîmsung gai de lei, penai ju ze kat-kat lam’mbia ’nsua lu zeu; kerub kena ju ze ka’nggiabe bâmra ’mbia piezua lei.

Hera dage Tingku Teipatbe Kaira hang Kateleube

(Eks 25.23-30)

10Akasia ching ne tewbe kai ra du pa ne tew gai de lei; petâ hangge sâu na pedit hangge sâu kat, zai pehut hangge sâu kat ze bepi zeu; 11zai chize gechâk ’nchichiakbe ne pa kûm gai ze gechâk ne pelung kûmguâ gai de lei. 12Zai chize sâu kat riâ bekung tewgua gai lei, zai gechâk ne bekung kûmguâ gai lei. 13Zai chipau kaira hangge gechâk riagua medai tew lu pemik pî medai ge kai de lei. 14Bechâp ne chipau kaira puarabe kerigairabe bâm hangge bekung tewgaibe hiage gechâk riagua ramme bam de lei. 15Akasia ching ne bechâp ramme hangge tew de lei, zai chize gechâk ne kûm gai lei, zai chipau châp ramme ne chipau kaira ze pua de lei. 16Zai perîmyibe ’ntaurabe hang hekuak poine benai hekuak ramme, zai wain ruîkeugairabe hangge hepiak benai mâkuakpoine ramme pa tew gai de lei.

Kachâbung-kaira Kateleube

(Eks 25.31-40)

17Gechâk ’nchichiakbe ne tewbe kachâbung-kaira pa tew gai de lei. Bepî benai bechia ze gechâk ne heki gai lei, mâpâ ne bepuâ tewbe pengûmne benai pepâkua ramme ze chige kûmgit kai lei. 18Pebia-bia ge bekeî seruk getuapat lei, kat lam’mbia kechum-chum zeu, chipau kat lam’mbia gu gene hemibung-kaira gu bekeî kechum zai kêda ’mbia gu gene hemibung-kaira gu bekeî kechum zeu. 19Pekeî ’nsangne ge almond pâ luigumbe pâ chum-chum, pengûmne benai pepâkua luigumbe tew gai lei. 20Kachâbung-kaira chia ge â almond pâ luigumbe pepâ-ngûmne benai pepâkua ramme bambe medai tew gai lei. 21Pekeî ’nsangne kangge mâpâ-ngûmne kat-kat bam lei. 22Mâpâ-ngûmne ramme bekeî ramme, zai kachâbung-kaira ze pelane dâng kat gechâk ’nchichiakbe ne hekihelua gai de lei. 23Zai pa ne chipau gu hemibung sena benai kachâ paîrie chiapbe tegîne, zai ka’ngkingbe kuak ramme ze gechâk ka’nchibe ne pa ne tew gai de lei. 24Zai pa ne gechâk ka’nchibe hit himreu ne chipau ze tew gai de lei.

Mâ-perîmyibe Rube-râtewbe gu Herâtewbe-kaira kateleube

(Eks 30.1-5)

25Mâ-perîmyibe rûgairabe hangge herâtewbe-kaira pa tew gai de lei; akasia ching ne chize pa tew gai de lei, petâ hangge sâu kat zai pedit hangge sâu kat zeu; chize pedit benai petâ ’nsamrap ze, zai pehut ze sâu na na tew gai de lei, bekeî ramme chige tewhelua gai de lei. 26Zai bepeirei benai pehia dangguabe ramme benai bekeî ramme gechâk ka’nchibe ne pa kûm gai de lei; zai gechâk ne bekunghia pa kûmguâ gai de lei. 27Zai chipau hangge gechâk ne tewbe riagua kena pa tew gai de lei; bepeirei ’mbia bekung kûmgaibe kangge kena lam’mbia kena-na pa tew gai de lei, zai chipau gua ramme zene puarabe chingkang ramme ruagaibe hang chang de lei. 28Akasia ching ne puabe chingkang pa tew gai lu, zai chige gechâk ne kûm gai de lei.

Suanggaibe Taudui benai Mâ-perîmyibe hangge Kateleube

(Eks 30.22-38)

29Zai mâ-perîmyibe tewme ne kaikakebutbe gum ze airamme gene suanggaibe taudui ka’nchibe hangge pa tew gai de lei; aize ne tew’ntipkaibe ’nnukkaibe taudui ka’nchibe chang de lei.

Currently Selected:

EKSODAS 37: ZEMEBSI

Highlight

Copy