EKSODAS 15

Mosabe Leu

1Chidadege Mosabe benai Israelme bau ne aipau leu ze acheu ze Tingwang dage tew de lei,

“Tingwang dage I heleutew gu lei,

pa ne pe ngeudi-desang ze ngam gai bei daseu;

hekun benai pechingchuame je pa ne sungkling ge tuâ gai ’ndi de lei.

2Tingwang ze â a ranchi benai a leu lei,

zai pa ne a gu tewka’nringbe chang gai bei de lei;

aize a Rapeu lei, zai pechu I suang gu lei,

pa ze a peu Rapeu lei, zai pechu I toa’ndi gu lei.

3Tingwang â hereingampeu lei;

Tingwang ze pe ji de lei.

4“Pharaobe gu hekuntimriang ramme benai,

pe gu baudime je pa ne sungkling ge tuâ gai ’ndi de lei;

zai kelânglube saibe ramme â Kegiebe Sungkling ge keu gai di de lei.

5Heduidibe ne penui je naîchim ’nde lei;

tingchu gum ze besîng ’mbe penui kêugut ti de lei.

6Ning ba hezat’mbia ba â Tingwang gau,

reziechibe ge pengêudi-desang lei;

ning ba hezat’mbia ba ne, Hei Tingwang gau,

heteureime je tewpâng gai lei.

7Ning ngeudi-kadesangbe gene nang ne ning teureime je tuâkeu lei;

nang ne ning lumpum langpat kai lei;

chize ne penui je megaumui gum ze ru lei.

8Ning nêu-chui ’mmutkaibe gene hedui ramme kua’mpum gai di lei,

hedui kagesuâkbe sapchu ze bam lei;

sungkling chuklangbe ze ’ngkang gai di de lei.

9Heteureime ne, ‘I gua’nchu gu lei, I gua’nzû gu lei,

hereichâ I ’nzi gu lei,

chiramme zene a lungwângchang ra ngau gu lei.

A gu hiazutkie I tatpat ku lei,

a ba ne penui je tew’nsia gu lei,’ kacheu de lei.

10Ning gu tingkai ne nang ne ’mmut kai bei de lei,

sungkling ne penui je naîchim ’ndi lei;

hegeîdâng gum ze zairing ge penui ’ngngaîkeu gai di lei.

11“Tingwang gau, hera ramme ruage nang gumbe kau châu la lau?

Nang gum ze châuge ’nchi ze pengêudibe,

ningdaulakbe tâ ramme tewbe kau la lau?

12Nang ne nang hezat’mbia ba getuapat te lei,

kedei ne penui je ’nzua ’ndi de lei.

13“Nang ne ripatlume je nang hungka’ntipbe gene,

nang ne ngua bei de lei,

ning gu ka’nchibe bâm ’mbe nang ne penui je,

ning ranchi ne ngua gai bei de lei.

14Heramzat ramme ne seu lu de lei, penui hingkakedun de lei;

Philistia deiname penui duângga di de lei.

15Chunage Edom gu besuitewme mâ-’nningchi ta di de lei;

Moab gu kanguame kakedunbe ne puigit ti de lei;

Kanaan deiname leine â penui lungchêutew ta di de lei.

16Kahingrimbe benai kiâkutadibe penui peireige wangchang de lei;

ning ba ranchibe ziegene penui â tingchu gum bamsip la de lei;

ning gu ziemmena tatpat temak tâne,

Tingwang gau, nang ne luilume tatpat temak tâne hangge zeu.

17Nang ne penui je nguagut kai gu lei,

zai penui je ning gu kedei loa’ntûm ge tau gai gu lei,

ning bâm hang nang ne teleulube bâm ge zeu,

Tingwang gau,

ning ba ne teichugaibe ka’nchibe bâm ge zeu,

Hei Tingwang gau.

18Tingwang ne betingbeta samram ze bam bam gu lei,” ze acheu zeu.

Miriamle Leu

19Pharaobe gu hekun ramme benai pe gu hekuntimriang ramme, zai hekun chingchuame ramme sungkling ge guttibe luage, Tingwang ne sungkling gu hedui ramme penui peireige teiwangherua gai dai bei de lei; kane Israelme bau â sungkling zuilung ge kedei changkube gene tat lei. 20Chidadege Aaronbe kinapui kemeu’mpui Miriamle ne ’ntoî tei lu, zai ’mpuimi leine ne ’ntoî tei lu pe chai suipat ze lim de lei. 21Zai Miriamle ne penui hangge heleutew gai ze,

“Tingwang dage leutew lau,

pa ne pe ngeudi-desang ze ngam gai bei daseu;

hekun benai pechingchuapeu je pa ne sungkling ge tuâ gai bei de lei,” kacheu de lei.

Karîbe Hedui

22Chidadege Mosabe ne Israelme je ngua lu Kegiebe Sungkling gene tat’nduâtat ze Shur hênamchangbe heram ’mbe tat kai di de lei; hênamchangbe heram ge hezie kechumne penui tebeîtewtat da, kane hedui mâ de ngaudau mak lei. 23Marah ge penui wangchang dege, chige hedui karî taibe ziegene Marah gu hedui penui sakdau lak te lei; chipauziegene chipau bâm ji â Marah ze ’ntak kai de lei. 24Zai baudime ne Mosabe je kakeraibe lam gene, “Anui ’ndaikau sak ra se lau?” kacheu de lei. 25Zai pa ne Tingwang dage kie gai de lei; dadege Tingwang ne hingbang teilia bei de lei, zai pa ne chize hedui ge tuâ gai bei ze hedui ze kum gai di de lei.

Chige Tingwang ne penui hangge hingde benai riagailube hingde tew gai ze, chize ne pa ne penui je kakedak te lei, 26acheu sa ze, “Nang ne ning Rapeu Tingwang kuâ ’ngking’mmi, zai pe mikngau ge ’ndaibe ze ka’nzei mei be tew, zai pe gu samdiegaibe ramme pheu ze pe gu hingde ramme leine tei dizai â Ijipme peireige I ne kaibe herarît ramme ze ning peireige katte l kai ra mak lei; I â ningchu tewka’mmipeu, Tingwang daseu,” ze kacheu de lei.

27Chipau chângge dekuaki kereu ze kena mêupibang riaksena bambe bâm ge penui wangchang de lei; zai chige hedui bâm hiage tejeîbâm penui tew gai de lei.

Currently Selected:

EKSODAS 15: ZEMEBSI

Highlight

Copy