EKSODAS 14
14
Kegiebe Sungkling Tatkabe
1Chidadege Tingwang ne Mosabe je, 2“Baal-zephon je, Migdol benai sungkling kakge, Pi-ha-hiroth suage ’nreiwang dai ze tejeîbâm tew ra Israelme bau je rang gai be lau; sungkling je teihekakchi ze ningnui tejeîbâm tew ra lei. 3Pharaobe ne Israelme tedeu ge, ‘Penui â heram ge ’mpuî mierua la de lei; hênamchangbe heram ne penui je â tewnam ’nde lei,’ ze acheu gu daseu. 4Zai Pharaobe lungran chi ze bam ra I ne tew gai gu, zai pa ne penui je gua’nchu gu, zai Pharaobe benai pe gu baudime leine peireige a ngeudi ra ngau gu lei; dezai I â Tingwang lei be Ijipme ne chi gu lei,” kacheu de lei. Zai chipau luigum ze penui tew de lei.
5Israelme â pak te lei be Ijipme gu heguangpeu je pau gai bei dege, Pharaobe benai pe guâ ka’ngguame ze Israelme tedeu ge penui lung ’nningkedetwang dai di de lei, zai penui ne, “Anui guâ ’nggua ze bambe gene Israelme je tat ra anui ’mpatkai’ndibe ze, ’ndaitew ze aigum ze anui tew gai rei se lau?” ze kacheu de lei. 6Chidadege pa ne pe gu hekuntimriang gene tat ra kedâ lu, zai pe gu hereikangme je ngua lu, 7zai kelânglube hekuntimriang haî seruk zai Ijipram gu kêdabe hekuntimriang ramme leine benai penui ’nteumena peireige ngua ra hangge saibe ramme je kedâ gai de lei. 8Zai Tingwang ne Ijipme gu heguang Pharaobe lungran tew’nchi gai bei ze, Israelme kuugiereu ze zuapattibe luage pa ne guaka’nchu de lei. 9Ijipme, Pharaobe gu hekun ramme leine benai hekuntimriang ramme, zai pe gu ziemmena hekun chingchuame benai hereikangme ne penui je guaka’nchu de lei, zai Israelme je penui sungkling taige Pi-ha-hiroth hiage, Baal-zephon suage tejeîbâm tew ze bambe bâm ze gua’nsachang di de lei.
10Pharaobe wang’nna di dadege, Israelme penui ’ngngangrakchu gai de lei, zai pie le lau, Ijipme penui chai guaka’nchu de lei; zai penui hingkakedun de lei. Zai ’ngngâ gai ra hangge Tingwang dage Israelme kûka’nrung de lei; 11zai penui ne Mosabe je, “Ijipram ge â heraw ramme bâm hang gadibe ziegene hênamchangbe heram gene anui chaigairabe hangge anui je nang nguapat kai mei? Anui je nang ne Ijip gene nguapat lu ze nang ne ’ndaikau anui hangge tew gai lau? 12Aigum gu dadege ningchu Ijipram ge anui ne, ‘Anui je tewkeleu se lau, zai anui je â Ijipme guâ ’nggua ra pei be lau,’ ze acheu mak semei? Hênamchangberam ge chai gai ra sua â Ijipme guâ ’ngguadibe anui hangge yibi gu daseu,” kacheu de lei. 13Dadege Mosabe ne penui je, “Hing se lau, sap’ntiprip bam lau, zai nemai ge Tingwang ne ningnui hangge tewka’nringbe tâ tewrabe ze piekua le lau; nemai ge ningnui ngaube Ijipme je mâdau de ningnui ngau dai ra mak lei. 14Tingwang ne ningnui hangge ’nggigaihâ gu lei, zai ningnui â liekua ze bamrabe runne lei,” kacheu de lei. 15Tingwang ne Mosabe je, “’Ndaitew ze ’ngngâ gai ra hangge a dage nang kûka’nrung lau? Tat’nduâtat ra hangge Israelme je rang gai be lau. 16Ning gu hetui getuachu gai lau, zai sungkling peireige ning ba getuapat ze sungkling ’nzipedak kai be lau, chidezai sungkling ge kedei changkube gene Israelme tatpelachi le ra hangge zeu. 17Penui je gua’nchurabe hangge I ne Ijipme lungran tew’nchi gai gu lei, chidezai Pharaobe benai pe kumme, pe gu hekuntimriang ramme, zai pe gu hekun chingchuame peireige I a ngeudi gu lei. 18Zai Pharaobe benai pe gu hekuntimriang ramme, zai hekunching chuame peireige I ne kengambe ngau dezai â I â Tingwang lei be Ijipme chî gu lei,” kacheu de lei.
19Chidadege Israelme baudime suage nguaraîtatbe Hera gu angel’mpeu zene wang ze penui chai ge tat te lei; zai kemâukang ze penui sua ’mbene penui chai ’mbe pat dai lu sap te lei, 20Ijipme bau benai Israelme bau kakge wang gai zeu. Zai chige kemâu benai kemuîbe bam di de lei; zai tingmuî kat zene kat tailam wang’nna gai mak ze kemuîbe tuapat ti de lei.
21Chidadege Mosabe ne sungkling peireige pe ba getuapat kai de lei; zai naimik pat ’mbia gu tingkai kechibe gene Tingwang ne tingmuî tâluî sungkling ze guikedetpat ’nde ra tew gai bei de lei, zai sungkling ze kedei changbe hangge tew gai bei de lei, zai hedui ramme ze pângpedaktat ti de lei. 22Zai Israelme â sungkling zuilung ’mbe kedei changbe ge hedui ramme zene penui hezat’mbia benai heku’mbia ge ’mbie gum ze chang ze tatgut ti de lei. 23Ijipme ne guaka’nchu de lei, zai sungkling zuilung ’mbe penui chai ’nsagut ti de lei, Pharaobe gu hekun ramme leine, pe gu hekuntimriang ramme, zai pe gu hekun ramme gut ti de lei. 24Zai hechua ba’nzangrabe hî chang dadege, hemi benai kemâukang gene Ijipme baudime peireige Tingwang pie’nsukkeu de lei, zai Ijipme baudime je tewpedap kai bei de lei; 25penui gu hekuntimriang pigua ramme tew’ntipripkaibeibe ziegene zuritsit ze tatpat lak ra tew gai bei de lei; dadege Ijipme ne, “Israelme suagene pak te kei lei; kacheu de lei. Tingwang ne penui je â Ijipme je ’nggigaiha daseu,” ze kacheu de lei.
26Chidadege Tingwang ne Mosabe je, “Ijipme peireige, penui gu hekuntimriang ramme peireige, zai penui gu hekunching chuame peireige hedui luaheruawang gai dai ra hangge sungkling peireige ning ba getuapat kai lau,” kacheu de lei. 27Chidadege Mosabe ne sungkling peireige pe ba getuapat kai bei de lei, zai hechua dege â sungkling ze pebâm luî ze wang gai dai di de lei; zai Ijipme chilia pak kai di de lei. Zai Tingwang ne Ijipme je sungkling zuilung ge tew’ngga kam gai bei de lei. 28Hedui luaheruawang dai ze hekuntimriang ramme, zai hekun chingchuame zai sungkling ge penui chai ’nsagutme Pharaobe kumme leine je naîchim kam ’ndi de lei; chai’nsakpatbe kau mî de ga lei. 29Kane Israelme â sungkling zuilung ge kedei changkube ge hedui ne penui hezat’mbia benai heku’mbia ge penui hangge ’mbie chang ze tat ti de lei.
30Aigum ze chipau mai ge Ijipme ba gene Israelme je Tingwang ne tew’nring gai de lei; zai sungkling kung ge Ijipme gu kechaipum ramme Israelme ngau de lei. 31Zai Ijipme peireige kengambe tâ kedibe Tingwang ne tewgaibe Israelme ngau de lei, zai baudime ne Tingwang je hing di de lei; dadege Tingwang benai pe guâ ka’ngguapeu Mosabe je penui ’nnum’mmi di de lei.
Currently Selected:
EKSODAS 14: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
