DANIEL 12
12
Betun-gaibe Ting
1“Chipau ting dezai ning gu ziemename name je reî ze bampeu heguangsinbe kedipeu Mikaelbe zuachu gu lei; zai kakeleube ting dau gu lei, heramzatme bamdibe ting gene seu ze mâdau de chigum wangchanggaimakbe ting zeu; chipau ting ge ning gu ziemmename je ’nripat kai bu lei; ’nteumena ji leisikuak ge rawgaibe ngau le ra hangge zeu. 2Zai kedeimoîne zeu ge jeikeudime ruage gekieme ’nrakchu gu lei, hanggesame â keringbe betunmakbe ge, zai hanggesame â ka’ngngambe benai ngauka’nnabe gezeu. 3Zai penui ruage kaningchingme â tinggîm kebabe gum ze ba bam gu lei, zai misonggame je kapelingbe ge nguagaime ze hegi ramme gum ze betingbeta lerba bam gu lei. 4Kane Hei nang Danielbe gau, sam ramme ze gekap kai ne lau, zai leisikuak ze kaunam ne lau, betun-gaibe ting chang zeu. Ziemmena misonggame ne ailia-lia pakrua gu, zai mâ-gechîbe pungpat ku lei,” ze kacheu de lei.
5Dadege I Danielbe pie bam de lei, pie le lau, hangna sapbam lei; hangkat â ’nggeukung ailia ’mbia ge bam zai kêdapeu ze â ’nggeukung katlam ’mbia sap bam lei. 6Zai hangkat ne linenpaî bâ lu ze, ’nggeuki hedui peireige bampeu je, “Ai tâningdaulakbe betun-gairabe ze ’ndaitewbe ting ne ra lau?” ze ka’nneu lei. 7Dadege linenpaî bâ lu ’nggeuki peireige bampeu, pe ba hezat’mbia benai heku’mbia ba tinggîm ’mbe getuachu lu ze, “Aize kum chum ze bepi hang runne gu lei, ziemmena ka’nchime tâtewchibe pângdesuirui gai kam lu dezai airamme leine tew’nsang gai gu lei,” ze betingbeta ring ze bampeu dagene deseugaibe I seu de lei. 8I seu lu de lei, kane I ’nningchi mak lei, dadege I ne, “Hei a Wang airamme betun-gaibe ’ndaikau chang ra lau?” ze acheu bei de lei. 9Dadege pa ne, “Daniel, nang ’mpuî ra ’mbe tatchu lau, sam ze gekap kai ’nda, zai kaunam ’nde lei, betun-gaibe ting wangchang mak tânai. 10Ziemmena misonggame je tew’nchi ze hâ ze bam ra tew gai gu lei, zai heziâkga ze yize bam gu lei; zai ziemmena helungriaksiame â sia-desang ze bam gu, zai helungriaksiame mi-mige du ’nningchi ra mak lei, kane kaningchingme â mâ-’nningchi gu lei. 11Zai nai’nsangne herâtewbe peipatbe chipau ting ge tew’ngga gu lei, zai chi ngauhingbe katenetbe tei’nsapchugaibe ting gene seu ze naimikpui chang kat ze haî na ze riaksekui bam gu lei. 12Zai ’nnum’mmi ze naimikpui chang kat ze haî chum ze himreu ze mengeu kualume â helungtemi gu lei. 13Kane nang Danielbe â betun-gaibe chang ze ning gu ’mpuî ge tat bam lau; dezai naimikpui betun-gaibe ge nang sau gu lei, zai ning bamrabe ge nang sap kû lei,” ze kacheu de lei.
Currently Selected:
DANIEL 12: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
