DANIEL 11
11
1Zai I ne du Mede’mpeu Dariabe heguang sapraibe tingkum ge pe chu tew’ntip kai ra, zai pe ran tew’nchi gai ra I sapchu de lei.
2“Chuna samsang ningchu I teilia gu de lei. Pie le lau, Persiaram ge heguang kechum pat ku lei, pamedaipeu â kêdabe ramme sua â lungyi bi gu lei; pa keheube ziegene pe ran tew’nchi lu dezai Gresia gu heguangram ze ’nggi ra ziemmena ’nteumena lung hûchu gai gu lei.
Ijip benai Siria gu Heguangram
3“Peranchipeu pat ku lei, zai pa ne nei-neibe tak gene samrambe peranchibe ne samram gu lei. 4Zai pa sapchu dezai pa kaheguangberam ze pâng du lei, zai tingmik medai ge ’nzi gai ’ndu lei, pe chaname dage tat kai ra mak, pa ne rezietei ze samrambe bâm ge du, kane pa kaheguangbe heram ze lutuanerabe ziegene miramme je pei gai ’ndu lei.
5“Tingpîme gu heguang ne peranchi gu lei, kane pe gu heguangsinme ruage hangkat â pa suadu peranchi’nteu gu lei, pe gu heguangram ze tâtewchibe pengêudibe ne samram gu lei. 6Patingkum misongga hang gai dezai Siriaram heguang dage Ijipram heguang ne desieyibetew ze pe na je pe nâu hang kai gu lei, kane penai desieyibe tewbe ze mâtie ra mak lei, zai chipaupui, pe napeu zai pe na zai chipaupui tâka’ngguame pe dage nguatatme leine je tewchat kam ’ndu lei.
7“Kane heguangpui kiria gene hangkat ne pe bâm ze lu ’ndu lei, hereikang baudime je ngua lu pat ze, tingpeî heguang gu kerie guagut ze penui je ’nggi gu lei, zai penui ne dui gu lei. 8Zai penui je kebang hang nîmtat kû, penui gu heraluîtewbe ramme benai gepût benai gechâk ne mâ-bung tewbe pemîhungbe ramme Ijipram ’mbia teitat kam ’ndu lei. Tingkum gekie tingpeî heguang sua â pa â gîngtie bi gu lei. 9Zai tingpî ’mbia gu heguangram ge tingpeî ’mbia heguang ne herei guagut ku lei, kane duîlak ze pe ram ’mbe helatwang dai gu lei.
10“Kane pe name je herei-teitau gai gu, zai hereikang baudime je herei ra kûwang’ndui gai gu, zai wang ze naîpi ne ra, tat’ngka ra, penui teureime gu kerie tuaguâ ra, gecheu gai gu lei. 11Chidezai tingpî ’mbia wangpeu pe râta-desang gu lei, zai pa zuapat ze tingpeîme wangpeu je pa ’nggi gu lei, ziemmena baudime je pa nguapat da, kane ziemmena misonggame je tingpîme wangpeu ba ge pei gai gu lei. 12Baudime je pa nîm lu dezai pe lung suiyi-desang gu, zai ziemmena misongga chang kereu gum tewchat ku lei; kane chize ne pa duîtat bam ra mak lei. 13Zai tingpeîme wangpeu chu dai gu lei, ziemmena baudime keraîbe lua sua â kie ze zuapat ku lei, bechâng kum daikie mei ge pedâuyibe tingkum wangchang dezai hereikang baudi zai hereimerua tei lu ze wang dai gu lei.
14“Chipau ting dezai ziemmena misonggame ne tingpîme wang je ’nggi ra penui zuachu gu lei; zai ning gu ziemmename ruage hegeineime penui runne tei’ntua gai lu ze, penui kahekabe tewpui ra penui ran gu lei, kane penui kau gu lei. 15Chidezai tingpeîme wangpeu gu hekutchak ze ’mbaiki penui tew gu lei, namdi keriengdi ze penui ne tuaguâ ’ndu lei, zai tingpî ’mbia gu hereikangme ne tingkang ra mak lei, zai pa ne kelânglume du tingkang ra penui rantew ta du de lei. 16Kane pechu ’nggi ra wangbepeu â pa ne tewnei-neibe tak gene tew gu lei, mige de pe suage sap ra mak lei, zai pa â heram pengêudibe ge sap ku lei, zai ’nteumena pe gu tâtewchibe ge bam gu lei. 17Zai pa kaheguangberam leine ranchi tei lu ze pa wang ra chang gu, zai desieyibe pa tew gu, zai chigum ze pa tew gu lei. Zai heguangram tew’nsia ra ’mpuimi na heleu’mpui je pa pei gai gu lei, kane sapchi ra mak lei, zai keduîbe bam ra mak lei. 18Chipau chângge hezai kung ’mbe pe ju ’nrik tu lei, zai gekieme je pa lu gu lei, kane besuitewpeu hangkat ne pa gechîrettewbe ze tew’ngga ’ndu lei; zai pa gechîrettewbe ze pe peireige helatwang dai gu lei. 19Dezai pe ram gu kerie ’mbe pe ju ’nrik ku lei; kane pa mâ ’nrap lu kau gu lei, zai pechu ngau dai ra mak lei.
20“Chidadege pe bâm ge hangkat heguangram pengêudibe ge mâ-hâhapeu tatpela ra langgaipeu ne sapchu gu lei, kane mâtie mak ze helumpumbe ne mak, zai kahereibe ne makse pechu tew’ngga ’ndu lei.
Siriaram gu Heguang Siabe
21“Zai pe bâm ge ngauka’nnabe kau, heguangram gu hengêutewbe peigaimakbe kau ne sapchu gu lei; kane rangka’ntuabe ga ze wang ze pe samniam yibe ne heram ze pa ngau gu lei. 22Zai pechu ka’nggime zai samhatkaibe gu heguangsinpeu ze du biakhiamtua ’ndu lei, zai tewpâng ’ndu lei. 23Zai pe dage samhatkailube chângge keduaibe tâ tew gu, zai ziemmena pebau kecheime benai pe ranchichu gu lei. 24Heram gu kedei yilangbe ge rangka’ntuabe ga ze pa wang gu lei, pe peume ne mâdau tewmakbe tâ pa tew gu lei; mi heu sutlube ramme, hereichâ ramme, zai merua ramme penui ruage ’nzi gu lei, zai keriengdi nupgut ra ’ngkim tatew gu, kane beting keduîne hang runne lei. 25Ijipram heguang, hereikang peranchime je ngua lu pechu hereidairapeu je ’nggi ra pa kuugiereu ze pe gu sipai pebaukieme je gecheu gai gu lei. Kane Ijip gu heguang je choa gai bei ze pa ngamlak tu lei. 26Pe gu hetak mâ-teuyibe penui teume je pa ne tew’ngga ’ndu lei, zai pe gu hereikangme bau je guatua gu, ziemmena gekieme je tewchat ’ndu lei. 27Zai heguang kena lung ge mâ-kesiabe tew ra, zai bâm kat ge penai karasa sa gu lei; kane betun-gairabe ze â beting diegaibe gene gu lei. 28Dadege mi heurâ misongga tei lu ze pa pe ramdei ’mbe helatwang dai gu lei, kane pe lung â samhatkaibe ka’nchibe je tew’nsia ra ’nning bam gu lei. Zai pa tâtew ra ka’nningbe bam gu, zai pe ramdei ’mbe pa helatwang dai gu lei.
29“Beting diegaibe hî ge pa helat dai gu, zai tingpî ’mbe pa tat ku lei; kane nemai lut ge â keraîbe ge gum ra mak lei. 30Kittim gu dui’nnei ramme gene wang ze pechu ’nggi gu lei, zai pa hing gu, zai hechai’ngngîn du lei, zai pe lunggailak ze hechai helatwang dai du lei; zai samhatkaibe ka’nchibe peireige pa pe râta gu, zai chigum ze pa ’nggi gu lei. Pa wang gu zai samhatkaibe ka’nchibe je sâu ’ndime kuâ lu gu lei. 31Zai hereikangme pe lam’mbe sap kû, zai kellumki benai keriengdi ze penui ne tewhebâ gu lei. Zai rûkambe-râtewbe penui tewbambe tew’ngga lu ze mi ngauhingbe katenetbe penui ne teichu gai gu lei. 32Samhatkaibe je ka’nggime je samyibe ne kiâm gu lei; kane ziemmename penui Rapeu je chime â penui rankai ze tew ze sap’ntiprip bam gu lei. 33Zai chi ziemmena ruage kaningchingme ne ziemmena gekieme je mâ-’nningchi ra tew gai gu lei; kane hiazutkie benai hemi melei gene kebang nîmtattibe zai sutteube gene misongga ze ting kat ge â kau gu lei. 34Penui kau dezai penui je ’ngngâgaibe kecheîne penui ngau gu lei. Zai ziemmena misongga ze toameluagaibe sam gene penui dage herua gai gu lei. 35Zai chime kaningchingme ruage ziemmena hanggesame â penui je tew’nchi ra, zai pedeu ra, zai ’nchichiak ze hâpuang bam ra tewbe gene penui kau gu lei; betun-gaibe ting chang zeu; chize beting diegaibe wangchangmakbe ziegeneu.
36“Zai heguang â pe sui-sui ne tew ze bam gu lei, zai pe runne pe ngeutew’ndi gu, zai hera ramme leine peireige pe runne pechu tew’ndi gu, zai hera ramme gu Hera je sa’nsia ze mâ-mâ tâningdaulakbe rasam pa sa gu lei; zai pe lumpum-kadesangbe, ngauhingbe wangchang mak tâne pa â lungyi ze bam gu lei, beting diegaibe tew gai sing gu daseu. 37Pe paume gu hera ramme je mâ-hangge du ’nning gai ra mak, ’mpuimi ramme ne ka’nchâbe hera ramme gu hera kêdabe ramme je du mâ-hangge du ’nning gai ra mak lei; ziemmena ’nteumena peireige pe runne pechu tew’ndi ze bam gu daseu. 38Aipau ramme kelei ge keriengdi gu hera je pa hengêutew gu, zai pe peume chimakbe hera je gechâk, gepût, tingchu pemîhungbe ramme, zai kela pemîhungbe ramme ne hengêutew gu lei. 39Pe gu keriengdi ’ntiplangbe reî ra hesangme gu hera je teilung gu lei. Pechu chigaihâme je pa hengêutew’ndi gu lei. Penui je misonggame peireige samram ra tew gai gu, zai heram ze pemî hang ’nzi gu lei.
40“Tingpîme wangpeu gu beting kamwang dezai tingpeîme wangpeu ne pe gu hekuntimriang ramme, hekun hereikangme, zai hedui-’nnei misongga ngua lu ze heram pelane ge gut ze tingkai natri gum ze pechu ’nggi gu, zai naî kam ’ndu lei. 41Pengeudibe heram ge du pa ne gut ku, zai chang kereume kâu kam gu lei; kane aime Edom, Moab zai Ammonme je â pe ba gene meupat ku lei. 42Pa ne pe ba getuapat ze heram ramme ’nggi gu, zai Ijipram dei â ’mbiachi lak te lei. 43Ijipme gu gechâk baigaibe ramme gepût zai mâ-pemîhungbe ramme leine peireige pa ne besuitew kam gu lei, zai Libiame zai Ethiopiame pe chai sui du lei. 44Kane naimikpat ’mbia benai tingpeî ’mbia ’mbene hepâusam wangbe ne pechu tewrîn gai gu lei. Zai pa pe maraksiabe ne zuapat ze ziemmena misonggame je deî’ngga kam ’ndu lei. 45Sungkling benai pengêudibe kedeiloa ’ntûm kakge pe gu heguang teibe paîki sum gai gu lei. Sedu pechu mige ne ’ngngâgairabe kau ga ze beting kam gai gu lei.
Currently Selected:
DANIEL 11: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
