AMOS 3
3
1Ijipram gene pe kibaume gechu je I ne nguapatlume, Hei Israelme bau gau, Tingwang ne ningnui peireige ai sa’nsiagaibe sam saliabe ze seu le lau:
2“Kedeirei ge ziemmena zat leine ruage ningnui je runne I chî lei;
chipauziegene ningnui gu hemui-helut ramme leine ziegene ningnui je I ne tewsâ gai gu lei.
Kemeu’mpeu gu Tâ
3“Mihangna mâ hedei gai mak ze penai kangzangtew ze tat dui se mei?
4Hênamkang ge duilui pe gu hetak hang gabe luage ’nra-ra se mei?
Duilui poine mâ de tuî le mak ze pe ki gene ’nra-ra se mei?
5’Nruine pe hangge ’mpia gabe luage kedei ge ’mpia ge pa mi-mi semei?
’Mpia ze mâ de mi mak sede kedei gene ’ngkap-kap se mei?
6Namdi lungge hegeîluîkie ’mmut kai bei ze chige bamme ziemmename hing mak bam se mei?
Tingwang ne tew gai mak ze namdi ge kesiabe wangchang se mei?
7Pelingsing ze Tingwang Hera â,
pe luntewme kemeume dage pe gu hekimsam liâgaibe ga ze tâ mâ de tew mak lei.
8Duilui ne ’nra gai bei de lei;
châu hing mak ta ra lau?
Tingwang Hera ne sa gai bei de lei;
châu ne pauliâ gai mak ze bamchi ra lau?”
ze kacheube zeu.
Samaria gu Mi duânggabe Wangchangrabe
9Ashdod (Assiria) keloa ge keriengdi ramme bambe dage,
zai Ijipram ge keriengdi ramme bambe dage pauliâ gai ze,
acheu ze sa gai lau,
“Samaria deiloa ramme peireige ningnui wang’ndui kam gai lau,
zai pelung ge tewkakeleube kedibe ramme benai chige kategabe tâtewbe ramme bambe ze pie gai ni lau,” acheu zeu.
10“Ka’nzeibe tâ tewrabe tak ze penui chî mak lei,”
“penui gu keriengdi ramme ge kakebuakbe tatew benai sutteube tatew kaigekua ze bamme bau zeu,”
ze Tingwang ne kacheu de lei.
11Chidadege Tingwang Hera ne acheu ze sa lei:
“Heteureipeu ne heram ze tuaguâ gu lei,
zai ning dagene ning gu keriengdi ramme tei’nnakeu gai gu lei,
zai ning gu heguangki ramme tew’nsia kam ’ndu lei,” ze acheu zeu.
12Tingwang ne acheu ze sa lei: “Melireîpeu ne duilui mui gene meli pî kena mei nu, pe kuntû mei ze sutpatkaibe gum ze, Israelme Samaria namdi ge bamme je penui jeîkang benai jeîmik lu’mpam ze meupat kai bu lei,” ze acheu zeu.
13“Ningnui seu le lau,
zai Jakobbe kiduîme peireige sakki tew gai be lau,”
ze Tingwang Hera baudime Rapeu ne sa lei,
14“pe gu hedieka’ngkabe ramme ziegene Israel je I tewsabe mai ge Bethel ge herâtewbe bâm ramme je I tewhereu gai gu lei,
zai herâtewbe bâmra-kie ramme tew’nsia gai bei ze kedei ge ’ngngaîkeu gai du lei.
15Hetating ge bambeki benai gepuakting ge bambeki ze I ne bikauhiam gai gu lei;
zai hepuagim ne tewbe heki ramme ze ga gai gu lei,
zai heki kedibe ramme ze ga’nzâu gai du lei,”
ze Tingwang ne kacheu de lei.
Currently Selected:
AMOS 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
