AMOS 2
2
Moab Tedeu ge
1Tingwang ne acheu ze sa lei:
“Moab gu hedieka’ngkabe ramme kechum medai bamdibe ziegene tewsabe daurabe ze I tew’ntau ra mak lei;
pa ne Edom gu heguang ra ramme ze ’nnei gum ze rû-patkai’ndibe ziegeneu.
2Chidaze Moab peireige hemi I lang gai gu lei,
zai chize ne Kerioth gu keriengdi ramme rû’ngga kam gai gu lei,
zai Moab â ’nchuanuabe ’ncheu gene ka’nrungbe kuâ benai hegeîluîkie kuâ ne chai gu lei;
3chipau ruagene samrampeu je
I ne tew’ngga ’ndu lei,
zai chige Heguangsin me leine je du I ne pe dage tew’ngga’mpam gai ’ndu lei,”
ze Tingwang ne kacheu de lei.
Juda Tedeu ge
4Tingwang ne acheu ze sa gai lei:
“Juda gu hedieka’ngkabe ramme kechum medai bamdibe ziegene tewsabe daurabe I tew’ntau ra mak lei;
Tingwang gu hingde ze penui ne tuâ nan ze,
pe gu rawdiakkaibe-hingde ramme penui ne rei mak,
kane penui peume ne tewbe gum ze penui karasa sam ramme sabe zene penui je nguakezittatkaidibe ziegeneu.
5Chidaze Juda peireige hemi I lang gai gu lei,
zai chize ne Jerusalem gu keriengdi ramme ze rûkam ’ndu lei,” ze acheu zeu.
Israel peireige Hera Samrambe
6Tingwang ne acheu ze sa lei:
“Israel gu hedieka’ngkabe ramme kechum medai bamdibe ziegene tewsabe daurabe ze I tew’ntau ra mak lei;
penui ne ziemmena kapelingme je gepût mî hangge zua ze kegame je pîchûp pechin kat hangge zuabe ziegeneu—
7kelaksiame peî ze kedei ge chaîkeniak kai,
zai kategabe lieme je ’mpuî’ntai ’mbe ngeituagaime bau zeu;
pe na benai pe peu heleu’mpui hangkat dage tat lei,
a ji ka’nchibe ze tewhebâ ra hangge zeu;
8herâtewbe bâm leine hiage ’nchunggaileube paî ramme peireige penui jeirua lei;
zai penui Rapeu ki ge miramme ne ’nzuagaibe wain ze penui sak lei.
9“Acheuleusede penui masua gene Amorme zat je I ne tew’ngga kam gai de lei,
penui kaurayibe ze kedarching bang gum hu ze bam,
zai ’mpubang gum ze penui ranchi ze bamme bau zeu;
’nrei ’mbe pe gu perachî bambe benai ’ngkang ’mbe pemahiambe ze I ne tew’ngga kam ’ndi lei.
10Ijipram gene du ningnui je I ne nguapat kai lei,
zai hênam ge kum hedai riâ ningnui je I ne nguatat lei,
Amorme gu heram ze ningnui ne ’nram le ra hangge zeu.
11Zai ningnui na ’mpeumi hanggesame je kemeume chang ra,
zai ningnui gu rehangme hanggesame je Nazir kau ramme chang ra I ne teichu gai bei de lei.
Hei Israel gau,
chize gesang mak se mei?”
ze Tingwang ne kacheu de lei.
12“Kane Nazir kau ramme je wain sak ra ningnui ne tew gai bei,
zai kemeume je,
‘Kemeu sam ningnui pau ra mak lei,’ acheu ze ningnui ne samdie gai lei.
13“Pie le lau,
getumtimriang ge mekum ne kua’mpum bambe himkeu di gum ze,
ningnui je du I ne ningnui bambe bâm ge nîmgesip kai gu lei.
14’Ngngaine (’nruipoine) dagene liamchibe tak ze ga gai du lei,
zai peranchibe kau du peranchibe ze pe dage bam ta gu lei,
zai reziechibe kau ze du pe pum keringbe ze tew’nringchi lak ku lei;
15bai’mpi teipeu ze sap ra mak lei,
zai pe pî ne pakchipeu ze pe runne pechu tew’nring ra mak lei,
zai hekunchingchuapeu ze du pe pum keringbe ze tew’nring ra mak lei;
16zai peranchime ruage pelungchipeu du chipau mai ge â pumlâng paktat tu lei,”
ze Tingwang ne kacheu de lei.
Currently Selected:
AMOS 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
