Mātiu 17
17
Ko e Hā Fakakehe
(Ma‘ake 9:2-13; Luke 9:28-36)
1Pea hili ʻa e ‘aho ‘e ono mei ai, pea taki hake ‘e Si̇̄sū ‘a Pita mo e ongo tautehina ko Sēmisi mo Sione ki ha funga moʻunga mā‘olunga ke nau mavahe atu fakaekinautolu pē. 2Pea naʻe liliu ʻa e fōtunga ‘o Sīsuú, ʻi honau ʻaó, ‘o huhulu hono fofongá ‘o hangē ko e laʻaá. Pea ko hono kofú na‘e fetapaki ‘o hinehina ange he māamá.
3Pea ‘iloangé naʻe ‘asi mai ʻa Mōsese mo ‘Ilaisiā ‘o nau talanoa mo Si̇̄sū. 4Pea pehē ange ‘e Pita kia Si̇̄sū, ‟Ko e me‘a lelei mo‘oni, ‘Eiki, ‘etau ‘i heni̇́! Tuku ke u langa ha palepale ‘e tolu. Ko e taha mo‘ou, pea taha mo‘o Mōsese, pea taha mo‘o ‘Ilaisiā.”
5Pea lolotonga ʻa e kei lea ‘a Pitá mo e ngaʻunu mai ha konga ‘ao huhulu ‘o ʻufiʻufi kinautolu, pea ongo mai mei he ‘aó ha le‘o ‘oku pehē: ‟Ko hoku Foha ‘ofa‘angá ena. ‘Oku mātuʻaki leleiʻia ai hoku lotó. Mou fakaongo kiate ia!” 6Pea ʻi he fanongo ʻa e kau akó ki he le‘ó pea nau manavahē ‘aupito, ‘o nau tō fo‘ohifo ki he kelekelé.
7Pea haʻu ʻa Si̇̄sū ʻo ne ala hifo kiate kinautolu, ʻo ne pehē: ‟Tu‘u hake! ‘Oua ‘e manavahē!” 8Pea nau hanga haké, ‘oku ‘ikai ke toe ‘iloa ha taha, ka ko Si̇̄sū pē.
9Pea lolotonga ‘enau hifo mei he funga moʻungá, na‘e fakatokanga ‘e Si̇̄sū kiate kinautolu: ‟‘Oua te mou tala ki ha taha ‘a e me‘a na‘á mou mamata ki ai̇́ kae‘oua kuo toetu‘u ‘a e Foha ʻo e Tangatá mei he maté.”
10Pea ‘eke ange ‘e he kau akó kia Si̇̄sū, ‟Ko e hā hono ʻuhinga ‘o e lau ‘a e kau faiako laó ‘o pehē kuo pau ke tōmuʻa hoko mai ‘a ‘Ilaisiaá?”
11Pea tali ‘e Si̇̄sū, ‟Mo‘oni pē kuo pau ke mu‘omu‘a mai ‘a ‘Ilaisiā. Peá te ne fokotuʻufoʻou ‘e ia ‘a e me‘a kotoa. 12Ka ko hono mo‘oni̇́, kuo ‘osi hokomai ‘a ‘Ilaisiā ia. Ka na‘e ‘ikai ke fakatokanga‘i ia ‘e he kakai̇́, ka nau ngaohikovi‘i ia. Pea ‘e pehē pē foki mo ‘enau ngaohikovi‘i ʻa e Foha ʻo e Tangatá.”
13Pea toki mahino ai ki he kau akó, tā ko Sione Papitaiso na‘e ʻuhinga ki ai ‘a Sīsuú.
Ko e Fakamo‘ui ‘e Si̇̄sū ha Tamasiʻi na‘e Mahaki Moa
(Ma‘ake 9:14-29; Luke 9:37-43a)
14Pea ʻi he foki mai ‘a Si̇̄sū mo e ongo akó ki he kakai̇́, naʻe ha‘u ha tangata kia Si̇̄sū ‘o tūʻulutui atu ki ai ʻo ne pehē ange, 15‟‘Eiki, ʻalo‘ofa mai mu‘a ki hoku fohá! ‘Oku puke he mahaki moá, pea ‘oku lahi ʻene faingata‘a‘iá. Ko e taimi ʻe niʻihi kuo teka ki ha afi, pē tō ki ha vai. 16Pea naʻá ku ‘omi ia ki ho‘o kau akó, ka na‘e ‘ikai te nau lava ‘o fakamo‘ui ia.” 17Pea folofola ʻa Si̇̄sū: ‟He toki toʻutangata taʻe tui mo angakovi ʻeni! Te tau nofo ai pē mo kimoutolu ke a‘u ki fē? ʻE ngata ʻafē ʻeku kātakiʻi kimoutolú? ‘Omi e tamasiʻi̇́ ki heni!”
18Pea naʻe tuʻutuʻuni ‘e Si̇̄sū ki he tēvoló ke mavahe mei he tamasiʻi̇́. Pea mavahe mai leva ʻa e tēvoló, pea mo‘ui ʻa e tamasiʻi̇́ mei he taimi pē ko iā.
19Pea omi ʻa e kau akó ‘o nau talanoa fakaekinautolu mo Si̇̄sū, pea nau ‘eke ange, ‟Ko e hā na‘e ‘ikai te mau lava ai ‘o kapusi ‘a e tēvolo ko ʻeni̇́?”
20Pea talaange ‘e Si̇̄sū, ‟Ko hono ʻuhingá, he ‘oku si‘isi‘i ho‘omou tui̇́. Ko hono mo‘oni̇́ ʻeni ʻoku ou talaatú, ka naʻe lahi tatau ho‘omou tui̇́ mo ha fo‘i tengaʻi mūsita, ‘e lava ke mou pehē atu ki he fu‘u moʻunga ko eé, ‛Hiki hake ki hē!’ pea ‘e mahiki ia. Pea ‘e ‘ikai ha me‘a ‘e faingata‘a kiate kimoutolu.” 21Peá neonngo e faāhingá ni ʻoku ʻikai lva ke mahuʻi, ka ʻi he lotú pe mo e ʻaukai.
Ko e Lau ‘a Si̇̄sū ki He‘ene Pekiá
(Ma‘ake 9:30-32; Luke 9:43e-45)
22Pea ʻi he fakataha kotoa leva ‘a e kau akó ki Kāleli̇́, pea folofola ‘a Si̇̄sū kiate kinautolu, ‟Kuo pau ke lavaki‘i ʻa e Foha ʻo e Tangatá ki ha ni‘ihi te nau tāmate‘i ia. 23Ka ‘i he ‘aho hono tolu mei ai̇́ ‘e fakatoetu‘u ia mei he maté.” Pea loto mamahi ‘aupito ʻa e kau akó heʻene lau ko iá.
Ko e Totongi ‘o e Tukuhau Temipalé
24Pea a‘u atu ‘a Si̇̄sū mo ‘ene kau akó ki Kāpaneume. Pea omi ai ha kau tānaki tukuhau ‘o e temipalé kia Pita, ‘o nau ‘eke ange, ‟‘Oku totongi tukuhau koā ho‘omou faiakó?”
25Pea tali atu ‘e Pitá, ‟‘Io, ‘oku totongi tukuhau.”
Pea ʻi he hū atu ‘a Pita ki he loto fale na‘e nofo ai ‘a Sīsuú, teʻeki ke lea ‘a Pita kia Sīsuú, kuo talaange ‘e Si̇̄sū, ‟Saimone, ‘ai angé ha‘o lau! Ko hai ‘oku totongi tute mo tukuhau, ki he ngaahi tu‘i ‘o māmani̇́? Ko e faleʻaló, pē ko e kakai kehé?”
26Pea tali ‘e Pita, ‟Ko e kakai kehé.”
Pea talaange leva ‘e Si̇̄sū, ‟Ko ia! Pea tā ‘oku hao ʻa e kakai tonu ‘o e fonuá mei he totongi tukuhaú. 27Ka ‘oku tonú ke ‘oua te ta fakatupu ha maumau. ‘Alu koe ki tahi ‘o li̇̄ ho‘o afó. Pea ko e ʻuluaki ika te ne kai ho‘o māta‘ú, te ke fa‘ai hono ngutú ‘okú ne fa‘opuku ha foʻi pa‘anga siliva. Toʻo ia ‘e koe, peá ke ‘alu ‘o totongi ʻaki ‘eta tukuhaú.”
Currently Selected:
Mātiu 17: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.