Mātiu 16
16
Ko e Fekau ke Fai ha Fakamo‘oni
(Ma‘ake 8:11-13; Luke 12:54-56)
1Pea omi ai ha kau Fālesi mo ha kau Sātusi kia Si̇̄sū ‘o nau tauhele‘i ia ʻaki ‘enau kole ke ne fai ange muʻa ha mana mei langi̇. 2Ka naʻe talaange ‘e Sīsū, ‟Ka tō ʻa e laʻaá, pea ʻoku mou pehē: ‘E ʻafua ‘apongipongi, he ‘oku kulokula ʻa e langi̇́. 3Pea pongipongi haké, pea mou toe pehē: ‘E ‘alotāmaki ʻa e ‘ahó ni, he ‘oku kulokula mo pōpōʻuli ʻa e langi̇́. ‘Oku mou lava kimoutolu ‘o tala ʻa e me‘a ‘e hokó ʻaki pē ho‘omou sio hake ki he langi̇́, ka ‘oku ‘ikai te mou lava ‘o fakaʻuhingaʻi ʻa e ngaahi fakaʻilonga ‘o e kuongá ni. 4He toki kakai kovi mo anga fakalielia kimoutolu ʻoku mou kumi ki ha mana fakaofo! Ka ʻe ʻikai ʻaupito fai atu ia. Ko e fakaʻilonga pē naʻe fai kia Sioná ‘e ‘atu maʻamoutolú!”
Pea ‘alu leva ‘a Si̇̄sū mei he feitu‘u ko iá.
Ko e Lēvani ‘a e Kau Fālesí mo e Kau Sātusí
(Ma‘ake 8:14-21)
5Pea ʻi he a‘u atu ʻa e kau akó ki he kauvai̇́, tā kuo ngalo ‘iate kinautolu ke ‘ave ha‘anau mā. 6Pea folofola ange ‘a Si̇̄sū kiate kinautolu, ‟Mou tokanga pea vakavakai kimoutolu koeʻuhi̇̄ ko e lēvani ʻa e kau Fālesi̇́ mo e kau Sātusi̇́.”
7Pea nau fepehēʻaki, ‟Ko ʻene lea peheé nai ko e ‘ikai te tau omi mo ha fo‘i maá?”
8Pea ‘ilo ‘e Si̇̄sū ‘enau felāuaki̇́, pea naʻe ‘eke kiate kinautolu, ‟Ko e hā ‘oku mou felāuaki ai ʻiate kimoutolu, ‘i hoʻomou hala he foʻi maá? He meʻa tui vaivai moʻoni ko kimoutolu. 9‘Oku ‘ikai koā ke mahino ki homou ‘atamaí, pē te mou manatu‘i ‘eku pakipaki e ngaahi fo‘i mā ʻe nimá ma‘a e toko nimaafé? Ko e kato ‘e fiha na‘á mou tānaki ‘o fakafonú? 10Fēfē ʻa e fo‘i mā ‘e fitu ma‘a e toko fāafé? Ko e kato ‘e fiha na‘á mou tānaki mei ai̇́? 11Kuo teʻeki koā ke mahino kiate kimoutolu ‘oku ‘ikai ko ‘eku lau ki he maá? Ka ke mou lamalama kimoutolu koeʻuhi̇̄ ko e lēvani ʻa e kau Fālesi̇́ mo e kau Sātusi̇́.”
12Pea toki mahino ai ki he kau akó ‘oku ‘ikai ko ʻene akonaki‘i kinautolu ke nau faka‘ehi‘ehi mei he lēvani fakatupú, ka ko e akonaki ʻa e kau Fālesi̇́ mo e kau Sātusi̇́.
Ko Hai ‘a Si̇̄sū?
(Ma‘ake 8:27-30; Luke 9:18-21)
13Pea ʻi he fakaofiofi atu ‘a Si̇̄sū mo ʻene kau akó ki he feituʻu ʻo Sēsalia Filipai̇́, naʻá ne fehu‘i ange ki heʻene kau akó, ‟Ko hai nai ʻa e Foha ʻo e Tangatá ‘i he lau ʻa e kakai̇́?” 14Pea nau talaange, ‟ʻOku pehē ʻe he ni‘ihi ko Sione Papitaiso. Ka ʻoku lau ‘e he ni‘ihi ko ‘Ilaisiā. Pea ko e ni‘ihi, ko Selemaia, pē ko ha taha he kau palōfitá.”
15Pea naʻe toki ‘eke ange kiate kinautolu, ‟Ka ko hai au ‘i he lau ʻamoutolú?”
16Pea tali ange ‘e Saimone Pita, ‟Ko e Kalaisi̇́ koe, ko e ʻAlo ‘o e ‘Otua moʻui̇́.” 17Pea tali ‘e Sīsū, ‟‘Oku monū‘ia ʻa koe Saimone foha ‘o Sione! He ko e ‘ilo ko ená na‘e ‘ikai te ke ma‘u ‘iate koe pē, ka na‘e ‘oatu kiate koe ‘e he‘eku Tamai fakalangi̇́. 18Pea ko hono mo‘oni̇́, ‘e Pita, ko Maka koe, pea te u langa hoku siasi̇́ ‘i he funga maká ni. Pea ‘e ‘ikai lava ‘e he ngaahi matapā ʻo Maté, ‘o ikuna‘i ia. 19Te u ‘oatu kiate koe ʻa e ngaahi ki̇̄ ‘o e Pule‘anga ‘o Hēvani̇́. ʻIlonga ha me‘a te ke ta‘ofi ‘i māmani, ‘e ta‘ofi ‘i Hēvani. Pea ʻilonga ha me‘a te ke faka‘atā ‘i māmani, ‘e faka‘atā ‘i Hēvani.”
20Pea toki fakatokanga ‘e Si̇̄sū ʻene kau akó ke ‘oua te nau tala ki ha taha ko e Kalaisi̇́ ia.
Ko e Lau ‘a Si̇̄sū ki Heʻene Mamahi̇́ mo ʻene Pekiá
(Ma‘ake 8:31—9:1; Luke 9:22-27)
21Pea kamata mei he taimi ko iá, naʻe fakahā ange ‘e Si̇̄sū ki heʻene kau akó, ‟Kuo pau ke u ‘alu ki Selusalema pea ‘e lahi hoku fakamamahi‘i ai ‘e he kau mātu‘á ʻo e lotú, mo e hou‘eiki taulaʻeiki̇́, pea mo e kau faiako ʻo e Lao ‘a Mōsesé. Peá te nau tāmate‘i ai au. Ka ‘oka hili ha ‘aho ‘e tolu, ‘e fokotu‘u hake au mei he maté.”
22Pea taki ia ki he tafaʻaki̇́ ‘e Pita ‘o ne kamata valokiʻi: ‟‘Oua te ke lau pehē: ‘Eiki! ‘E ‘ikai ‘aupito hoko ha me‘a pehē kiate koe.”
23Ka naʻe tafoki ‘a Si̇̄sū ‘o ne pehē ange kia Pita, ‟Tu‘u ki mui Sētane! Ko e meʻa fakahumu koe ‘i hoku halá. He ‘oku ‘ikai ke faka-‘Otua ho‘o ngaahi fakakaukaú, ka ‘oku fakaetangata.”
24Pea toki folofola ‘a Si̇̄sū ki heʻene kau akó, ‟ʻIlonga ha taha ‘e fiekau mo aú, kuo pau ke ne tuku hono lotó ka naʻe fua hono kolosi̇́ ‘o kaungāfononga mo au. 25He ko ia ‘e loto ke fakahaofi ʻene moʻui̇́, ko ʻene tuku ia ke mole kotoa. Peá ka ʻilonga ha taha te ne foaki ʻene moʻui̇́ koeʻuhi̇̄ ko au, ko ʻene haofaki̇́ ia. 26He ka ma‘u ‘e ha taha ‘a māmani kātoa kae mole kotoa ai ʻene moʻui̇́, Ko e hā hano ʻaonga kiate ia? Ko e hā ha me‘a te ne toe lava ‘o foaki atu ke ma‘u ʻaki mai hono laumālié?
27He kuo vave ke hoko mai ʻa e Foha ʻo e Tangatá ʻaki ʻa e lāngilangi ‘o ʻene Tamai̇́ mo ʻene kau ‘āngeló. Peá te ne toki fakapale‘i ʻa e toko taha kotoa pē ‘o fakatatau ki heʻene tō‘ongamoʻui naʻe fai.
28Ko hono mo‘oni̇́ ʻeni ʻoku ou tala atú, ‘e teʻeki ke mate ʻa e ni‘ihi ʻoku tuʻu ‘i heni̇́, kuo nau mamata ki he Foha ʻo e Tangatá ‘oku hoko mai mo hono Pule‘angá.”
Currently Selected:
Mātiu 16: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.