Siuta 1
1
1Fetapa mo e Lotu ‘Alā Kāinga, ‘A kimoutolu kotoa pē kuo ui mo ‘ofeina ‘e he ‘Otua ko e Tamaí, ‘o ne malu‘i ma‘a Sīsū Kalaisi. Ko au Siuta ‘oku tohi atú, ko e sevāniti au ‘a Sīsū Kalaisi, ko e tokoua ‘o Sēmisi. 2Fakatauange ke fakalahi atu ai pē ‘a e manava‘ofá, mo e tāpuakí, mo e ‘ofá.
Ko e Kau Palōfita Loi
3Si‘oku ngaahi ‘ofa‘anga, na‘á ku loto ke fai atu ha tohi ‘o kau ki he ivi fakamo‘ui ‘o e ‘Otuá, ‘a ē ‘oku tau ‘inasi fakataha aí. Ka kuó u pehē eni ke kole pē ā kiate kimoutolu ke mou mateaki‘i ‘a e lotu kuo foaki tātu‘otaha mai ‘e he ‘Otuá ‘o ‘inasi ai hono kakaí. 4Me‘apango, kuo hū holo ‘i hotau lotolotongá ha ni‘ihi ta‘etui ‘oku nau tala, “‘Oku sai pē ‘etau fai fakalieliá, he ‘oku anga faka‘atu‘i ‘a e ‘Otuá ia.” Pea ‘oku a‘u pē ki he‘enau faka‘ikai‘i ‘a e talangofua kia Sīsū Kalaisi ko hotau Pulé pē ia mo hotau ‘Eikí. Ka kuo talu mei tuai mo e fakatokanga mai ‘a e Tohi Tapú ‘e faka‘auha e kakai ta‘e tui ko iá. 5Vakai na‘a ngalo ‘iate kimoutolu ‘a e me‘a na‘e hoko ki he kakai na‘e fakahaofi ‘e he ‘Eikí mei ‘Isipité. Na‘e ta‘e tui e ni‘ihi ‘iate kinautolu, ‘o ne faka‘auha kinautolu. 6Pea manatu‘i e kau ‘āngelo na‘e ‘ikai ke nau fai honau fatongiá, ‘o nau mavahe mei honau nofo‘anga totonú. Na‘e ha‘i seini ta‘e ngata kinautolu ‘e he ‘Otuá ‘i he fakapo‘uli ‘o lolofonuá, ke a‘u ki he ‘aho lahi ‘o e Fakamāú. 7Pea ko e toe fakatokanga ai pē foki kiate kitautolu ‘a e me‘a na‘e hoko ki Sōtoma mo Kōmolá, pea mo e ngaahi kolo ofi maí. Na‘e fai kovi ‘aupito honau kakaí, ‘o nau fai e ngaahi hia fakalielia kehekehe, ‘o tautea ai kinautolu ‘e he ‘Otuá ‘aki ‘a e afi ta‘engata, ko e fakatokanga ki he kakai kotoa pē. 8Pea ko e me‘a tatau pē ia ‘oku fai ‘e he kakai ‘oku ou tohi atu aí, ko ‘enau misi fakasesele, ‘o nau faka‘auha ai pē ‘e kinautolu honau sinó. ‘Oku nau faka‘ikai‘i e mafai kotoa pē, mo ta‘e toka‘i e kau ‘āngeló. 9Na‘a mo Maikeli, ‘a e ‘āngelo pulé, na‘e ikai ke ne ta‘e toka‘i e Tēvoló ‘i he‘ena fekihiaki he sino ‘o Mōsesé. Na‘e ngata pē he pehē ‘e Maikelí, “‘E tautea koe ‘e he ‘Eikí.” 10Ka ‘oku ta‘e toka‘i ‘e he kakai ko ená ‘a e ngaahi me‘a ‘oku ‘ikai ha‘anau ‘ilo ‘e taha ki ai. ‘Oku nau hangē ha fanga monumanu valé, pea ko honau iku‘angá pē ko e ‘auha. He ‘oku nau mo‘ui‘aki pē honau ngaaho ongo‘angá. 11Ko e kakai mala‘ia kinautolu! Kuo nau fou he hala ‘o Keiní, mo fa‘ifa‘itaki ki he mānumanu pa‘anga ‘a Pēlamí. Kuo nau angatu‘u foki ki he ‘Otuá, ‘o hange ko Kolá. Pea kuo pau ke nau ‘auha koe‘uhí ko e ngaahi me‘a ko iá. 12Ko e kakai kinautolu ‘oku fakalielia ‘enau ngaahi fakakaukaú, pea palakū mo siokita ‘enau tō‘ongá, ‘o moveuveu ai ko ena ho‘omou ngaahi keinanga‘angá. ‘Oku nau hangē ha ngaahi konga ‘ao ‘oku vilingia noa‘ia holo pē ‘i he matangí, kae hala‘atā ha me‘i ‘uha ‘e ma‘u ai. ‘Oku nau hangē ha ngaahi fu‘u ‘akau kuo hala he lau, pea ‘osi mata‘aki ‘o mōmoa, ‘o ‘ikai toe lava ke fua. 13Ko e ‘enau ngaahi tō‘onga palakuú, ‘oku hangē ko e fisihina ‘a e peau he moaná. ‘Oku nau hangē ko e ngaahi fetu‘u hē ‘o e vavá, ‘a ē kuo tuku tatali ma‘anautolu ‘e he ‘Otuá ‘a e ngaahi luo fakapo‘uli taha ‘i helí. 14Ko ‘Inoke ‘a e tangata hono fitu meia ‘Ätamá, pea ko ‘ene lau ki he kakai ko ená ‘ene pehē, “Vakai! Ko e ‘Eikí ena ‘oku hā‘ele mai mo ‘ene kau āngelo mā‘oni‘oni ‘e toko lauiafe 15ke fakamāu‘i e kakai kotoa pē. Pea ‘e tautea ai ‘e he ‘Eikí ‘a e kakai ta‘e tui kotoa pē, koe‘uhí ko ‘enau ngaahi kovi na‘e faí. Kuo pau ke ne tautea ‘a fo‘ilea kovi kotoa pē na‘a nau pu‘aki ki he ‘Otuá. 16Ko e kakai fa‘a lāunga mo ngulungulu kinautolu. ‘Oku nau fakatuituia ma‘u pē ‘enau ngaahi holi fakakakanó. Ko e kakai ‘ulu pupula, pea nau fakahekeheke‘i e kakaí ke lava honau lotó.
Ko e Ngaahi Fakatokanga
17Si‘oku ngaahi ‘ofa‘anga, vakai na‘a ngalo ‘iate kimoutolu ‘a e fakatokanga na‘e fai atu ‘e he kau ‘apōsitolo ‘a hotau ‘Eiki ko Sīsū Kalaisí. 18Na‘a nau tala atu, ka fakaofiofi leva ki he ngata‘anga ‘o māmaní, ‘e hoko mai ha kakai siokita mo ta‘e tui te nau manuki ki he ‘Otuá. 19Kuo ‘osi kamata ke nau ‘ai ke mou fekovikovi‘í. ‘Oku nau tokanga pē kinautolu ki he mo‘ui ko ení, pea ‘oku ‘ikai ke ‘iate kinautolu e Laumālie ‘o e ‘Otuá. 20Si‘oku ngaahi kaungāme‘a fafale, fai ai pē ho‘omou langá ‘i he fakava‘e toputapu ko ena ko ho‘omou tuí, ‘i he tokoni atu ‘a e Laumālie Mā‘oni‘oní ki ho‘omou lotu ki he ‘Otuá. 21Pea mou laka taha ai pē mo e ‘ofa ‘a e ‘Otuá mo talitali ai pē ke manava‘ofa hotau ‘Eiki ko Sīsū Kalaisí ‘o ‘oatu ‘a e mo‘ui ta‘e ngatá. 22Tokoni‘i e fa‘ahinga ‘oku kei tāla‘á. 23Fakahaofi e fa‘ahinga ‘oku kei heé, ‘o hangē ko ha‘amou hamusi ha taha mei ha loto afí. Fai manava‘ofa, mo e loto tailiili, ki he fa‘ahinga kuo ‘oku kei ‘efihia he ngaahi ‘ulungāanga fakakakanó, pea mātu‘aki faka‘ehi‘ehi mei he tō‘onga fakalielia ‘oku nau faí, pea na‘a mo hanau vala kuo likoliko ai.
Ko e Lotu Fakafeta‘i
24-25Mou fakafeta‘ia ‘a e ‘Otua ko hotau Fakamo‘uí koe‘uhí ko e ‘Eiki ko Sīsū Kalaisí! Ko e ‘Otuá pē ‘e taha ‘oku ne lava ‘o pukepuke kimoutolu ke ‘oua te mou humú, ka ne ‘omi kimoutolu ki hono ‘afio‘anga lāngilangi‘iá kuo mou haohaoa mo mavava. Talu e kamata‘anga ‘o māmani ‘o a‘u mai ki ‘ahó ni, pea a‘u ki he pā‘angangalú mo e taau ‘a e ‘Otuá mo e lāngilangi, mo e ngeia, mo e mālohi, pea mo e mafai kotoa pē. ‘Ēmeni.
Currently Selected:
Siuta 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
