2 Tīmote 1
1
Ko e Fakafe‘iloaki
1-2‘Alā Tīmote, ko si‘oku foha ‘ofeina, Ko au Paula ‘oku ou tohi atú. Ko e ‘apōsitolo au ‘a Kalaisi Sīsū. Ko e ‘Otuá pē na‘á ne fili au ke u ‘apōsitolo ‘o fanongonongo ‘a e mo‘ui kuó ne tala‘ofa‘aki maí. Ko e mo‘ui ia ‘oku fakafou mai ‘ia Kalaisi Sīsū ko hotau ‘Eikí. Tauange ke ke ‘inasi ai pē he ‘ofa ‘aufuatō mo e manava‘ofa mo e tāpuaki ‘a e ‘Otuá ko e Tamai pea mo hotau ‘Eiki ko Kalaisi Sīsuú.
Ko e Fakamālō mo e Na‘ina‘i
3‘Oku ou hūfia ma‘u pē koe he ‘aho mo e pō, peá u fakamālō ma‘u pē ki he ‘Otuá koe‘uhí ko koe. Ko e ‘Otua ia ‘o ‘eku ngaahi kuí, ‘a ē ‘oku ou fai loto-tau‘atāina ‘ene ngāué. 4‘Oku ou kei manatu ki ho lo‘imata na‘e toó, pea ‘oku ou faka‘amu ke ta fe‘iloaki, he ‘e fakafiefia ‘aupito ia kiate au. 5‘Oku ‘ikai ke ngalo ‘iate au ‘a e tui mo‘oni ‘a ho‘o fa‘eé, ‘a ‘Iunisi, pea mo ho‘o kui ko Loisí. Pea ‘oku mahino kiate au ko e tui ai pē ia ‘oku ‘iate koé.#Ngāue 16:1 6Pea ‘oku ou fie fakamanatu atu ai ke ke ngāue ‘aonga ‘aki ‘a e mafai ko ē na‘e foaki atu ‘e he ‘Otuá ‘i he‘eku hilifaki nima koé. 7He ko e Laumālie na‘e foaki mai ‘e he ‘Otuá, ‘oku ‘ikai ke fakatupu loto-fo‘i kiate kitautolu, ka ‘oku tau ma‘u ai e ivi mālohi, mo e loto-‘ofa, mo e loto-fakama‘uma‘u. 8Ko ia, ‘oua te ke mā hono fakafofonga‘i hotau ‘Eikí. Pea ‘oua te ke maa‘i au koe‘uhí ko ‘eku nofo pilīsoné, ka ke fie kau mu‘a he kātaki‘i ha ngaahi faingata‘a koe‘uhi ko e Ongoongo Leleí, he ‘e fakaivia ai koe ‘e he ‘Otuá.
9Na‘e fakahaofi kitautolu ‘e he ‘Otuá
peá ne fili kitautolu
ke tau hoko ko ‘ene kakai.
Na‘e ‘ikai ke tau taau mo ha ‘ofa pehē,
ka ko e fokotu‘utu‘u ia ‘a e ‘Otuá
talu mei mu‘a,
ko ‘ene ‘ofa ‘ata‘atā pē.
Na‘e te‘eki ai ke fakatupu ‘a māmaní
kuo ‘osi finangalo ‘a e ‘Otuá
ke ‘alo‘ofa ‘a Kalaisi Sīsū kiate kitautolu.
10Kuo hoko mai eni ‘a Kalaisi
ke faka‘ilo mai ‘a e anga-‘ofa ‘a e ‘Otuá.
Na‘e ikuna ‘e hotau Fakamo‘ui ko Kalaisí
‘a e maté,
peá ne fakahā mai e Ongoongo Leleí,
‘a ē ‘oku ma‘u ai e mo‘ui ta‘e ngatá.
11Ko hono fanongonongo ‘o e Ongoongo Lelei ko iá na‘e fili ai au ‘e he ‘Otuá ke u hoko ko e tangata malanga, mo e ‘apōsitolo, mo e faiako. 12Pea ko hono ‘uhinga ia ‘oku ou faingata‘a‘ia ai ko ‘ení. Ka ‘oku ‘ikai te u mā ai. He ‘oku mahino kiate au ‘a e toko taha ‘oku ou tui ki aí, pea ‘oku ou ‘ilo pau te ne lava ‘o malu‘i au ‘o a‘u ki he ‘Aho Fakamuí ‘a e me‘a kuó ne fakafalala mai kiate aú. 13Pukepuke-‘a-fufula ‘a e ngaahi fakahinohino na‘á ku fai atú. Pea ‘ai e tui mo e ‘ofa ‘a Kalaisí ko ho fa‘ifa‘itaki‘anga. 14Na‘e fakafalala atu ha koloa mahu‘inga. Tauhi ia. ‘E tokoni atu e Laumālie Mā‘oni‘oní, ‘a ē ‘okú ne nofo ‘i hotau lotolotongá. 15Kuó ke ‘osi ‘ilo‘i foki ‘a hono lī‘aki au ‘e kinautolu kotoa ‘i ‘Ēsiá, ‘o kau ai mo Faikelo mo Heamokena. 16Tauange mo e ‘Eikí ke ne ‘alo‘ofa ki he ‘api ‘o ‘Onesifoló. He na‘e tu‘o lahi ‘ene fakalotolahi‘i aú. Pea na‘e ‘ikai ke ne maa‘i ‘eku nofo pilīsoné. 17Pea ko ‘ene a‘u mai pē ki Loma ní, peá ne kumi leva au he feitu‘u kotoa kae ‘oua ke ne ma‘u. 18Tauange mo e ‘Eiki ko Sīsuú ke ne ‘alo‘ofa kia ‘Onesifolo he ‘Aho ko eé! ‘Oku ‘ikai foki ke puli ‘iate kimoutolu ‘ene ngaahi tokoni na‘e fai kiate au ‘i ‘Efesoó.
Currently Selected:
2 Tīmote 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
