1 Tīmote 3
3
Ko e Kau Taki Fakalotu
1‘Oku mo‘oni e laú, “Ko e fie ma‘u lakanga fakalotú ko e fiema‘u lakanga ‘eiki mo‘oni.” 2Ko hono ‘uhinga ia ‘oku taau ai mo e kau taki lotú ke lelei honau ongoongó mo mali mo e fefine pē ‘e taha. Kuo pau ke nau mapule‘i kinautolu, mo fakapotopoto, mo anga-fakamatāpule, mo mata kāinga, pea poto he faiakó. 3‘Oua ‘e taki ha taha ‘oku fu‘u lahi ‘ene inu kavá, pe ko ha taha ‘oku fakatupu kovi. Taki pē ha fa‘ahinga ‘oku anga-lelei mo anga-vaivai, pea ‘oku ‘ikai ke sio pa‘anga.
4Ke pule‘i lelei ‘e he kau taki fakalotú honau ngaahi fāmilí, pea tokanga‘i ‘enau fānaú ke mo‘ui talangofua mo anga-faka‘apa‘apa ma‘u pē. 5He kapau ‘oku nau vale he pule‘i honau ngaahi fāmili tonú, pea ‘e fēfē ‘enau tauhi e kakai ‘a e ‘Otuá?
6‘Oua ‘e taki ha taha na‘e toki tafoki mai. He ‘oku faingofua foki ke ‘ulu-pupula ‘a e fa‘ahinga peheé, pea iku ai pē ‘o faka‘auha fakataha kinautolu mo e Tēvoló. 7Ko hono faka‘osí, taki pē ha fa‘ahinga ‘oku faka‘apa‘apa‘ia‘i ‘e he kakai tua‘aá. Pea ‘e ‘ikai leva ke pō kinautolu ‘e he Tēvoló pea fakamā.
Ko e Kau Tokoní
8Ko e kau tokoní, ke fili pē ki ai ha fa‘ahinga ‘oku fakapotopoto. ‘Oua ‘e fili ha taha ‘oku fu‘u lahi ‘ene inu kavá, pe mānumanu koloa. 9Fili pē ha ni‘ihi ‘oku piki fakamātoato he ngaahi mo‘oni kuo fakahā mai ‘e he ‘Otuá ‘o felāve‘i mo ‘etau lotú. 10Tomu‘a sivi kinautolu. Pea ka mahino mai ‘oku nau fe‘unga ke ma‘u ha lakanga, pea toki tuku ke nau taki e ngāué.
11Ka ai ha kau taki fefine, ke nau anga-fakamātoato mo kinautolu. ‘Oua ‘e fili ha kau fefine ‘oku ngutu lau, pe fu‘u lahi ‘enau inu kavá. Fili pē ha fa‘ahinga ‘oku falala‘anga he me‘a kotoa ‘oku nau faí. 12Ko e kau tokoní, ke anga-nofo ki honau malí, pea pule‘i lelei ‘enau fānaú mo honau fāmilí. 13Ka ai ha ni‘ihi ‘e sia‘a ‘enau takí, kuo pau honau tokangaekina mo faka‘apa‘apa‘ia‘i ‘e he kāinga lotú, koe‘uhi ko ‘enau tui kia Kalaisi Sīsuú.
Ko e Koloa Fufū ‘o ‘Etau Lotú
14Ko ‘eku faka‘amú, ke vavé ni ha‘aku ‘a‘ahi atu kiate kimoutolu. Ka ko ‘eku tohi atu ko ení, telia na’a toe toloi ‘eku ‘alu atu, 15kae lava ke mou ‘ilo ‘a e fatongia ‘o e toko taha kotoa pē he fāmili ‘o e ‘Otuá, he ko e Siasi ia ‘o e ‘Otua mo‘uí, ko e makatu‘unga mālohi ‘o e mo‘oní. 16Ka u ‘ai atu e koloa fufū ‘o ‘etau lotú,
Na‘e hoko mai ‘a Kalaisi ko e tangata,
Pea fakahaa‘i ‘e he Laumālié
‘a e hoa ‘ene mo‘uí mo e finangalo ‘o e ‘Otuá,
Pea māta‘ia ia ‘e he kau ‘āngeló.
Na‘e malanga‘i ia ki he tukui fonuá,
Pea tui kiate ia ‘a māmani,
Pea ‘ohake ia ‘i he lāngilangi lahi.
Currently Selected:
1 Tīmote 3: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
