RUTH 4
4
Boaz leh Ruth kitenna
1Tuachi’n, Boaz kulpi kotkhah bul ah apeitou a, tua mun ah atou a; tualeh ngai vawi, Boaz in agenpa a sanggam kinaipi pen u’khu ahing pei a. Boaz in tua mipa kungah, “Lawm aw hing kihei inlen, tanah hing tou in,” achi a, tuachi’n akihei a, atouta hi. 2Tualeh Boaz in khum khopi a upate lah a mi sawm azawpi a, akung uah, “Tanah hing tou un” achia, tuachi’n atouta uhi. 3Tualeh a sanggam kinaipi penpa u’kungah, “Moab gam a kipata hing nua pei kia Naomi in isanggampa Elimelek gam azua a: 4Tuachi’n na kunga tana toute mitmu leh ka mite upate mitmu in leiin. Na tat nop leh tan inlen, hinanleh natat nuom sih leh hing hil in ka thei nuom hi. Aziehpen nanglou ngal atan ding dang a um sih hi, tualeh nang zom in kei ka hi chi hing theisah poimaw hiin ka thei hi,” achi hi. Tuachi’n aman “Ka tan ding hi” achi hi.
5Tuchin Boaz in “Naomi khut akipat agam nalei ni niin, mi shipa zi Moab numei Ruth akipata mishi min manglou a, agouluo ding mi a um zel theina dinga mishipa zi meithai Moab numei Ruth zong anei alamteng toh nalei khawm ding ahi,” a chi hi.
6Tualeh asanggam kinaipi penpa’n, “Keima dingin vang ka tan thei sih ding hi; khuchilouin pen keima gouneisate ka suthelthang kha ding hi, tan thei ka hina khu nangman tangmai in, tan zoulou ding ka hi zieh in,” achi hi.
7 #
Danp. 25.9
Nidanglai a Israelte lah a sil bangkim a suhdetna ding ua, akitatdan u’leh akihentuo dan uh tambang ahi; mi khat in akedap asut a, a khatpa kungah apie u’hi; tua khu Israelte lah a abawldan uh ahi.
8Tuaziehin asanggam kinaipipa un Boaz kungah “Nanga dingin lei zawmai in achi a; tuachi’n aman akedap asutta#Tami etsahna ahileh, Elimelek lou mun atan khe ding pan Ruth akitenpi nuomlou ziehin atankhe nuom ta sih hi, china a kedap a sut ahi. hi. 9Tualeh Boaz in upate leh mipi zousiete kungah, Naomi khut a kipat in Elimelek nei zousie leh Kilion leh Mahlon nei zousie ka leita hi chi, tuni’n atheipitute na uhi. 10#Danp. 25.5,6Tua guoh hilouin, asanggamte lah a kipat leh tam khopi min gelna bu akipat mishi min amanlou na dingin leh gouluotu abawlpieh theina dingin Mahlon zi Moab numei Ruth zong ka zi dingin kaleita hi chi, tuni’n noute tuami theipitute nahi uhi,” achi hi.
11 #
Siem. 29.31
Tualeh kul kotpi a um mi zousie leh upaten, “Theipitute ka hi uh. Na innsunga numei hing lut khu Mangpa’n Israel innkuon dingsahtu nite, Rachel leh Leah bangin siemta hen, tualeh nang pen Ephrathah phung sungah suonhuoi tahin um inlen, Bethlehem ah minthang tahin hing umta in. 12#Siem. 38.27-30Tualeh Mangpa’n tam nungah akipat hahlesuon nang ahing pieh ding khu Tamar in Juda ahinpieh Perez innkuon bang hing hita hen,” achi uhi.
13Tuachi’n Boaz in Ruth apui a, azi ahing hita hi; tuachi’n aluppi a, Mangpa’n nau apai sah a, tapa aneita hi. 14Tuachi’n numeiten Naomi kungah, “Tuni mama a Israelte lah a, amin manlouna dinga, sanggam kinaipi tasamlou a hing umsahpa Mangpa khu phat in umta hen. 15Ama khu na hinna tungdingpa leh na teh nua chienga hing vaa dingpa ahi ding hi; na mounu nangma hing it nu; tapa sagi sanga hoizawnu in ama ahingta hi, achi uhi. 16Tuachi’n Naomi in nausen khu ala a, a angsungah apom a, tuachi’n nauching nu ahing hita hi.”
17Tualeh a innveng numeiten amin aphuo pieh ua, “Naomi dingin tapa khat ahing pieng hi achi ua,” amin dingin Obed aphuota uhi. Ama David pu Jesai pa khu ahi.
18Tamte Perez hahlesuonte ahi uhi. Perez in Hezron ahinga, 19Hezron in Ram ahinga, Ram in Amminadab ahinga 20Amminadab in Nahshon ahinga, Nahshon in Salmon ahinga; 21Salmon in Boaz ahinga, Boaz in Obed ahinga, 22Tualeh Obed in Jesse ahinga, Jesse in David ahing hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.