ROM 2
2
Judate khelna
1 #
Mat. 7.1; Luk. 6.37 Tuaziehin Aw mihing, mi selhat koi hinan lachin zong suonlam ding mawngmawng neilou na hi, aziehpen midangte na mawsahna mama ah nangma siemlou kitangsah na hi; nang mi mawsahpain, amauh na mawsahna silte mama na bawl ziehin. 2Hinanleh tambang bawl mite tungah Pasian thukhenna khu thutah dungzui in atung hi chi ithei uhi. 3Aw nang mihing tambang bawl mite mawsah napia tuabang silte na bawl zel leh, Pasian thukhenna pel thei dingin na kingaisut amah? 4Ahisihleh Pasian hoina dawzouna leh thuoh hatna, hoina hausatna simmaw na hiei mah? Pasian hoinain kisiana ah nang ahingpui chi theilou na hiei mah? 5Hinanleh na lungtang khau dungzui a na kisia nuomlou ziehin, Pasian thangpaina ni leh thukhenna dihtat ahing kilat ni chienga ding in thangpaina na kikholkhawm ahi. 6#Late. 62.12; Thu. 24.12Ama’n michin asilbawl dungzui un, athuhkia ding hi. 7Thuohhatna zieh a silhoi bawl teitei a, thupina, pahtawina leh shi theilouna sui mite kungah kumtawn hinna ape dinga; 8Hinanleh amauh angsung khuola, thutah zuilou a, dihtatlouna zuite tungah, lungthahna leh thangpainate a um ding; 9Thuohgimna leh lunggimna nasatah, silgilou bawlte hagau tungah aum dinga, Judate hagau tungah aum masa ding a, Greekte hagau tungah zong a um ding hi. 10Hinanleh silhoi bawl poumate kungah, thupina, pahtawina leh lungmuonna pieh ahi dinga Judate kunga pieh masah ahi dinga, tualeh Greekte kungah zong pieh ahi ding hi. 11#Danp. 10.17Aziehpen Pasian in deisah tuom anei sih hi.
12Dan neilou a khelna bawl zousie, dan lou in amangthang ding ua, Dan nuoi a khielte zousie lah dan banga thukhenpieh in aum ding uhi; 13Aziehpen dan za mite pen Pasian mitmuin midih ahi sih ua, hinanleh dan banga bawlte pen midih ahi ding uhi; 14Aziehpen dan neilou Jentelten amaute ngaina dan abawl chiengun, dan nei sih nan u’leh tuate ama-ua dingin dan khat asuoh hi; 15Alungtang uah dan silbawlte akigiel hi chi alangsah uhi, tua khu asie leh pha theina un atheipi a, alungsimte uh kiniel in, siem leh siemlou akitangsah kawi kawi uhi. 16Ka khantanhoi gen dungzui a Pasian in Jesu Khrist zanga mihingte thuguh, vai ahawmpieh ni chiengin.
Judate mawsahna
17Ngai vawi, nang Judami kichi na hi a, dan na suong a, Pasian na kisahtheipi a, 18Pasian deilam nathei a, dan a hilin na um a sil hoi zawte na khenthei a, 19Tualeh nangma ngel khu mittote puipa leh miel a umte dinga vah hiin na kithei a, 20Dan a pil leh thutah umdan theina na nei zieh in, mi mote hilpa leh naungehte hilpa in na kigingta hi. 21Tuaziehin nang midangte hilpa, nangma kihillou na hiei mah? Guhtat lou ding ahi chia thugenpa’n, na gu zel maw? 22Nang, angkawmlou ding ahi chia genpa’n, ang na kawm zel maw? nang, milim kidahpa’n, milim biehna inn a milimte na gu zel maw? 23Nang, dan suongpa’n, na dan bawsiet ziehin Pasian na suminse zel maw? 24#Isai. 52.5Noute ziehin “Jentelte lah ah Pasian min gensiet in a umta hi,” chi a gel bangin.
25Dan na zuileh, teptan in phattuomna anei hi, hinanleh dan botse mi na hileh na teptan pen tanlou toh kibang ahita hi. 26Tuaziehin teptan lou miin dan thusete azui leh ateptanlou khu atan banga ngai hilou ding ahiei amah? 27Ngaina dan a teptanlou mi in dan azuikim leh, nang, dan laibu leh teptan dan agel a nei napi a, dan botse mi khu ahing mawpai sih ding amah? 28Apudanga Judami hi pen, Judami tahtah ahi sih a, akilanga tahsa maimai a teptan zong teptan chietvawt ahi sih hi. 29#Danp. 30.6Hinanleh asunggil a Judami hi khu, Judami chietvawt ahi, tualeh teptan chietvawt khu lunggil lam a tan ahi; dan laibu a gel mai hilouin, hagau ah ahizaw hi, Ama pahtat law khu mihing apat ahi sih a, Pasian apat ahizaw hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.