THUPILTE 17
17
1Kihau kawm kawm a ann neh ding tuitah,
inn dim a umna inn sung sangin,
kithutuoh tah a annkhing kam khat nehna,
innsung a nuom zaw hi.
2Suoh pil in zumna piengsah tapa tungah,
vai ahawm dinga,
tualeh asanggamte lah a khat bangin,
goutan anei ding hi.
3Sana leh dangkate,
meiphuolpi sunga etchien leh suhsieng ahi a,
mihing lungtang pen Mangpa’n a enchien a asiengsah hi.
4Silgilou bawlmi in kam gilou angaikhie a,
mi zuou in lah thuginalou gen lei lam ah abil adaw hi.
5Mi zawngte simmaw mi in,
ama Siempa simmaw ahi a,
tualeh vangsietna ni a,
kipah mi khu gawtlou in asuohta sih ding hi.
6Tehsete adingin atute uh amanglukhu uh ahi a,
tate athupina khu apulepate uh ahi.
7Mi mo a dingin thupha genna kam akilawm thei sih a,
leengpa adingin zuou genna kam akilawm maw dieh nalai hi.
8Silpieh khu aneitu mitmu ah suong mantam bang ahi a,
akiheina lam phot ah alaw ching ding hi.
9Koipou tatkhelna ngaidam itna asui a,
hinanleh thukhat avelvel a gen mi in,
alawm hoite nangawn akikhensah hi.
10Mi mo zakhatvei sat sangin,
mipil in khatvei phawhhilna athei siem zaw hi.
11Migilou in kiphinna ding maimai asui a,
tuaziehin atungah thangkou gilou khat,
ama dou dingin akisawl ding hi.
12Mi mo khat amot laitah a kituohpi sangin,
vawmpi noukai anou kiluoh pieh toh,
kituoh a ut huoi zaw hi.
13Koipou silhoi silhoiloua thuh kia mite,
innsung thusie in anuasie sih ding hi.
14Kihauna pat pen tui kiching hakhiet bang ahi a,
tuaziehin kihauna a um masangin kiselna tawpsan in.
15Koipou migilou siemtangsah a midih,
mawpai mite ani un Mangpa adinga,
kidahhuoi ahi uhi.
16Tuaziehin pilna leina dingin,
mi mo khut ah aman a um eimah,
tuakhu a dingin ama’n theisiemna anei sih,
chi thei in.
17Lawm khat in bangchihlai pouin a it ngitnget a;
sanggam khu vangsietna ni a dinga pieng ahi.
18Theisiemna neilou mi in a innvengte taang a,
mawpo dingin akichiem pai hi.
19Kihauna it miin khelna a it hi,
koipou akotpi tawisang in sietna asui hi.
20Koipou kiuohsahna lungtang nei mi in silhoi amusih a,
tualeh lei thulimlou neiin vangsietna atuoh hi.
21Tapa mo nei pa’n buoina ahingdoh a,
mi mo nu leh paten lungnopna aneisih uhi.
22Lungsim nopna khu chidamna damdawi ahia,
lungtang hasie in gute agawsah hi.
23Migilou in thudih a vaihawmna heikawina dingin,
golguhna sum adap neh hi.
24Sie leh pha khensiemna nei mi masangah pilna a um a,
mi mo mit khu kawlmong ah a um hi.
25Tapa mo pen apa adinga lungkhamna ahi a,
apienna anu a dingin khatna a hi.
26Mawna neilou mi gawt ahoi sih a,
miliente athudih zieh ua zep zong ahoituom sih hi.
27Koipou theina nei mi khu athugen ah akiveng a,
koipou lungsim tawldam mi in theisiemna anei hi.
28Mimo nangawn asip dide leh apil a ngai ahi a,
tualeh koipou akam sip khinkhian leh,
theisiemna nei khat a sim ahi.
Currently Selected:
THUPILTE 17: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.