THUPILTE 16
16
1Lungtang a kisahkholna khu mihing a ahi a,
lei a dawnna pen Mangpa akipat ahi.
2Mihing lampi zousie ama mitmu in asienga,
hinanleh Mangpa’n lungsim a tupnate tena in ate zel hi.
3Na sep nabawl ding pouma Mangpa kungah,
aap sieng lachin na ngaisutnate asudet ding hi.
4Mangpa’n sil zousie Ama a dingin abawl a,
migiloute nangawn zong ni hoilou a dingin asiem hi.
5Lungtang kisathei pouma Mangpa a dingin,
kidahhuoi ahi a,
kithutuoh nan u’le zong gawtlouin aum sih ding uhi.
6Khotuona leh thutah in gitlouna asawpsiengta a,
tualeh Mangpa giinna ziehin gitlouna ataisan uhi.
7Mihing khat umdan in Mangpa akipahsah chiengin,
amelmate nangawn ama toh kilem dingin abawl hi.
8Dihloutah a hauna tampi sangin,
dihtatna toh tawm noukhat nei ahoizaw hi.
9Mihing lungtangin agamtatna ding angaisut masa a,
hinanleh Mangpa’n akalsuonte apui zel hi.
10Leengpa kam sungah Pasian thutah a um a,
thukhenna ah akam in zuouthu agen sih hi.
11Buhna dih leh tena dih Mangpa a ahi a,
ip gihdante zousie Ama nasep ahi.
12Lengpa adingin gitlouna bawl khu sil kidahhuoi ahi,
aziehpen leengtoupha khu dihtatna a suhdet ahi.
13Dihtatna kamte leengte kipahna ahi a,
tualeh thudih gen pouma khu a it uhi.
14Leengpa lungthahna khu shina thangkou khat bang ahi a,
hinanleh mipilten asulungdam ding hi.
15Leengpa amaitai chiengin hinna a um a,
adeisahna pen guo nukhia zusah meilum bang ahi.
16Pilna mu khu sana sangin hoizaw hina va-ia e!
tualeh theisiemna khu dangka sanga tel zawh ding ahi.
17Midihte lamlien khu silhoilou taisan ahi a,
koipou alampi vengin ahinna avengbit hi.
18Kisahtheina khu sietna masangah apei a,
tualeh lungsim ki uongsah khu puasietna masangah apei hi.
19Mi kisatheite toh gallahsum hawm sangin,
mi zawngte lah a lungsim kingaingiem tah a umkhawm ahoizaw hi.
20Koipou kithuhilna piltah a ngaikhe mi in silhoi amu dinga,
tualeh koipou Mangpa muong mi ahampha ahi.
21Lungtang pil khu milemthei akichi dinga,
tualeh kam humin siemna apungsah hi.
22Theisiemna nei mi a dingin hinna tuinah ahi a,
hinanleh mi mote bawlhoina dinga thuhilna khu motna ahi.
23Mipil lungtangin akam ahil a,
tualeh akam ah pilna abelap hi.
24Thu lungdamhuoite hinna a dingin khuoizu humbang ahi a,
gu leh taanga dingin damna ahi.
25 #
Thu. 14.12
Mihinga dinga adih hileh kilawm lampi a um a,
hinanleh atawpna khu shina lampite ahi thei hi.
26Koipou nasemgim miin ama adinga sem ahi a,
aziehpen akam gilkielna in asepsah ahi.
27Pasian ngaisahlou miin silhoilou abawldoh a,
tualeh akamham nangawn meikuong abang hi.
28Mi kiuongsahin kihauna apiengsah a,
tualeh bilkawm a thudapgen siu siau in,
lawmta hoipen zong akikhensah hi.
29Thagum suonga gamtaten a innvengte azawl a,
tualeh lampi hoilou lam ah apeipi hi.
30Mit sih at a mihoupi mi in gitlouna angaituo a,
Amuh chidet mi in sietna atungsah hi.
31Tehsie samkang pen thupina manglukhu ahi a,
tam khu dihtatna gamtat apat kimu ahi.
32Koipou lungthah ha mi khu galhang mi sangin ahoizaw a,
tualeh koipou ama lungsim thuzaw mi khu,
khopi khat simzou mi sangin ahoi zaw hi.
33Pheipi tunga ai akisan hangin,
thukhennate pouma pen Mangpa a hing kipan ahi.
Currently Selected:
THUPILTE 16: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.