MATHIU 24
24
Pasian biehinn suhsiet a aum ding leh huntawpna ding Jesu’n agen lawhna
(Mak. 13.1-4; Luk. 21.5-6)
1Tuachi’n Jesu apawtdoh a, Pasian biehinn apat a apei lai in, Pasian biehinn kilamdan Ama ensah dingin anuazuite akungah ahing pei uhi. 2Tualeh Jesu’n akung uah, “Tam silte zousie na mu sih uh amah? Adihtahin ka hing hil ahi, suhchip lou dinga suong kithuop mawngmawng tanah a um sih hi,” achi hi.
3Olive muol tunga atou lai in, nuazuite amau’tang in akungah ahing pei ua, “Tam silte bangchih chiengin ahing um diei? Tualeh na hing pei kiana ding leh leitung tawpna ding chiemtena bang ahi diei?” hing hil in, achi uhi.
Hun hasa tunna ding
(Mak. 13.5-23; Luk. 21.5-24)
4Jesu’n amauh adawnga akung uah, “Koiman ahing sol louna dingin pilvang un. 5Mi tampi in, Khrist ka hi, chiin Keima min in ahing pei ding ua, mi tampi asol zou ding uhi. 6Tualeh kidouna leh kidouna thuthangte na za ding uhi. Na mangbat louna dingun pilvang un, tuate pen ahing tung ding mawng ahi, hinanleh atawpna ahi nai sih ding. 7Nam tuom leh namtuom akidou ding ua, gam tuom leh gam tuom akidou ding ua, tualeh mun tuom tuom ah kiel atung ding a, natna hi aleeng dinga, zil aling ding hi. 8Tamte zousie khu gentheina kipatna ahi ding hi.
9 #
Mat. 10.22
“Tua hun chiengin noute genthei thuoh dingin ahing mansah ding ua, ahing thatlum ding ua, tualeh ka min ziehin nam zousie huot na hi ding uhi. 10Tualeh mi tampi apua ding ua, khat leh khat akimansah ding ua, khat leh khat akimuda ding uhi. 11Tuahun chiengin guolnei tahlou tampi ahing pawtdoh ding ua, mi tampi asol zou ding uhi. 12Tualeh gitlouna apun ding ziehin ki itna adai deu deu ding hi. 13#Mat. 10.22Hinanleh atawp donga thuohzou pouma hundamin a um ding hi. 14Tualeh tami leenggam khantanhoi khu nam zousie theisahna dingin, leitung pumpi ah hilin a um dinga, tuazou chiengin atawpna ahing tung ding hi.
Gimthuohna thupi hing um ding
15 #
Dan. 9.27; 11.31; 12.11 “Tuazieh in sumangthaipa kidahhuoi, guolnei Daniel in ana genpa, mun siengthou a hing ding na mu chieng un (asim pouma in theisiem uheh.) 16Tua hun chiengin Judia gam a umte taangte ah tai uheh. 17#Luk. 17.31Inn tunga umte zong, a inn sung a bang ahiei ladoh dingin hing kumsuh sih heh. 18Lou a umte zong, apuonsilte la dingin hing nuakia sih heh. 19Tua ni chiengin agaite leh naungeh neite tung agih hi! 20Na taimang hun ding uh phalbi lai leh khawlni ahi louna dingin thungen un. 21#Dan. 12.1; Kihil. 7.14Aziehpen tua hun chiengin gimthuohna huoisetah um ding ahi, tuabanga gimthuohna huoisie khu leitung siemchil apat tuni tandongin a um ngai nai sih a, um zong a umkia nawn sih ding hi. 22Tua nite khu suhtom hisihleh mihing mawngmawng ahinga hutdoh ahi sih ding hi, hinanleh telte zieh in tua nite suhtom ahi ding hi.
23Tua hun chiengin, mi koipou in na kung ua, En vawi tanah Khrist a um hi, ahisihleh khunah a um hi, chinan uleh tahsang sih un. 24Aziehpen Khrist tahlou leh guolnei tahlou ahing pawt dinga, chiemtena leh sil lamdangte hing ensah in ahing sol ding uhi; tuaten hithei liei leh telte nangawn zong asol ding uhi. 25Ngai un, ka hing hil masah na hita uhi. 26#Luk. 17.23,24Tuazieh in, na kung ua, En vawi, gamdai ah aum, ahing chi u’leh peidoh sih un, En un, pindan sung tawngah a um achi u’leh zong tahsang tuom sih un.
Ahing pei kiana ding
(Mak. 13.24-27; Luk. 21.25-28)
27Suohlam a tunphe ahing pheta tumlam dong asalvah bangin, Mihing Tapa hing pei kiana zong tuabangma ahi ding hi. 28#Luk. 17.37Heisung hinanleh shiluong umna phot ah Langtate#Langtate-ganpulne mulien chikhat (Musane zong akichi hi) zong a um khawm ding hi.
29 #
Isai. 13.10; Joel. 2.10,31; 3.15; Kihil. 6.12; Isai. 13.10; Ezek. 32.7; Joel. 2.10; 3.15; Isai. 34.4; Kihil. 6.13 “Gimthuohna nite zoutah chiengin, ni suhmiel in a um dinga, hapi zong avah nawnsih ding hi, van a kipat in aasite ake ding a, tualeh van silbawltheinate suhling ahi ding hi. 30#Dan. 7.13; Zek. 12.10-14; Kihil. 1.7Tua hun chiengin van ah Mihing Tapa chiemtena ahing kilang dinga, tua hun chiengin, leitung nam zousie in asuun ding uhi, tualeh Mihing Tapa khu silbawltheina leh guolzawna thupitah toh van meilum tunga hing pei amu ding uhi. 31Tualeh avansawlsiengte pengkul ging ngai thupitah toh ahing sawl dinga, amaun lei ning li a kipat leh van mong langkhat akipat alangkhat dongin, atelte akhawm ding uhi.
Theipi kung gentena
(Mak. 13.28-31; Luk. 21.29-33)
32“Tuachi’n theipi kungah gentena thu zil un: Abate ahing men a, anate ahing selnou chiengin, nipi anaita chi na thei uhi. 33Tuachimabangin nouten zong tam silte na mu chieng un, Ama ahing naita a, kotkha bul mama ah aumta hi chi thei un. 34Chitahtahin Ka hing hil ahi, Tam silte zousie atunkim masangsie’n tulai khangthate amang sih ding uhi. 35Lei leh van amang dinga, hinanleh ka thu amang sih ding hi. 36“Hinanleh tua ni leh ahun ding thu khu, koiman athei sih a, van a vansawlsiengte leh Tapa nangawn in zong athei sih a, hinanleh ka Pa maimai in athei hi. 37#Siem. 6.5-8Noah damlai mabangin, Mihing Tapa hing pei kiana zong ahi ding hi. 38Tuani a tuichim tun masangin Noah kuong sunga alut ni dongin, ane un adawn ua, zi leh pasalin a kinei ua, 39#Siem. 7.6-24tualeh tuichim ahing tunga, abawn ua alahmang masangsiein bangma athei sih uhi; Mihing Tapa hing pei kiana zong tuabang ahi ding hi. 40Tua hun chiengin lou ah mi ni a um ding ua, khat lahmang in a um ding a, khatpen nuasie ahi ding hi. 41Numei ni ann sukhawm in a um ding ua, khat lahmangin a um ding a, khat pen akinuasie ding hi.
42Tuazieh in kiging un, na Mangpa uh bangchih hun a hing pei ding ahiei chi na theilou zieh un. 43#Luk. 12.39,40Hinanleh tami thei un, inn neipa’n guta hing pei ding hun thei leh, aveng ding a, a inn aphetvang sah sih ding hi. 44Tuazieh in noute zong kiging zing un, na gintat lou hun laitah ua, Mihing Tapa hing pei ding ahi ziehin.
Suoh hoi leh hoilou gente thu
(Luk. 12.41-48)
45“Suoh muonhuoi, pil tah apu in ahun chin a, atan ding uh hawmpieh dinga, a innkuonpite tunga houtu dinga, akoi khu koi ahi diei? 46Apu ahing pei chieng a, tuabanga bawla ahing mu, tua suohpa khu ahampha hi. 47Chitahtah in ka hing hil ahi, aman tua suohpa khu anei zousie tunga vaihawm in apangsah ding hi. 48Hinanleh suoh gilou in alungsim in Ka pu hing tung pai zuai sih nava, chiin, 49asuoh hipite na vuoin, zukham annkhamte toh na ne in na dawnkhawmta leh, 50tua suohpa pu khu, agintat lou ni, akiven lou laitahin ahing tung ding a, 51tua suohpa khu tun ni asuo dinga, milepchiete tan bangbang atangsah dinga, khunah ka leh ha gawt a um ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.