MATHIU 22
22
Kitenna anzaluina gente thu
1Tualeh Jesu’n amauh ahoupi a, akung uah gentena thu agen kia hi. 2“Van gam khu leengpa koi ahiei in, atapa dinga kitenna annzaluina a bawl toh a gente hi. 3Tualeh aman kitenna anzaluina a, chielte han dingin asuohte asawl a, hinanleh amaute ahing haw nuom sih uhi. 4Aman asuoh dangte asawl kia a, chielte kung ah, Ngai un, ka anzalui ka manta a, ka bawngtalte leh ka gan vahthaute ka gouta a, bangma zousie mansa ahita, kitenna ankuong im dingin hing peita un, va chita un, achi hi. 5Hinanleh amaun ana thusim sih ua, khat alou ah, khat asummet bawlna ah, akipeimangta uhi. 6Tualeh adangten asuohte aman ua, simmawhuoi tahin abawl ua, athatta uhi. 7Hinanleh leengpa’n tua thu azah tahin alungthahta a, tualeh agalkapte asawl a, tua tuolthatte asumang a, akhopi uh ahaltum piehta hi. 8Tuachi’n aman asuohte kungah, kitenna ankuong mansa ahita, hinanleh ka chielte lah ne taah ahi sih uhi. 9Tuaziehin lamkathuomte ah pei unlen, tualeh na mu taphot uh, kitenna ann ne dingin hing chiel un, achita hi. 10Tuachi’n tua suohte khu apawt ua, lamkathuomte a va pei in amu pouma uh, misie leh miphate zong abawn un ahing hankhawm ua, tualeh kitenna innsung khu michielte in ahing dimta hi.
11“Hinanleh leengpa khu michielte en dinga ahing lut leh, kitenna puon sillou mi khat khunah amuta hi. 12Tuachi’n ama’n akungah, Lawm bangchidan ahiei kitenna puon sillou a tana na hing lut? achi hi. Tualeh ama ahamta sih hi. 13#Mat. 8.12; 25.30; Luk. 13.28Tuachi’n leengpa’n asuohte kungah, akhut leh akeng kaan unlen, pulam miel ah paidoh un, khunah kaa leh hagawina a um ding hi. 14Chielte tampi ahi ua, telte tawmnou ahi uh,” achi hi.
Sie pieh thu a dohna
(Mak. 12.13-17; Luk. 20.20-26)
15Tuachi’n Pharisaite apawtdoh ua, athugente apat amat theina dingun ava kikum khawm uhi. 16Tualeh amaun anuazuite u’leh Herod pawlte akungah asawl ua, tua miten akungah, “Siepa midihtah na hia, Pasian lam thu dihtahin na hil a, khawh sahtuom koima na nei sih chi ka thei uhi, aziehpen koima khentuom na nei sih hi. 17Tuaziehin hing hil in bang na chi ngai ei? Kaisar kunga sie pieh asieng ei, sieng lou?” achi uhi.
18Hinanleh Jesu’n alungsim gitlou dan uh athei a, akung uah, nou milepchiete “Bangdinga kei hing ze et na hi uoi? 19Sie sum khu hing ensah un” achi hi. Tuachi’n amaun makhai khat akungah ahing tawi uhi. 20Tualeh Aman akung uah, “Tami koi lim leh koi min ahiei?” achi hi. 21Amaun akung ah “Kaisar” a achi uhi. Tuachi’n Aman akung uah, “Kaisar silte Kaisar kungah pie unlen, Pasian silte Pasian kungah pie un,” achi hi. 22Amaun tam thute azah tah un, lamdang asata ua, Ama anuasie ua, apei mangta uhi.
Thawkiana thu dohna
23 #
Nasep. 23.8
Tuami ni main, Saddukaite, thawkiana aum sih chite Akungah ahing pei ua, Akung ah, 24#Danp. 25.5“Siepa aw, Mosi in mi khat ta neilou a ashi leh, asanggampa’n azi aluo ding a, asanggampa dingin chi ahahpieh ding ahi, achi hi.#Judate dan dung zui a, amounu meithai toh kiten pen ngaina dan ahi. 25Tuin ka kung uah, sanggam pasal sagi a um ua, tualeh a upa pen in zi anei a, ashita a, chihah anei lou zieh in azi pen a sanggampa kungah anuasieta hi. 26Tuamabangin anina pa zong ashi a, athumna pa in aluo a, asagina dongin akitenpi chietta uhi. 27Tuachi’n atawpna pen ah, numeinu zong ashita hi. 28Tuaziehin thawkiana ah, amanu khu sagite lah ah koipen zi ahita diei? Abawn un akitenpi chiet ngal ua, chi’n adong uhi.”
29Jesu’n adawnga akung uah, “Laisiengthou leh Pasian silbawltheina na theilou ziehun, na sukhiel leng uhi. 30Thawkiana ah kitenna aum nawn sih ding a, vansawlsiengte abang zawta ding uhi. 31Hinanleh mishi thawkiana thu a, Pasian in na kung ua agen khu simkha ngailou na hi uoi mah? 32#Pawt. 3.6Kei Abraham Pasian, Isaak Pasian, leh Jakob Pasian ka hi, achi khu. Pasian khu mishi Pasian ahisih a, Mihing Pasian ahizaw hi,” achi hi. 33Tualeh mipiten tam thu azah tah un, athuhilte lamdang asa mama uhi.
Thupieh lienpen thu a dohna
(Mak. 12.28-34)
34Jesu’n Saddukaite gen ding theilouin aniel dongta chi Pharisaiten azah tah un, ahing kikhawm uhi. 35Tuachi’n alah ua dansiem mi khat in, Ama ze etna in thu khat adong a, 36“Siepa aw, dan thu ah thupieh lienpen bang ahiei?” achi hi.
37 #
Danp. 6.5
Jesu’n akungah, “Mangpa na Pasian khu na lungtang zousie in, na hagau zousie in, tualeh na lungsim zousie in, na it ding ahi. 38Tami thupieh masa leh lienpen ahi. 39#Siempu. 19.18Anina khu tambangma ahi a, Nangma na ki it bangin na inn vengte it in. 40#Luk. 10.25-28Tam dan thupieh tegel tungah, dan thu leh guolneite thu zousie akikhaikhawm sieng ahi,” achi hi.
Messiah thu dohna
(Mak. 12.35-37; Luk. 20.41-44)
41Pharisaite akikhop lai un, Jesu’n amauh thu adong a, 42Khrist khu “Bang na chi ngai uoi? Koi tapa ahiei?” achi hi. Amaun “David tapa ahi,” achi uhi.
43Aman akung uah, “Tua ahileh bangchidan a, David in hagau a Ama khu,
44 #
Late. 110.1
Mangpa’n ka Mangpa kungah,
Na melmate na kengtaw nuoi a,
Ka koi masangsie’n,
ka ziet langah touin, chia,
Mangpa achi ahiei?”
45David in Ama khu Mangpa achi leh atapa bang achi hi diei? achi hi. 46Tuachi’n koiman ama kam khat in zong adawng thei sih ua, tua ni akipat in koiman thu dang mawngmawng adong kia ngam nawn sih uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.