MATHIU 20
20
Grep huona nasemte gente thu
(Mak. 10.31)
1“Vangam khu gamneipa khat agrep huon a nasem ding mi chiel ding a zingmawng matah a kuonkhie bang ahi. 2Ama’n anasem dingte toh ni khat a makhai#Makhai-Danarius-Italite sum ahia, nikhat thaman tawmpen ahi. khat law dinga akithukim tahun, agrep huon ah asawlta hi. 3Ama khu nai kuo ding vel in apawtdoh a, mi dangte van zuana muna mawh dinte amu a, 4Akung uah, nou zong grep huon ah vakuon un, akilawm hun ka hing pen a ding hi, achi hi. Tuachi’n amau’zong akuonta uhi. 5Tualeh sunkim leh nitah lam nai thum ding velin ava pawtdoh kia a, tuabangmain ava bawl kia hi. 6Tualeh nitahlam nai nga ding vel in ava pawtdoh kia a, midang ding maimaite amu a, aman akung uah, Bangdinga sunnitum a tana mawh din na hi uoi mah? achi hi. 7Amaun akungah, Koiman ahing goi lou zieh in achi uhi. Aman akung uah noute zong grep huon ah va kuon un, akilawm bang zel na mu ding uhi, achi hi.
8 #
Siempu. 19.13; Danp. 24.15 Tuachi’n nitahlam ahing hitahin, grep huon neipa’n asumkempa kungah, nasem mite han inlen, anukhia pen apat in amasa pen tan in alaw uh pie in, achi hi. 9Tuachi’n nitahlam nai sawm leh khat ding vel in, ami goite uh ahing pei u’leh makhai khat chiet asang uhi. 10Akuon masate ahing pei un, mu tam deu dingin akingaituo ua, hinanleh amaun zong makhai khat chiet ma asang uhi. 11Tualeh sum asan zou un, gam neipa tungah aphunta uhi. 12Tam anukhia pente’n naikal khat sung beh na asem ua, kou nisa thuoh a khosa kai a, sun nitangtum a semgimte toh na hing kibangsah hi, achi uhi.
13Hinanleh aman alah ua mi khat adawng a, Lawm aw na tungah bangma ka bawlkhiel sih hi, makhai khat law dinga kihoutuoh hilou imah? 14Nangma a kilah inlen peitain, tam anukhia pen kungah zong nang ka hing pieh bangin ka pe nuom hi. 15Ka neisa ka ut ut a ka bawlthei hinalou amah? Ka hoi zieh a thangsie na hiei mah? achi hi.
16 #
Mat. 19.30; Mak. 10.31; Luk. 13.30 Tuamabangin anukhia pente amasa pente ahing hi ding ua, amasapen te anukhiapente ahing hi ding uhi. Aziehpen chielte tampi ahi ua, telte tawmnou ahi, achi hi.
Jesu’n ashiding agen thumveina
(Mak. 10.32-34; Luk. 18.31-34)
17Jesu’n Jerusalem khuo a apeitou lai in anuazui sawm leh nite Lampiah atuom in azawpi a akung uah, 18“Ngai un, Jerusalem zuon a peitou ihi ua; Mihing Tapa khu Siempu liente leh laigiel mite khut ah matsah in a um dinga, tualeh amaun shi dingin amawpai ding uhi. 19Tualeh Ama khu chiemmui bawlna ding leh zep ding leh Kross a kilbeh dingin Jentelte khut ah ape ding uhi. Tualeh Ama ni thum niin athou kia ding hi, achi hi.
Leitung zatatna ngetna
(Mak. 10.36-45)
20Tuachi’n Zebedi tapate nu atapate toh Jesu kungah ahing pei ua, akhupboh a, Ama apat bang ahiei deisahna khat angen hi. 21Tuachi’n Aman amanu kungah, “Bang ahiei na dei?” achi hi. Amanu’n akungah, “Tam ka tapate gel na leenggam ah khat na ziet langah khat na veilang a tou dingin deisahna pie in,” achi hi.
22Hinanleh Jesu’n adawnga, “Na nget khu na thei sih hi. Nouten ka nou dawn ding na dawn thei ding uoi? Tualeh ka baptisma tan ding na tang thei ding uoi?” achi hi. Amaun akung ah, “Thei e,” achi uhi.
23Tuachi’n Aman akung uah, “Ka dawn ding nou khu na dawn ngei ding ua, Ka baptisma tan ding zong na tang ngei ding uhi, hinanleh ka zietlam leh ka veilam a tousah ding thu pen Keima pieh ding ahisih a, ka Pa’n abawlpiehsate ading ahibou hi,” achi hi.
24Tualeh sawmten tam thu azahtah un, sanggam nite gel tungah alungthahta uhi.
Thupina dihtah
25 #
Luk. 22.25,26 Hinanleh Jesu’n amaute akungah ahan a, “Jentel vaihawmte atung uah alien mama ua, tualeh milien milalten atung uah thu anei mama uhi, chi na thei uhi. 26#Mat. 23.11; Mak. 9.35; Luk. 22.26Hinanleh noute lah ah tuabang ding ahisih hi, koihitaleh na lah ua let ding lunggul pouma, na nasem un pang phot heh. 27Tualeh na lah ua, masapen hi nuom khu na suoh un pang phot heh. 28Mihing Tapa nangawn zong naseppieh a um ding in ahing pei sih a, nna sem ding leh mi tampi tatna dinga ahinna pe dinga hing pei ahizaw hi, achi hi.
Mitto ni in mitvahna amu uh
(Mak. 10.46-52; Luk. 18.35-43)
29Jeriko khuo apeisan tah un mipi tampiin Ama azui uhi. 30Tualeh Ngai vawi, mitto ni lamgei a touten Jesu lampi ah apei hi chi azah tahun, “Aw Mangpa David Tapa ka tung uah zangai in,” chi’n akikouta uhi.
31Tuachi’n mipiten sip dingin avau ua, hinanleh amaun, “Aw Mangpa David Tapa ka tung uah zangai in” chi’n akikou semsemta uhi. 32Tuachi’n Jesu ading denta a, amaute ahan a, “Na tung uah bang bawlleng na ut uoi?” achi hi. 33Amaun akungah, “Mangpa mitvah ka ut uh” achi uhi. 34Tuachi’n Jesu’n ahepi a, amit uh athampieh a, tualeh thakhat in amu thei pai ngal ua, tualeh Ama azuita uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.