SIEMPUDAN 3
3
Lemna sillat
1“Tualeh asillat khu lemna sillat kithoina ahi a, ganhon lah a alat leh atal ahiei anu ahiei ahilezong Mangpa mai a nuolnabei alan ding hi. 2Tualeh asillat tungah akhut akoi dinga, kimutuona biehbuh kotbul ah athat dinga, tualeh Aaron tapate siemputen maitam tung kimvel ah sisan athe ding uhi. 3Tuachi’n aman lemna sillat kithoina mei a sillat Mangpa kungah alan ding hi; a sungthau leh a gilbom tunga athau um zousie leh; 4kal nite leh atunga tuomtu a thaute leh asin tunga um athaute leh akalte alakhe ding hi. 5Tualeh Aaron tapaten maitam tunga mei kitaw tunga sing kichieng tungah ahal ding uhi, tuakhu Mangpa a dinga mei a sillat gimnamtui tah ahi ding hi. 6Tualeh Mangpa a dinga lemna sillat kithoina a asillat belam hon lah a ahileh atal hiin anu hitaleh nuolnabei alat ding ahi. 7A sillat dinga belamnou alat leh Mangpa masang ah alan ding hi. 8Tualeh a sillat tungah akhut angam dinga kimutuona biehbuh maiah athat dinga, Aaron tapaten sisan khu maitam kimvel ah athe ding uhi. 9Tualeh lemna sillat kithoinate apat Mangpa adinga mei a sillat alat ding ahileh amei a um athaute achinggu tanin ala dinga, a sungthaute agilbom thaute leh; 10Akal nite tunga athau umte, athepnem a athaute leh asin tuomtu alap leh akalte nangawn alakhe ding hi. 11Tamte siempu in maitam tungah ahal dinga; tam khu Mangpa dinga mei a sillat ann ahi ding hi. 12Tualeh asillat khu kel ahileh Mangpa mai ah alan ding hi. 13Tualeh aman asillat lutung ah akhut angam dinga kimutuona biehbuh mai ah athat dinga tualeh Aaron tapaten asisan khu maitam kimvel ah athe ding uhi. 14Tualeh khunah asillat pen alan dinga, Mangpa ading a, mei-a sillat bangin; agilzam tuom athaute leh gilzam thaute leh, 15a kal nite leh atunga thaute, athepnem kawma um alapte leh asin leh akalte tuomtu athaute nangawn alakhe ding hi. 16Tualeh khum khu siempuin maitam tungah ahal ding ahi, tuakhu gimnamtui tah dinga mei a sillat ann ahi dinga, athau zousie Mangpa a ahi. 17Sathau ahiei, sisan ahiei naneh dinguh ahisih chi nahah nasuonte ua dingin zong na tenna mun phot uah, thupieh ahi ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.