SIEMPUDAN 2
2
Ann sillat
1“Mi koipou in ann sillat Mangpa kunga alat chiengin, a sillat khu tangbuong nel ngingei ahi ding hi, tualeh atungah sathau abuoh dinga, gimnamtui akoi ding hi. 2Tuakhu Aaron tapate siempute kungah ahing tawi dinga, tangbuong nel ngingei sipdim khat sathau leh gimnamtui teng toh alakhe dinga, tuakhu siempu in maitam tungah theizingna dingin, Mangpa dinga gimnamtuitah mei a sillat hi dingin ahal ding hi. 3Tualeh ann sillat a kizangmawhte khu Aaron leh atapate ading ahi ding; tuakhu Mangpa adinga mei a sillatte lah a asiengthou pen ahi ding hi.
4“Tualeh ann sillat lungthu tunga em minsa lat dinga na hing tawi leh tangbuong nel sathau toh kipawi tolsawlou ahiei, ahisihleh sathau kinu tanghou tolsawlou tanghoupheng pan ahi ding hi. 5Tualeh na sillat khu khangbel a kikang ann sillat ahileh, tolsawlou sathau toh kimeh tangbuong nel ngingei ahi ding hi. 6Na atnen dinga sathau na buoh ding ahi; tam khu ann sillat ahi.
7Tualeh na sillat khu khangbel a kikang ann sillat ahileh, tangbuong nel nginngei sathau a kimeh ahi ding hi. 8Tualeh tamte a kibawl ann sillat khu Mangpa kungah na hing tawi dinga, siempu kungah pieh ahizou chiengin, aman maitam ah ahing tawi ding hi. 9Tuachi’n siempu in ann sillat apat theizingna tanvou alakhe dinga, maitam tungah ahal ding hi. Tam khu Mangpa a dinga gimnamtuitah mei a sillat ahi. 10Tualeh ann sillata kizangmawhte khu Aaron leh atapate ading ahi ding hi. Tam khu Mangpa a dinga mei a sillatte lah a, asiengthou pen ahi ding hi.
11“Mangpa kunga na lat ding ann sillat mawngmawng tol kisaw ahilou ding ahi, aziehpen Mangpa a dinga mei a sillat lah ah tol leh khuoizu na hal lou ding uh ahi. 12Gamasa sillat ding ahileh pen Mangpa kungah na lan ding hi; hinanleh tuate khu gimnamtui dingin maitam ah akihal sih ding hi. 13Tualeh na ann sillat chintengah chi nasaw dinga, na Pasian thuhunna chi khu na ann sillatte a na kisapsah louding ahi. Na sillat zousie chi toh na latkhawm ding ahi. 14Na ga masa ann sillatte Mangpa kunga na lat chiengun, na ga masate ann sillat dingin buvui tha mei a kihanggawsa kidengpheng na lan ding hi. 15Atungah sathau na buoh dinga gimnamtui na koi ding hi; tam khu ann sillat ahi ding hi. 16Tualeh siempu in tua bu kidengpheng themkhat leh sathau themkhat tualeh gimnamtui zousie, theizingna tanvou toh ahal ding ahi; khumkhu Mangpa dinga mei a sillat ahi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.