JOSHUA 3
3
Jordan lui kanna
1Tualeh Joshua zingmawng matah in athou a, Israel tate zousie toh Shittim mun akipat in akisuon ua, Jordan lui ava tung uhi; agalkai masang un khum mun ah agieh uhi. 2Tualeh hichi ahia, nithum nuain, a lamkaite un giehphuol ava tuon suoh sieng ua, 3“Mangpa na Pasian uh thuhun bawm leh Levi mite siemputen tami azawn uh namu chiengun, na umna ua kipat in na kisuon ding ua, na zui ding uh ahi. 4Ahivang in noute leh tami thuhun bawm kikaal tethaw in tong tul ni vela akigamlat ding ahi, na peina lampi ding uh na thei theina dingun, a naiah hing pei sih un, aziehpen tami lampi tumasang lamin na zuikha ngai nai sih uhi,” chi’n thu apie uhi.
5Tualeh Joshua in mipite kungah, “Kisusiengthou un, aziehpen zing chiengin Mangpa’n nalah uah sillam dang tah bawl ding ahi,” achi hi. 6Tuachi’n Joshua in siempute kungah, “Thuhun bawm zawng unlen, mipite masangah galkai un” chi’n agen hi. Tuachi’n amaun thuhun bawm a zawng ua mipite masangah apei uhi.
7Tualeh Mangpa’n Joshua kung ah, “Mosi ka umpi bangin nang zong ka hing umpi ding hi, chi athei theina dingun, tuni’n Israel zousie mitmu ah nang ka hing pahtawi pan ding hi. 8Tualeh thuhun bawm zawng siempute kung ah, Jordan lui gei na hing tun chiengun, Jordan lai ah na din dide ding uh ahi, chi’n thu na peding hi” achi hi.
9Tualeh Joshua in Israel tate kungah, “Talang ah hing pei unlen Mangpa na Pasian u’thu hing ngaikhie un,” achi hi. 10Tualeh Joshua in “Tanah Pasian hing na lah uah aum a, na masang uah Kanaanmite, Hitmite, Hivmite, Periz-mite, Girgashmite, Amormite leh Jebusmite a delmang ngeingei ding chi na thei ding uhi. 11Ngaiun leitung pumpi Mangpa thuhun bawmin na masang uah Jordan lui akan hi. 12Tuaziehin Israel nam lah apat in, namchin lah a pat in, nam khat thahengin mi khat zel, mi sawm leh ni telkhie un. 13Tualeh hichi ahing hidinga, Mangpa, leitung pumpi Mangpa bawm zawng siempute kephangin Jordan tui atotkhah tahin, Jordan tui sahlam a kipat a hing luongsuhte a kipat in ahing kangtan dinga, ahing kiching venvon ta ding hi,” achi hi.
14Tuachi’n hichi ahing hi a, mipite Jordan luigal kaidingin apuonbuhte ua pat in ahing pawtdoh ua, siemputen mipite mai ah thuhun bawm zawngin apei uhi. 15Tualeh bawm zawngte Jordan lui ahing tung ua, bawm zawng siempute kengin tui mong atot tahin; (aziehpen bu lahhun sungteng Jordan lui akuong dimlet in aluong zing hi) 16Sahlam a kipata hing luongsuh tuite akhawlta a, gamla kuomtah a Zerethan gamgi zula um Adam khuo tandongin akiching venvon a, tualeh Arabah tuipi, Tuipi Al lam a luongsuh lai akangtanta a, tuachi’n mipite Jeriko kho gal tah ah agalkaita uhi. 17Tualeh Mangpa thuhun bawm zawng siempute Jordan lui lai a leigaw tungah, mipite zousie Jordan lui agalkai sieng masangsie un ading denta uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.