JOSHUA 2
2
Jerikou khopi enkhe ding sawlna
1 #
Heb. 11.31; Jak. 2.25 Tualeh Nun tapa Joshua in, “Agam leh adiehin Jeriko khuo aguhin va enkhie un,” chi’n mi ni Shittim mun a kipat in aguh a enkhe dingin asawl hi, tuachi’n ava kuon ua, kizua numei khat amin Rahab#Kizua numei ahia Israel mi nite ana hutkhieh, zieh in ainn kuonpi te zousie ahundam a, Gentel numei Jesu khang gui sutna ah atelpha hi. (Mat. 1.5). kichinu inn ah ava lut ua, khunah atungta uhi. 2Tualeh tam thu Jeriko leengpa hilin a umta a, “Ngaiin, tuzanin gamsung enkhe dingin Israel tate lah a mi tammun ah ahing pei uhi,” chi’n. 3Tuachi’n Jeriko leengpan Rahab kungah mi asawl a, “Na inn a hing tung mikhuolte hing pui in, gam sung pumpi aguh a enkhe dinga hingkuon ahi uhi,” achi hi.
4Tuachi’n numeinu’n mi nite khu a pui a, aphuolta hi, tuachi’n akung uah tam bangin agenta hi, “Ka kungah mite ahing haw ngutma uhi, hinanleh hei langa kihei mang ahita uoi ka thei sih hi. 5Tualeh hichi ahia, khomiel kuon a kul kotpi khah hun ding lai velin tua mite apawtkhe kia ta ua, heilang a pei ahi uoi chi ka thei kha nawn sih hi, kintahin delpai u’lachin na delpha nalai ding uhi,” achi hi. 6Ahivang in amanu’n amaute inntungah a zawpi tou a ziza#tam ziza kung kichi pen puon malngat nemtah hing kilah dohna pat (cotton) kung khat ahi. Mangkam in flax aki chi hi. kung alom lom a, asiekhawmna lah ah aphuolta hi. 7Tualeh miten amaute khu Jordan lui agalkaina tandong ava nuadel ua, tualeh adel mite apawtdoh tahun kul kotpi a khata uhi.
8Tualeh alup masangun amanu khu inntungah akung uah ava peitou a. 9Mite kungah, “Tam gam khu Mangpa’n nou ahing peta chi leh na zauhuoina uh ka tung uah ahing tuta a, noute ziehin tam gam a tengte zousie na masang uah azunmang gawpta uh chi ka thei hi. 10#Pawt. 14.21; Kisim. 21.21-35Tuaziehin Izipt gam a kipat a na hing pawtdoh laiun, Mangpa’n noute dinga Tuipisan asuhkang dan leh, Jordan gallam a um Amor mite leeng nite, Sihon leh Og na bawl dan u’leh na suhmang dante uh kana zata uhi. 11Tualeh kana zah tahun ka lungtangte uh ana zun zouta a, noute zieh in lungzaulou mawngmawng koima aum sih uhi; Mangpa na Pasian ulah tunglam van leh nuoilam lei ah Pasian ahi ngal a. 12Tuaziehin tuin keiman na tung ua hepina kana suhlat tah ziehin, nou zong ka pa innkuonpi mite tungah na hepina uh hing sulang sam unlen; 13Ka nu leh ka pa, ka sanggam pasalte, ka sanggam numeite leh anei alam zousie uh khawi unlen, shina laha kipat ka hinna uh hing humbitpieh dingin ka kungah kichiem unlen, chiemtena dihtah hing bawl pieh un” achi hi.
14Tualeh mitegel in adawng ua, akungah, “Ka sil bawl uh mi kunga na gendoh sih ding leh na shi tang un ka shi ding uhi, Tuachi’n hichi ahi ding hi. Mangpa’n gam ahing pieh hun chiengin, ka hing hepi ding ua, na tungah muonhuoi tahin kabawl ding uhi,” achi uhi.
15Tuachi’n amautegel kotta ah khauhuolin akhaikhesuhta a; a inn lah kulbang tunga um ahi ngal a, tualeh amanu khu kulbang tunga teng ahi. 16Tualeh amanu’n akung uah “Muollam zuon in peita un khuchilou in ahing nuadelten ahing mukha ding uhi, ahing nuadelte hing kinuale kia masangsie’n ni thum sung kiphuol un; tuazou chiengin napei kia na ding uhi,” achi hi.
17Tuachi’n mite gel in akungah; “Na hing kichiem sahna pen, na chitahtah ahisihleh amaw ka posih ding uhi. 18Ngaiin, gamsung ka hing lut chiengun, tam na hing khaikhiehsuhna khau sandup kotta ah nakhi inlen, tualeh na kungah na nu, na pa, leh na sanggam pasalte leh na pa innkuonte zousie na inn a nana puilut ding ahi. 19Tualeh hichi ahi ding a, na inn kotpi a kipata kholai a pawtkhe pouma sisan maw ama lutungah aum dinga, kouten a maw ka posih ding uhi, tualeh koipou innsunga na kung a um pouma tunga khut kihakha aumleh asisan maw uh ka lutung uah aum ding hi. 20Hinanleh ka sil bawl uh na gendoh leh nang kichiem sahna thu ah mawsiet in ka umsih ding uhi,” achi uhi. 21Tualeh amanu’n “Na gen bangbang uh hita heh achia,” tuachi’n amautegel asawldohta a apeita uhi, tuachi’n amanu’n akotta ah khau sandup akhita hi.
22Tualeh amautegel apeita ua, muol ahing tung ua, anuadelte ahing kinuale kia masangsie un khum mun ah nithum sung a umta uhi, tualeh anuadelten lampi tungtawn in amaute asui ua, hinanleh amuzou sih uhi. 23Tuachi’n mi nite khu ahing kile kia ua, muol tunga kipat in ahing kumsuh ua, tualeh agalkai ua, Nun tapa Joshua kung ah ahing tung ua, sil tung zousie a kung ah ahilta uhi. 24Tualeh amaute gelin Joshua kungah Mangpa’n gam pumpi ikhut uah ahing pe tahtah ta hi; a ziehpen eite ziehin a gam sung ua teng mi zousie achitun siengta uhi, achi uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.