ISAI 3
3
Jerusalem gawtna
1Ngaiun, Mangpa galkapte Mangpa’n Jerusalem leh Juda gam a kipat in akingaatna uleh ahinna uh anneh tuidawn zousie alamangta hi. 2Mihat leh galhang, vaihawmmi leh guolnei, ai-sanmi leh upate, 3sawmnga tung lamkai, mi zatat huoi, lemguottu, mi khut siem leh aisansiem mi zousie alamangta hi. 4Tua hun chiengin amauh tunga lamkai dingin naupangte ka koi dinga, naungehten amauh tungah vai ahawm ding uhi. 5Mite khat leh khat akinuoisie tuo ding ua, tualeh michin ama innvengte toh kinuoisie in a um ding uhi; naupangte upate tungah kiliensahtah in agamta ding ua, mi thulimlouten mi zatathuoite tungah akiliensah ding uhi.
6Mi’n apa innsunga a unaupa atuuh a, “Nang sil leh ten na nei a ka tung uah vaihawm inlen, tualeh tami sietgawpna na khut nuoi ah um hen,” achi chieng in;
7Tua ni chiengin, aman a niel dinga, “Ken na natna ka damsah thei sih ding hi; Aziehpen ka inn ah neh leh taah leh silleten ding a um sih hi; mite tungah vaihawm ding in hing koi sin,” achi ding hi.
8Aziehpen Jerusalem akipalpua a, Juda apuata hi athugente u’leh anasepte uh Mangpa kalna ngen ahi ziehin, athupina mit alungthah sah ding uhi. 9Amel puoh dan un, amauh aheh a, akhelnate uh Sodom bangin akilang sah ua, akhelna uh aliakhu siengta ua; ahinna uh atung agih hi; aziehpen amauleh amauh sietna kitut uh ahita hi.
10Midihtatte ahing hoi ding hi, chi un, aziehpen anasep ga uh ane ding uhi. 11Migilou tung agih hi, ama a dingin bangma ahoi sihding hi, aziehpen akhut nasep ga ama kunga pieh ahi ding hi.
12Ka mite ahileh, naupangte amauh nuoisiete ahi ua, tualeh numeiten atung uah vai ahawm uhi. Ka mite aw na lamkaite un nou ahing sukhiel sahta uhi, tualeh na lampite uh asuseta uhi.
13Mangpa agen pieh dingin adingdoh a, tualeh mite vaihawm dingin ading hi. 14Mangpa’n amite lah a upate leh miliente tungah vaihawm ding ahi: “Aziehpen nouten grep-huon nane khawngta ua, mi zawngte apat a na lah sum leh neitahte na inn uah a um hi. 15Ka mite na tawhguoi ua, mi zawngte mai na gawtguoi uh, bang na china uh ahiei mah?” Mangpa galkapte Pasian in a chi hi.
Jerusalem numeite galgihna
16Tuathamlouin Mangpa’n Zion tanute akiliensah ua, ngawng vaipuohin leh mi mitsih et kawm in tawhei lot lot in apei ua, akengte uh asuon ging kong kong zieh un; 17Tuaziehin Mangpa’n Zion tanute lutangah hima a umsah dinga, tualeh Mangpa’n azamawte uh adawhsah ding hi; achi hi. 18Tua ni chiengin Mangpa’n kizepna kilawmte kengbute, diel khuhte, ngawng awte; 19bilbate, taute kikhuna puonte, 20lugahna dielte, kenga khainiengte, kawngtente gimnamtui bawmte, taute, 21khutsipte, nakuo abate, 22pawi ni puonte, puonah tuolte, puontung silte, sum ipte leh, 23himlangte, puon malngatte, diel khitte leh puon tuolte, alamang ding hi. 24Tualeh hichi ahing hiding hi, Gimnamtui taangin sil-ui gim a um dinga, kawngten taangin khauhuol, samphatah taangin lukieuna, puontuol hoitah taangin sai-ipuonten a um dinga, tualeh melhoina taangin melsietna a um ding hi. 25Na mite namsau in a pua ding ua, na mihatte kidouna phuol ah apua ding uhi. 26Zion kulkotpite mi shi suun in akap ding ua, tualeh amanu#amanu: chipen Zion china ahi. ahawm guoh ahi dinga, tuol ah atou ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.