ISAI 2
2
Ni nukhiate ading thuchiem
1Amoz tapa Isai in Juda leh Jerusalem tungtang thu amu khu tambang ahi.
2Ni nukhia chiengin #Ni nukhia chiengin: Dan tha hun, Thuhun tha hun, Jesu hing pien akipat leitung tawp dong china
tambang ahing hiding a,
Mangpa inn umna muol khu,
taangte vum ah suhdet in a um dinga,
tualeh muolte tungah,
tawisangin a um ding hi;
tualeh namte zousie apeikhawm ding uhi.
3Mi tampite ahing peikhawm ding ua,
“Hing peiun Mangpa muol ah,
Jakob Pasian inn ah pei vaiin,
tuachi’n Aman alampite ahing hil dinga,
alampite ah ipei ding uh,”
achi ding uhi;
aziehpen zion akipat in,
dan ahing pawt dinga,
tualeh Mangpa thu Jerusalem apat in,
ahing pawt ding hi.
4 #
Joel. 3.10; Mik. 4.3 Aman namte kaal ah thu akhen dinga,
Aman mi tampite athuhil dinga,
tualeh a namsaute uh,
lou hawna tuin akheng ding ua,
tualeh ateipite uh,
theikung heuna siakawite in akheng ding uhi;
nam khat in namdangte douna in,
namsau aleh nawn sih ding ua,
kidou dan zong azil nawn sih ding uhi.#Tana hun kigen pen, Messiah (hundampa) hun, lemna leitung ah a um ta ding hi.
5Jakob innkuonte aw hing pei unlen,
Mangpa vaah ah vah va ui.
Mangpa hing peina ding ni
6Aziehpen na mi Jakob innkuonte na taisanta a, amaun suolam mite tat dan zuina in adim siengta uh a; Philistin mite banga aisan mite ahita ua, gamdang mite toh akizopta uhi. 7Agamte u’zong sana dangka in a dim a, agoute un beini a neisih hi; agam uh sakol in adim a, asakollengte un beini aneisih hi. 8Agamte u’zong milimte in adim a, akhut mama ua abawlte uleh amauh khutmete a abawl uh, amauh bawlte ma abie uhi.
9Mite atakhiel siengta ua, hoilou na ngen a adim taziahun ngaidam sin.
10 #
Kihil. 6.15; 2 Thes. 1.9 Suongpi kawm ah lut unlen, leivui lah ah kibu un; Mangpa achizat huoina leh athupina apat kiphuol un. 11Mihing kiletsahnate khu suhngiem in a um dinga, mite kideikhopna zong kunsah in a um ding hi; tua ni chiengin Mangpa bou tawisangin a um ding hi. 12Aziehpen galkapte Mangpa ni khu ki liensah leh kingaisang zousiete tung ah atung dinga, amauh kitawi sang pouma akiluoi ngiem ding hi. 13Lebanon muola sidar sing sangpipite leh tawisang a umte leh Bashan gam a gangpi sing zousie tungah; 14Muolsang zousiete tungah leh, tawisanga um muol zousie tungah; 15Inn sawngsang chinteng tungah leh kulpi bang nei zousie tungah, 16Tualeh Tarshish tembaw chinteng tung leh sil lim kilawm zousiete tungah atung ding hi. 17Mihing kiletsahnate suhngiem ahi dinga, mite kideikhopnate loingiem ahi ding hi. Tua ni chiengin Mangpa bou tawisang in a um ding hi. 18Aman milimte asubei sieng ding hi.
19Leitung nasatah a kilingsah dinga Mangpa athawchiengin, agiinhuoina leh avangletna thupina apat mite atai ding ua, suongpi hawmte leh leihawmte ah atai lut ding uhi. 20Tua ni chiengin miten bieh ding a abawl uh sana leh dangka milimte buite leh baahte kung ah apei ding uhi. 21Leitung nasatah a hotling ding a athaw chiengin, Mangpa zauhuoina chizat huoina apat avangletna thupinate akipat mite suongpi kawm leh kawlhawmte ah alut ding uhi.
22Anahkohawm a anahna hu um mihing gintat tawpsanta un; banglam panga muontah hi mama uh ahiei mah.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.