HOSEA 4
4
Israelten Pasian thei utlou
1Nou Israel tate aw,
Mangpa thu ngaiun,
Aziehpen gam sunga tengte tungah,
Mangpa’n ngawhna ahing tun ding hi,
gam sungah thutah a um nawn sih a,
gin umna leh hepina a um nawn sih a,
Pasian theina mawngmawng a um sih hi.
2Kichiemna leh zuougenna,
tuolthana, guhtatna leh angkawmna bawlin,
sisan, suona ngenin apum dim siengta uhi.
3Tuaziehin gam in asuun dinga;
tualeh khuna tengte zousie,
gamsate leh tunga leeng vate,
aba gawp siengta ding ua,
tuipi a um ngate zong lahmang in a um ding uhi.
4Ahivang in koima kihau sih henlen,
koima khat leh khat kiphawh sih u’heh,
na mite pen siempu kihaupite bang ahi uhi.
5Tuaziehin suntang laiin na kipalpua dinga,
guolneipa zong zanlai in nang toh apua ding a;
Tualeh na nu ka sumangthai ding hi.
6Ka mite theina atahsap zieh un,
suhmangthai in a um uhi.
Theina na nuol ziehun,
Ken zong ka siempu na hina uapat in,
ka hing nuol ding hi.
Na Pasian dan na manghiltah ziehin,
Ken zong na tate ka manghil ding hi.
7A hing pun tam deudeu u’leh,
ka tungah akhiel tam deudeu uhi;
athupina uh zumnain ka heng ding hi.
8Ka mite khelna kivahnain anei ua,
alungtang uh athulimlouna uah anga uhi.
9Tualeh tambang ahi ding:
Mipite leh siempute akibang ahi ding ua,
agamtatnate uh ziehin amauh ka gawt dinga,
asilbawlte uh ka thuh ding hi.
10Ane ding ua,
atai tuom sih ding uhi;
aziehpen amaun Mangpa thumanna atawpsanta uhi.
11Kizuana,
zu leh zu tha in lungtang sal in ataangsah hi.
Israelte milim biehna
12Ka miten asing milimte uh kungah thu adong ua,
tualeh achieng un atheisah zel uhi.
Aziehpen akizuana lungsimte un amauh apielmangsah a,
a Pasian uh nuasie in akizuata uhi.
13Muol tungte ah kithoina alan ua,
muolvumte, gangpi singte,
begaw singte leh hiengzau sing,
lim nuomtah nuoite ah gimnamtui ahal uhi.
Tuaziehin na tanute uh akizua uh a,
na moute un angkawm na abawl uhi.
14Na tanute uh akizua chiengun,
ka gawt sih dinga,
na moute un ang akawm chieng un zong,
amaute ka gawt sih ding hi;
aziehpen pasalte nangawn zong,
kizuate toh atuom in apei ua maitam ah kizuate toh,
kithoina alan khawm uhi.
Tuaziehin mipi atheisiemloute,
akipal pua ding uhi.
15Nang Israel kizua nanlachin zong,
Juda vang kizuana ah puasih heh,
Gilgal#Gilgal leh Beth-Aven: Jeroboam leengpa bawngnou lim khen kibiehna khuote ahi. ah hawsih unlen,
Beth-Aven ah zong pei sih unlen,
“Mangpa ahin a ahin pouleh,” chiin,
kihahsiel in kichiem sih un.
16Aziehpen Israelte bawngla genha bang ahi ua,
Tuin gam lientah ah Mangpa’n amaute,
belamnou bangin agamta sahta ding hi.
17Ephraim in milimte toh akizopta,
a um umin na umta heh.
18A zu dawn uh atawp chiengun,
kizua bangin agamta nalai lai uhi,
avaihawmte un,
zumhuoina gamtatte a it nalai kenkon uhi.
19Hui in amanu ahate in atun a,
tualeh akithoina ziehun azum ding uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.