2 THESSALONIKA 3
3
Kukal tah in Khrist na ngahun
1Atawp pen in unaute aw, Mangpa thu noute a aum banga khanga suhthupi a aumtheina ding leh; 2Mitatsete leh mi giloute laha kipat ka bit theina dingun thu hing nget pieh un, aziehpen mizousie in ginna anei kim sih uhi. 3Hinanleh Mangpa khu a ginum a, Aman noute ahing sudet dinga, mi gilou lah ah ahing veng ding hi. 4Na kung ua ka hing thupiehte uh, na bawl ua na bawl zel ding uh chi Mangpa ah ka hing muong uhi. 5Tuin Mangpa’n na lungtangte uh, Pasian itna, leh Khrist thuohhatna ah hing pui heh.
Thasiet louding
6Hinanleh unaute aw, koute apat a thugousie namute uh banga umlou a, dan banglou a gamta sanggamte zousie lah a kihemkhe dingin i Mangpa Jesu Khrist min in thu ka hing pie uhi. 7Noute mama in na hing zui dan uh na thei uhi, aziehpen na lah uah dan banglouin ka gamta ngai sih uhi; 8Koima tanghou aman beiin ka ne ngai sih ua, na lah ua koima ka suhbuoi louna ding un gimtahin sun leh zan in ka semgim zaw uhi. 9Thuneina ka neilou zieh uh ahi sih a, hinanleh na hing zui ding ua etton dingin kouma leh kouma ka kibawl zaw uhi. 10Na kung ua ka um lai nangawn un tam thu ka hing pie uhi, koipou in nna asep nuom sih leh nezong ne sih heh.
11Aziehpen na lah ua dan bangloua gamta a, nasep mawngmawng donlou a, kitahla taha mi nasepna tengah akikumthaw mi aum uhi, chi ka za uhi. 12Tuabang mite pen nna sem khinkhien ding leh amauh tanghou ki neh dingin, Mangpa Jesu Khrist min in thu pie in ka hanthawn zaw uhi. 13Hinanleh unaute, noute’n vang sil hoi bawl chimtah sih un. 14Koipou in tam laihah a ka thuhil uh azui sih leh tua mi khu chiemte unlen, azum theina ding in kigoppi sih un. 15Hinanleh melma bangin bawl sih unlen, sanggam bangin vauhil zaw un.
Thukhupsin
16Tuin hamuonna Mangpa mama in lamchinteng ah, bangchih lai pouin noute hamuonna hing peta hen. Mangpa’n na unpi un hing umpita hen. 17Tam ka hing nousietna lai pen Kei Paul in keima khut ngel a ka gel ahi, ka laihahte zousie ah chiemtena hi dingin tambangin ka giel hi. 18I Mangpa Jesu Khrist hepina in na unpi un hing umpi ta hen. Amen.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.