2 THESSALONIKA 2
2
Mangpa hing peikiana dingthu a gaidan dihloute
1 #
1 Thes. 4.15-17
Tuin unaute aw, i Mangpa Jesu Khrist hing pei na ding leh eite Ama kunga i kikhop khawm na ding thu toh kisai in, ka hing ngen uhi, 2Mangpa ni khu ahing tung zouta chi hagau in ahiei, thuin ahiei, tualeh koute akipan laihah ahiei in na lungsim uh kiling sah sih unlen, ahisihleh buoi pai sih un. 3Banglam tengah koiman hing sol zou sih heh, aziehpen puasanna ahing tun masah a, khelna mipa#Khelna mipa Dan bawtsepa zong ahichi hi. mangthang tapa hing kilang masa louin, tua ni hing tunglou ding ahi. 4#Dan. 11.36; Ezek. 28.2Ama pen miten Pasian achi pouma u’leh abieh pouma uh douin tuate tungah ama leh ama akitawisang dinga, Pasian kihisah in Pasian biehinn ah Pasian bangin atou ding hi.
5Na kung ua ka um lai in, tam silte ka hing hilta chi thei nawnlou na hi uoi mah. 6Tualeh tuin ama pen ama hun tah a ahing kilat ding bang ahiei adal chi na thei uhi. 7Aziehpen Danbei a gamtatna thuguh in asem panta hi, Ama dalpa lampi apat lahmang ahi masangsiein, Ama adal zing ding hi. 8#Isai. 11.4Tuazou chiengin danbei a gamtapa ahing kilang dinga, Mangpa Jesu’n akam a huin akatum ding a, tualeh ahing peina vah in, danbei a gamtapa asumang ding hi. 9#Mat. 24.24Tua danbei a gamtapa hing pei khu Setan nasepna dungzui a, silbawltheinate, chiemtenate leh zuouthu lamdangte, 10Tualeh mangthaite adingin dihtatlouna solna zousie toh ahi dinga, hundam ahi theina ding ua, thutah itna apomlou zieh uh ahi. 11Tami ziehin zuouthu agintat na dingun, Pasian in dihlouna nasep hattah akung uah asawl dinga, 12Thutah gingtalou a, dihtatlouna kipahpite zousie mawpai in a um ding uhi.
Mangpa ni a gingtute hamuonna
13Hinanleh unau Mangpa ittahte aw, hagau a suhsiengthouna leh thutah ginna zieha, hundam a um dinga achiil a kipat Pasian in noute ahing tel ziehin koute pen noute dinga Pasian kunga kipahthu gen ngitnget ding mawng ka hi uhi. 14Ka khantanhoi genna zieh un, Aman i Mangpa Jesu Khrist thupina tangdingin noute ahing han hi. 15Tuaziehin unaute dingkip unlen, thu gen hiin, ka laihah un hitaleh, thugousie#Thugousie-Tradition (Eng) Paradoseis (Greek) sawltahte thuhilte leh thupiehte ahi. noute ka hing hilte uh tudet un. 16Tuin i Mangpa Jesu Khrist Ama ngel leh eite hing it Pasian leh i Pa uh hepina zal a kumtawn hamuonna leh kinepna hing pepa’n, 17Na lungtang uh hing hamuonin, thugen leh nasep hoi chintengah hing sudet tahen.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.