WANGSHEMBU MWOT 28
28
Malta shuazo ma Pol
1Kwom pangwüi kakax alople azang laxle tix ija shuazo ang Malta le nyakkya awan ang kop. 2Ikha tokya nokpubu kwom füi ipong müile asyen. Iponge zangwatle zangkong koxle hwome wüntak laxle kwom bibi wünpwonle kop. 3Pol-e hakangsabu othop tuita apüile wünkha to tak. Ija hathop kha tokya wünkham thoto pusa tuita lailaxle chix chak ma tsütle kop. 4Ibu khünake Pol chak ma pu shale ngokya ngün, ilaxle tata füi zangwünle thüi: “Ija mixsün a mix mik amüt daokya mix changüi ilaxle tinu chak tokya chix azang koxlechu chix ozün ma ngo angkya zangpan ma müntüidao changa.” 5Ikoxle Pol-e pu wünkha to sakle adüt üntoxle chix to chemlechu chichang. 6Hwome chix to otue fingfing ilaxle otue nguakle zizi le hungo. Ikoxle ile ozulole hungo füima chix to chemlechu chichangkya ngünlaxle hwome mamale thüt, ilaxle thüi: “Chix a Zang tuita changpu!”
7Imakhange otukuxchu chiatsaile le ija shuazo ma ngokya Pablias haxtokbu tüikya. Chixe hwom wünpwonle kop ilaxle nyix azom kwom chix hom ma mixwün ang ngo. 8Pablias hopa khamle tamchu woktsüi le kakle lya ma jiple tüikya. Pol-e chix nui to dong ilaxle zangjople chix to chake twon ilaxle chix kak amüile kox. 9Ija ile changkya zuma, shuazo angkya kakmix mamabuchu wüi ngui ilaxle Pol-e hwom pangwüi kak amüile kox. 10Ofüima hwome kwom ang hingho chaktwon huanuma kox, üntoxle otue kwom khua ma pao ang laipuix izumachu kwome tinu mongto wünham lom ma laxlili hwome khua ma shole fa.
Malta tokhange Rom kople
11Kwom ikhato lyetkua azom nui füima zangwa akaile shuazo ma thomkya, Alekjendria tokya khua, Kastor hia Pollak “baozang anyi apyetkya”, le nyakkya khua ma nga le pao. 12Kwom Sairaka tingnu to nguilaxle ikhato nyix azom nuile tox. 13Ija makhange khua ma fuale akwonle kwom Rejiam tingnu to ngui. Ofüi nyix shuathongchi makhange winjep hüi ilaxle nyix anyi mong ma wüi kwom Puteoli tingnu to ngui. 14Ikhato kwome mongong mixbu züizüi apong. Hwom füi tomle kwom ang hatdang tuita ngotox hüile akax. Ibibile aham laxle kwome Rom tingnu alop. 15Rom tingnu angkya khristan tüinaobue kwom nguikya zing atatlaxle Apias hatnu sütnui hia nazak nui azom tüikya kha kople kwom füi apong ang pong to za. Pol-e hwom ngünkya zuma Zang ang münchong fa ilaxle mongchong.
Rom Tingnu ma Pol
16Kwome Rom alopkya zuma, Rom sotkarie, Pol boma nyetmix lanlan laxlaxle, chix süisüi le ngo ang dan.
17Nyix azom füima Pol-e ikhato Jehudi lompabu nguazua zangwün to ahyen. Hwom asoxkya zuma chixe hwom ang thüi: “Kutüi kunaohom, kue kem khünaknu hia kem putongbu tokhange kopkya zanglombu zongto oma chemchu chimok ikoxlechu Jerusalem ma ku kop ilaxle kun ma thom üntoxlechu Rom sotkari chak to kox. 18Hwome ku ma kaxtikle anolaxle, ku ma mik maxtang le oma mokkya chemchu chitüikya khoma hwome ku dansele tsu. 19#Mwt 25.11.Ikoxlechu Rom noke ku dan angkya zangwün to Jehudi khünakbue ile chichang ang khato le thüikya zuma, ku ma ma khünakbu ang omale fe angkya kax chitüikoxlechu, kue ija ku zangwün wanghom hato pao angkya laipu. 20Ija khoma hünzom ngünse tamchu hünzom füi zangwünse texpu; chemthüikoxle Israel khünaknue sungle ngokya mixsün khoma ku chak ma ija jankap lang angkya laipu.”
21Hwome chix ang thüi: “Kwome nang bama Jehudi khünakbu tokhange laiza chemchu münkop chichangba tüinaobu khama owachu ikhato nang bama chimüikya kaxho koplaxle nguikya müntüi chichangba kwome münawan. 22Ikoxlechu nang tutex kwome nang makhange atatle laxse tsupu, chemthüikoxle nang hakkya othom mo pangnu khato wüi omale wünkya kwome awanle ngole.”
23Ifüima hwome hanpak nyixta tyale tox ilaxle ija nyix khünakbu Pol füi apong ang chix ngwotnui to ngui. Swom makhange hanhom ma thule chixe Mosa wanlombu hia ajebue zakya kaxbu apüilaxle akhix akhanle apuakya tokhange hwom mong anom-anai ang azong. 24Züizüie chix kax to ong, ikoxlechu züizüie chiong tsuak. 25Otue hwom kaxno chitomle changpuix, hwom fan ang ajong; ilaxle fanüi khakha ma hwom füi Pol-e ija kax akax: “Hünzom putong hwom füi ajebu makhange Otsao Chasae akaxkya kax ija otsing tomtata wüi changkoxa.” 26#Isa 6.9,10.Chemthüikoxle Isaia-e thüi:
“Paolaxle ija khünakbu füi akaxkox:
‘Hünzome na thale apaüi,
ikoxlechu münawanüi;
hünzome mik ojao chiachik le huüi,
ikoxlechu münngünüi.
27Chemthüikoxle ija khünakbu ang,
mongkho jao mangui;
hwome ma na zimdaoa,
ilaxle hwom mik achikdaoa.
Ile chichang thüikoxle,
hwome ma mik füi ngünse;
hwom nae atatse;
hwom kün-monge awanse;
ilaxle hwom ku hato chatse,
üntoxle kue hwom amüise.’”
28Ilaxle Pol-e chix kax ashukle thüi: “athax a khosün angkya Zang Kaxho Müikya mixnokbu hato paodaoale hünzome awanlax. Hwome ija to apa angkya changle!” 29Pol-e ija kax akax füima, Jehudi khünakbu tata füi kax ma alanle fan.
30Ile Pol zanglao anyi chixe omün koxlaxle thomkya hom ma ngo, ilaxle chix wai ang nguikyabu pangnu wüi chixe wünpwonle kop. 31Ile mongchong laxle tamchu owaechu chipoxle, chixe Zang Wangting bama hwon-ano üntoxle Jowanpa Jisu Khrista bama apua.
Currently Selected:
WANGSHEMBU MWOT 28: WANCBSI
Highlight
Share
Compare
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
