WANGSHEMBU MWOT 27
27
Pol a Rom to Kat
1Kwom Itali to khua ma ka angkya zangwün tsuak füima, hwome Pol hia mama khünak züita, hwomchu wüi kun ma thomkyabu (Agastan othom) Roman süpahi othom khama hota thakma apünkya süapahi alixachong Julias chak to kox. 2Adramitin makhange Asia chaxwan tokya tinu khua zaknui to ka ang achwonle ngokya khua ma ngale achex. Thesalonika tokya Mesidonia sün tuita Aristarkas chuwüi kwom füi tomle tüikya. 3Ofüi nyix kwome Sidon alop. Julias-e Pol to chingchalaxle hozuibu hato paolaxle mongzom müile nazak ang dan. 4Kwom ikha angkya achex ilaxle zangwine kwom füi asaole jepkya khoma, winjep chitüikyachi, Saipras shuazo zongma handün chikao makhange kwomle. 5Ifüima Silisia hia Pamfilia zuima tüikya tinu talaxle Laisia haxtok angkya Maira tingnu alop. 6Ijong khama hota thakma apünkya süpahi alixachonge Itali to ka angkya Alekjendria nok khua tuita atak laxle kwom ija khua ma angat.
7Kwom obibi nyix hex homle zaxhun ma aham, ilaxle oshuk ma sikngün ashukle Krita to ngui. Ija akaile le ang winjepe kwom ang tam chifa, ikaoma Salmon haxshuk akaile Krit shuazo zongma shuathong chikao makhange kwom khua ma ju. 8Kwom kakax shuile hüi, ilaxle Laisia tingnu makhange otukuxchu chiatsai le tüikya Thomzün chitüikya khua zaknui to sikngün ashukle ngui.
9Ochax thathomkya din shwomkya nyix kaidaokoxle ti ma wünham hanpak ziamale hüikya tuk kople kwome ikhato obibi nyix hexle han ahom. Idaile Pol-e hwom ang ija zünkax kox: 10“Khünaknu, imakhange tima kem ang thomzün tüile le kue ngünle; hün-püi hia khua thomjokya tata chichangle khünak mikmax angkyachu changle.” 11Ikoxle hota thakma apünkya süpahi alixachonge Pol kax ma laxtülüi khuachei mix hia hopunu nyi kax ma wüi lax. 12Ija khua zaknui ma zangwa alyetle ngo ang chimüikya kha chang; ikhoma khünakbue tinu mongto khua dan üntoxle jangtsuakba Foenik alop ang azong. Ija a shuathongchi hia shuakuxchi hannop winjep chito thakya, Krit haxtok angkya khua zaknui tuita üntoxle hwome ikhato zangwa alyet ang tho.
Tinu Khato Zangchei Apong
13Ofüima shuathong winjep zaxhun ma hüikya zuma, hwome ajangle ngokya kha alop ang tsuaküile thütlaxle jankuix wütle koplaxle Krit shuazo kakax achole le ang achex. 14Ikoxle leletüka bama “Handünchi shuakux winjep”, le nyakkya winjepe ija shuazo akaile jeple zangchei hüi. 15Ija zangcheie khua to thu ilaxle zangchei füi asaole khua thochi to alyet ang chithokya zuma, kwome azong ngokya dan ilaxle zangwin füifüile pao ang dan. 16Ifüima kwom Kaoda le nyakkya shuazosa zongma shuathongchi kao, winjep aluile chitüikya chima le ilaxle mütmüt le kwome khua ahixkya chak ma kop ang tho. 17Kwome ija nwon ilaxle khua achongkya füi akungle kha. Libia angkya tinu kakax sak-kha to nakman le zalaxle kwome khua lingzop athomle ajo ilaxle khua winjep füifüile pao ang dan. 18Zangchei winjep otyama wüi zongle ngo, idaile ofüi nyix hwome khua ma tüikya hün tinu khato awüt ang süt. 19Ilaxlechu ija füi nyix wüi hwom chak jao füi hwome khua oling-olak züizüi ti to awüt. 20Kwome obibi nyix hex zanghan hia lyettsibu ngün ang chikople ngo, ikoxle zangchei winjep a ojao chithwonle thule ngo. Oshukma kwom ma azangüi lükya mongtex ojao chitüile mongmax.
21Obibi nyix hex khünakbu saxling angkya chakba ojao chitüi le hanpak alyet füima, hwom thüntho ma ajong laxle Pol-e akax: “Khünakbu, hünzome kukax ma laxle Krit angkya chiachex koxwüi müihaxkux; ile jangchang kem ang ibukux thama hia thomjokya chitüise. 22Ikoxlechu athaxchu kue hünzom ang thüipu, mongchonghüi! Hünzom opupu mikchu münmaxpu; maxkoxchu khua tata maxüi. 23Chemthüikoxle ku owa kuxhex ilaxle kue owa tongshwom le ngopuix, ija Zang kaxtaimixbu müja ku hato nguile, 24ilaxle ku füi akax, ‘Pol, ojao taxza! Nang wanghom thüntho ma ajong angkya wüi changle; üntoxle Zang, chix onüi müikya tokhange, nang füi tomle khua ma tüikyabu pangnusa nang ma koxdaoa.’ 25Idaile khünakbu, mongchonghüi! Chemthüikoxle chixe chemle akax daopuix ija ningle chang angkya jao changle le kue Zang to ongkya tüile. 26Ikoxle winjepe kem jongjongta shuazo to apüitox angkya changle.”
27Ija a nyix bün anyi lükya zangnak changkya, ilaxle kwom a Mediterenian tinu mongto, tüchikao to tampong, tüchikao to tampong le winjepe jeple aham thom. Wünmongtsange khua lingzop mixe kwom kakax hato soxkya changa le ana. 28Hwome ti zukya thütle ano koxle faktsa bang; jantukux füima tamchatle thütle ano koxle fakbün aga tukux wüi bang. 29Kwom khua long ma nak-asuafale hwome khua omüichi makhange jankuix ali ajo ilaxle zangngaiüi to hule nui. 30Khua lingzop mixbu khua angkya paole azang ang azong; hwome thünthochi makhangechu jankuix adüt ang thüiwüi le atsing. 31Ikoxle Pol-e süpahi alixachong hia chix füikya süpahibu ang thüi: “Ibu khua lingzop mixbu khua ma chingo jangthüiba, hwom azang ang müntho.” 32Ikhoma süpahibue khua ahixkya to adüi le thomkya zubu tum ilaxle khua chix tata tima chwotle pao ang dan.
33Athaxpi zangngai tu nguile hüi, ilaxle Pol-e hwom pangwüi ang süt hidaopong saxle kop angkya akax le thüi: “Hünzom nyix bün ali nguile ngodaoa, imong ma chem ngaxchu masax maling. 34Hünzomepi süt shongsaxle kop-hüi; hünzome ma azang angkya kuxma süt a saxkox le wüi müi angkya changle. Hünzom khang angkya khopa tuita ngaxchu münmaxpu.” 35Ibibi akax füima, Pol-e chak ma hidaole an lax, hwom pangnu thüntho ma Zang ang münchong fa, ija ashik ilaxle sax. 36Hwom angchu wüi mongchong ilaxle hwom pange wüi süt hidaopong sax. 37Khua ma kwom pangnu ho-anyi puzom azok mixhuak tüikya. 38Pangnusae wüi wok afwot le fongsax füima hwome khua angkya wong tinu mongto awüt le khua acha.
Tichape Khua Ashix
39Huazunge, zangngai füi tomle khua lingzop mixe kakax chitsing tsuak ikoxlechu fa tüikya shuapong hwome ngün ilaxle jangtsuak thüiningle khua ikhato azak ang zople ahüi angkya changle le thüt. 40Idaile hwome khua omüichi angkya jankuix zubu tum ilaxle ibu tinu mongto dantox, ilaxlechu hwome khakle thomkya khuachei lakbu da. Kakax chito jeple naxhüi ang khua thüntho chito aham angkya hanpakma hwome khua okhangchi ma nyikhao ajong. 41Ikoxlechu khuae sak lwonle tüikya khato thule ikhama zakle kop; khua thünthochi kao manle aham ang chimüile chang, ikoxle omüichi a tichap zongkyae thule obiobi ang achangle akhix awüt.
42Kople thomkya khünakbu owachu akhüile tale chipao azang angkya kuxma süpahibue hwom pangwüi lang ang tung. 43Ikoxlechu süpahi alixachonge Pol khosün kopse tsu. Ikhoma chixe mama süpahibue ile mok ang tungkya abax. Tikhüi mankyabu thoma akhüile ta ilaxle akhüi ang chithokyabu pünkhao hia khuakhaobu ma koplaxle azuile hüi angkya chixe kaxkox. 44Ile tix kwom pangwüi tachi fako alople tale azang ang tsuak.
Currently Selected:
WANGSHEMBU MWOT 27: WANCBSI
Highlight
Share
Compare
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
