WANGSHEMBU MWOT 12
12
Müimüithom Zo Süchongchongle Thup
1Ituke wanghompa Herod-e müimüithom angkya khünak züizüi to zothup angkya owang wang. 2Chixe Juhan honao Jakop changlo füi lang. 3Ile changkya khoma Jehudi khünakbu mongmüikya ngünlaxle chixe tamtaitai le ile mok ilaxle Pitar kop. (Ija a pangpua ma an saxle mongmüikya tuk changkya). 4#Lai 12.1-27.Koplaxle Pitar a kun ma sho; othom to süpahi mixsün ali pong süilaxle othom alie ikhato chix nye ang tom. Akaile lekya pangpua füi nyix noknu thüntho ma chix ang zak-akopse le tamchu langkox wüi müiüile noknue chix naxahai le Herod-e ija sua. 5Idaile Pitar a kun ma shole thom; ikoxlechu müimüithom khünaknue chix hanpakma khütwüi khütle zangjop.
Kun kha tokya Pitar Alai
6Ngainyix ningle Herod-e chix noknu thüntho ma alaiüi le, ija ja Pitar a nyetmix mixsün anyi obama jiple ngokya. Chix a janbüi anyi füi: tuita a nyetmix tuita ma ilaxle ata janbüi a tuita nyetmix male adüile kha thomkya üntoxle kun fülom machu nyetmixbu tüihukya. 7Allele ikhama Jowanpa kaxtaimix tuita laile ajong, üntoxle kun khato nyan. Kaxtaimixe suakto ma sile Pitar azwot le chix füi akax: “Momlax! Ajonglax!” Ifüima Pitar chak angkya janbüibu dütle hüi. 8Ifüima kaxtaimixe thüi: “Züpak hitlax ilaxle chisox soxlax.” Pitar-e ile mok, anaolechu kaxtaimixe thüi: “Nang nyi awun koplax üntoxle ku füito oman.” 9Pitar chix man tole kunkha angkya lai, ikoxlechu chix kunkha angkya laile paokya otsingtsing chichang changpuix chixe chiawantsuak. Chixe mikngün ohün ngünkya ang laxle ngo. 10Okhie owang angkya nyetmix kaile le, anaolechu ifüi angkya othom kaile le ilaxle oshuk ma tingnu chitole angkya jan kafülom hato hüi. Ija fülomchu wüi hokhi le ang chix lualua to daple hüi ilaxle hokhi laile pao. Okhi lomfo le ahamle ju, iponge allele kaxtaimixe Pitar danle tox.
11Ifüima Pitar ang khangkho ngaile chempang changpuix ibu ajang ang tsuakle chang ilaxle thüi: “Athax a ija ojing tomtata changle le kue awandaoa! Jowanpa-e chix kaxtaimix ajo laxle Herod chak tokya tamchu Jehudi khünakbue ile hwonüi le thütle ngokyabu chak tokya ku azündaoa.”
12Chix hato hüikya chaxwan zanghan ajang laxle chix Juhan Mark honu hwom hom to pao. Ikhato khünaknu huanuma asoxle tüikya. Hwom a Pitar hanpakma zangjople ngokyabu changkya. 13Pitar-e homtho chito khange kahak to hong; Roda le amünkya danu cha ang ngokya shekosa owa hex ang hu ang kahak hato hüi. 14She e Pitar kax dingdün ma awanle lax ilaxle mongmüikyae ka ngaxchu chidap homle hommong to dong, üntoxle Pitar homtho ma ajongle tüikya hwom hama apua. 15Hwome she ang thüi: “Nang taxnga!” Ikoxlechu she e otsingtsing changle lewüi akax. Ikoxle hwome lan: “Ija a chix kaxtaimix nguikya changüi.”
16Iponge Pitar-e kahak to hongle wüi ngo. Oshukma hwome ka dap ikoxle chix ngünkya zuma hwom huanuma abüt. 17Chixe chak aja le hwom ang dangün le thüi; üntoxle kunkha tokya Zange chix chemle alaipuix, hwom hama apua. Chixe ija kax Jakop hia tüinao mamabu pangnu hato wüi apuakox le akax üntoxle chix mama khato pao.
18Ngainop ningle zangngai mik ma, Pitar oma ünpuix le tata hama atüile nyetmixbu pangwüi huanuma khosamle abüt-aban. 19Herod-e hwom ang chix lomdao le kaxkox. Ikoxle hwome chiatak tsuak. Idaile chixe nyetmixbu ma atüilaxle hwom lang angkya kaxkox.
Ifüima Herod Jehudi chaxwan to ju ilaxle Kaisaria to hidaole nui.
Herod Zikya
20Herod a Taiar hia Sidon angkya khünaknu füi zan mong dongle mongtsik; idaile hwom othom-othom ma Herod füi apong ang ngui. Pongwang ma hwome Blasta hwomchi to jikle kop. Chix a Herod wanghompa khwa ma mongao chitüikya wangshempa changkya. Chix füi tumüi angkya zangwün, chemthüikoxle sütling hwome Herod wanghom haxtok angkya tix kop angkya changle.
21Nyixta dintya le thomkya nyix Herod-e chongwang zapua lax, chix tüntong ma thung ilaxle khünaknu pünzün wangsai. 22“Chixe khünak ningle chichangle Zang ningle akax”, le hwom akhong. 23Ifüi tomle kaxtaimixe Herod to hongle anguak, chemthüikoxle chixe Zang chathua zakya chitüi. Chix a chonge sax ilaxle zi.
24Jowanpa kax sisile tsa-lwon le pao.
25Barnaba hia Sol nyi hokhi ang fakya mwot tsuak ilaxle hokhi füito Mark le nyakkya Juhan koplaxle Jerusalem to chat.
Currently Selected:
WANGSHEMBU MWOT 12: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
