WANGSHEMBU MWOT 11

Jerusalem Müimüithom hato Pitar Kaxwün Wangkya

1Wangshembu üntoxle Jehudi chaxwan pangnu khatokya mongong mixbue mixnokbuechu wüi Zang Kax pongle kople ta le atat. 2Pitar Jerusalem to chatkya zuma, mixnokbuechu khwon züt angkya olom changüi le texkyabu othome chix ajaole thüi: 3“Nang khwon chizütkya mixnok hom to mixwün ang nguipu le daihia üntoxle hwom füi tomle sax-lingpu le daihia!” 4Ikhoma Pitar-e pongwang tokhange wüi chempangle changpuix ibu bakle hwom hama wün:

5“Ku a Chopa tingnu ma zangjople ngokya, ipongma kue mikngün ohün ngün. Chongkya tsap tuita ningle lituta zongkhing ali ma koplaxle ding tokya juüi kue ngün, ilaxle ija ku zuima zak. 6Kue soxle hukoxle omong khama müibu, pusi-maksa, üntoxle osabu tüle ngün. 7Ilaxle ku füi akaxkya kaxzing kue atat, ‘Ajonglax, Pitar! Langlax ilaxle saxlax!’ 8Ikoxle kue lan, ‘Jowanpa, ile otuechu münchangüi. Ku wikha to chisax homfang hia chitsaokya oli tümasho.’ 9Ding tokya kaxzinge anaolechu akax, ‘Zange atsaole thüikya füima tütalichu chitsaokya ang taxlax.’ 10Ile othom azom ma chang, ilaxle oshukma ija jali bakle ding to chatle dün. 11Ipongkhae Kaisaria tokhange ku hato akatkya mixsün azom ku ngokya hom to nguile hüi. 12Otsao Chasae ku ang hwom füi tomle chem mongao chitüi le pao angkya akax. 13Ibu tüinao hwom azokchu wüi ku füi tomle Kaisaria to paopu, ilaxle kwom pangwüi Kornelia hom to nguipu. 14Chixe kwom hama chix hom ma kaxtaimix ajongle ngünkya wün, owae chix ang thüi: ‘Simon Pitar le amünkya mixsün se ang Chopa to owawa tsanle akatlax.’ 15Ilaxle kue hwom füi akaxle ngoponge, ami owang pongma kem hato nguikya ningle Otsao Chasa ngui. 16#Mwt 1.5.Ijama kue Jowanpa-e akaxkya ija kax texle atak ‘Juhan-e ti füi baptipu ikoxlechu Zange hünzom Otsao Chasa ma baptiüi.’ 17Keme ongkya zuma kem ang koxkya ningkya Otsao Chasa hingho Zange mixnokbu angchu wüi koxle, ija a atsingshokya changle; jangchangba Zange mokkya abax ang ku a owa changlax!”

18Otue hwome ija kax atatpuix, hwome ajao ahai ngokya zak ilaxle Zang achuakle thüi: “Jangchangba Zange mixnokbu angchu monglüi le azang angkya osho apüi fadaoa!”

Antiok angkya Müimüithom

19 # Mwt 8.1-4. Stefen lang pongma zothupkya zuma mongong mixbu machiak-machiak to chiak. Hwom kha angkya züizüi Foinesia, Saipras, üntoxle Antiok alople, Jehudi khünakbu tata hama Jisu Khrista a Messaiah changpu le Kaxho Müikya apukle pao. 20Üntoxle Saipras hia Sirini tokya mongong mixbu züizüi Antiok alople, mixnokbu hato Jisu Khrista bama Kaxho Müikya apukle pao. 21Jowanpa tsakzong hwom füi tüikya, ilaxle khünakbue mongong laxle Jowanpa füito azui.

22Antiok to ile changkya kax Jerusalem müimüithom na to wang, idaile hwome ikhato Barnaba tsanle akat. 23Ikhato chix ngui ilaxle Zange khünakbu to mohimankya ngünlaxle chixe hwom ang zong adünle Jowanpa to mongongkya ma shingmongle ngo angkya akax. 24Barnaba a Otsao Chasa füikya müikya mongong mix tuita changkya. Chixe khünaknu mongong ma Zang hato huanuma apüi.

25Ifüima Barnaba-e Tarsas to kalaxle Sol lom. 26Chixe Sol atakkya zuma, chixe chix Antiok to laxlaxle apaüi. Zangpua atale hokhie tomtomle müimüithom khünakbu füi apong ilaxle othom hama anwot-ano. Jisu füito azuikyabu ang “Khristan”#11.26: khristan: Khrista mantokyabu. le Antiok ma nyakle wang.

27Ituke aje züizüi Jerusalem tokya Antiok to ju. 28#Mwt 21.10.Hwom kha angkya mixsün tuita Agapa le amünkya mix ajong üntoxle Otsao Chasa zong makhange chaxwannu pangnu khato tuinu nuaknu chwonle wüi hüi angkya bama aje. (Iponge Klaodia a chongwang ang tüikya). 29Jehudi haxtok angkya tüinaobu to fong angkya hanpakma hwom mixhuak pangnue wüi mae tsuakkya apongle hingho akat angkya bama Jisu wangshembue zangwün tsuak. 30Hwome ile mok ilaxle ija ngun Barnaba hia Sol hokhi makhange Jerusalem müimüithom angkya mixpa tüichongbu hato akat.

Currently Selected:

WANGSHEMBU MWOT 11: WANCBSI

Highlight

Copy