TITA 2
2
Thiyuro Kingaün-yakzan
1Tüshe tümünü thiyuro kingaünyakzan ayelanü nünü thsangyuang. 2Azobuhrü mihtsürü ki arümkheampü, mulong jihpü, kurhangpü, tüsho akin ching, amuzho ching, tüsho rünkhiungpü ching düküngpü thsangyuang. 3Junangde azoberübo ki yakli ching wüntre lapü, dünthamungtha mülapü yungsho yukhu yo azhorü mükampü thsangyuang; tümü atsüanü arünü thsangyubeah, 4tüsho anüphulungrübonü nihbe niubuhrü tüsho tsührübo muzhopü, 5zangrü danyukpü, atsangkhitpü, niubuhrü bukkhüp lade mütsanmükühpü, junangde Thrünpuh yu mükhemükim müthsüde alabah.
6Junangde athunu athrürübo ki she arü nihbuh danyukpü tuthsukang. 7Lüpdükhi ching atsü rhimode arü ki amütsan huhang. Nü thsangyukhi ching thiyuro mulong jihkhi 8tüsho mübahyukkhukpü thsüde tsüdakde athakhi huhang, junangde sherünü nü ki azhihchonü isa dünkheak amütsü thapü mülamonü achih ngübah. 9Yamlarübonü arü putungrü bukkhüp lapü tüsho lüpdükhi ching reangkeamde wüntre jihpü thsangdanang; arünü thiyu malolobeah, 10yungsho arü kheaknü mahühbeah, tüshe arü kheak dükde mulonglam lakhi huhbeah, junangde lüpdükhi limro ching arünü isa khümkhitrü Thrünpuh dünkheak thsangyukhi alunebe kamshihbah.
11Tümüde mihtsürü alala khümkhitpü thsungkheak Thrünpuh amüthsüm akhiukdo, 12akin mülakhi tüsho alomi yihnelune bahyukpü tüsho adanyukpü alungki, tüsho ha lomi ching akinrü thsüde alapü, 13isa müngühmühi mulonglam aleangpü, isa ato Thrünpuh tüsho akhümkhitrü Jisu Khrista müretah akhiukpü thaa huhdo. 14#1 Pet 2.9Apinü isa mülimkhibo alala chingnü rhokhitbah atsü rhimopü mulongrü api mihtsürü thsüpü thsungkheak tsangkhitpü isa thsungkheak anihbuh jihabah.
15Harübo khipkhitang; thiyukhümsühmüh alalanü tuthsukang tüsho thürühang. Shenü she nü mükhemürang düthsüshih.
Currently Selected:
TITA 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
