RUTH 4
4
Boaznü Ruth Lukhi
1Boaznü kiuto chipimurung ki yübahle bin. Tüsho buhtsührü shepü Boaznü athakheanü api arü, tüsho Boaznü tha, “ Müyambuh, ha kheak arübah binang.” Junangde apinü ju kheak rholodarübah bin. 2Tüsho Boaznü kiuto ching azothsürü thürü bede arübah, “ Ha kheak binang” de tha, jumonü arünü bin. 3Tüsho apinü abuhtsühbuh ki tha, “ Kheakü Noami shepü Moab chingnü alode arüa lanü, apinü isa buhtsührü Elimelek lo yinchoh, 4jumonü inü nü ki hanangde thaanü de lümlah: Ha ching bina larübo tüsho I mihtsürü azothsürübo mikinü thuloang. Nünü hoju rhokhitnesho rhokhitang. Tüsho nünü hoju mürhokhitnesho inü amükheahpü thsüde I ki thaang. Tümütüsho nü hobah hoju rhokhitpü she müla tüsho nü dunglim lang I ah.”
Tüsho apinü tha, “Inü ju rhokhitbah.”
5Boaznü tha, “Nünü künimung Naomi khah chingnü alo ju athulobanü ju lung asherü yamrüplurüp zolopü thsüde Ruth she nünü athulobeah.”
6Apinü tha, “I yamrüplurüp dükheakbah mütsüle inü ha mürhokhit; inü arhokhitbe yak ah tütüshe nünü luang, tümüde inü mürhokhitkhuk.”
7Judüki yinzüyindo zanzhakpü yungsho kukruk müthriachih ki, jingkhümpü yihkhitbahle athulorü ki jihpü yakzan lakheah. Hanangde Israelrünü zanzhakde rhimode alakheah.
8Jumonü küyimki ju buhnü Boaz ki, “Nünü rhokhitang” de athakhea, ajingkhümpü yihkhitbahle Boaz kilim jih. 9Boaznü azothsürü tüsho mihtsürübo ki tha, “Elimelek tüsho atsührü Kilion le Mahlon yamrüplurüp Naomi kilimnü inü rhokhitchoh de khihni nüsa thiyumütsan ah. 10Ju lang yungde ashebuh mung tüsho api yamrüplurüp arü betsüh ching müdükheakde alashihpü thsüde tüsho api lapung kiuto chingnü makhinpü thsüde Mahlon yamkhünbe Moabberü Ruth she I yamkhünbe thsüpü inü thulodo. Khihni nüsa thiyumütsan ah.”
11Azothsürü tüsho chipimurung ki larübonü tha, “ Am, isa thiyumütsan thsürü ah. Rachel le Lea bünenü Jakob kilim tsührü hihde zübejihkhi nangde Atungpuhnü nü yamkhünbe müngühshang. Ephra trük ching nü alarü kamshang tüsho Bethlehem ching nü thushang. 12Ha liberü hode Atungpuhnü müngühjihpü lakhi zürü ju Juda le Tamar ane tsührü Perez yamkhün nangde kamshang.”
Boaz tüsho Api kheaknü Atrükkhitrübo
13Jumonü Boaznü Ruth ju ayamkhünbe thsüpü thüyam lim bede yü. Atungpuhnü alibe müngühjih, tüsho mübünkeangde kambah tsührü athrürü zübe. 14Aliberübonü Naomi ki tha, “Atungpuh shiang! Nü kümshihpü thsüde khihni tsührü nü kilim jihdo. Azübuh ju Israel ching thushang! 15Apinü nü rhangdung reangzahloshihbah tüsho ashinshu nü mütrübah. Tümüde nü tsühmeakbe shepü nünü muzhocho tüsho shepü tsührü athrürü thüne kheaknü atsübeanü, anihbenü api zübejih.” 16Naominü khungarü ju akhüh kheak shuhkih-a lu tüsho anihbenü khungarü ju mütrü.
17Yamhingrü liberübonü khungarü mung Obed de ji. Arünü alala ki tha, “ Tsührü athrürü khülang Naomi kilim zübejih-a lah!” Api ju David abuh, Jesse abuh kam.
18Ha Perez kheaknü David khiungde tsühsoniusobo akhinashu: Perez tsührü Hezron, 19Herzon tsührü Ram, Ram tsührü Amminadab, 20Amminadab tsührü Nashon, Nashon tsührü Salmon, 21Salmon tsührü Boaz, Boaz tsührü Obed, 22Obed tsührü Jesse tüsho Jesse tsührü David.
Currently Selected:
RUTH 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.