1 SAMUEL 1
1
Shilo ching Elkana Yamkhün
1Kheakü Ephraim awung lomi ching Ramathaim-zophim mihtsürü khülang lakheah, api mung ju Elkana, api Jeroham tsührü Tohu tsührü tüsho Ephraimrü Zuph tsührü lakheah. 2Api niuberü mahne lakheah; khülang be mung Hanna, püpü mung Peninna. Peninna a tsührü lakheah, tüshe Hanna tsührü müla.
3Ha buh mihtsürünü Shilo ching Wuto Atungpuh ki laksah-a kingaünpü api kiuto chingnü kam abande wutu, ju ching Eli tsührü 2, Hophni tüsho Phinehas ane Atungpuh amükeamrübo lakheah. 4Elkananü laksah-a kingaünkhi nimung ching, apinü aniube Peninna tüsho anihbe tsührü athrürü tüsho aliberübo kilim shihchambo jih; 5tüshe apinü Hanna kilim a shihcham alü thsüde jih, tümütüsho Atungpuhnü anihbe nuyam yihdojihjih she apinü alibe muzho. 6Anihbe azhihbenü amulong zhipzhipshihpü müneah, tümütüsho Atungpuhnü alibe nuyam yihdoabahjih. 7Junangde kam abande dünjide yü; alibe Atungpuh yam ching wutu abande anihbe müneahde la. Jumonü Hannanü trip tüsho müyimtsüh. 8Ayamkhünbuh Elkananü alibe ki tha, “ Hanna, tümüde nü tripcho? Tümüde nü müyimtsüh le? Tümüde nü mulong tukthsüla? I ha nü tsührü athrürü 10 kheaknü alübe yung de?”
Hanna tüsho Eli
9Shilo ching arü tsühyungabahshu, Hannanü Atungpuh miki asürü zhip. Kheakü amükeambuh Eli Atungpuh arüngyam khimdopü dungjing miki binkiu kheak bina lakheah. 10Alibenü sükde lümthsünü tüsho Atungpuh ki tamkhüntamnü, tüsho düsüknimde trip. 11Alibenü hade thiyuchihchim: “O Wuto Atungpuh, nünü lang nü yamlaberü küpkhukkhi kheahjihde, I lümkhitsho, tüsho nü yamlaberü mümihabahsho, tüshe nü yamlaberü kilim tsührü athrürü jihsho, inü api rhangdung amuyung Atungpuh kilim jihbah tüsho küyimkishe api kuyü mühüt.”
12Alibenü mutuklode Atungpuh ki tamkhüntamnüchoki, Elinü anihbe mün kheahyuk. 13Hannanü jikshe müthsüde tamkhüntamnüde alakheah; amünküp lang aphap, tüshe adüsheak a muso; jumonü alibe ju müshanga lah de Elinü lüm. 14Jumonü Elinü alibe ki tha, “ Külokhüh nünü nü müshanga huhba? Nü yukhu ju bahkhiang.” 15Tüshe Hannanü alo, “Yung, I tungpuh, I sükde küpkhukkhi liberü ah; inü yukhu yungsho müshangmurube tümü muyung, tüshe Atungpuh miki I küpkhuk thade tamkhüntamnüde alakheah. 16Nü yamlarü mihbukmuyuk liberü nangde dülümjih, tümüde I lümthsünü ato tüsho küpkhukkhi hode ha kim amuyung inü athakheah.” 17Tüsho Elinü alo, “ Mungtsü chingnü yüang; nünü api ki mushukhi Israel Thrünpuhnü alojihdo.” 18Tüsho alibenü tha, “Nü yamlarü nü mük ki tsüde ngüshang.” Judüki alibenü nihbe limro ching tso, tüsho aniubuh lung tsühyung tüsho amiro ching mulong tukthsükhi müladebah.
Samuel Zübekhi tüsho Arüngkhi
19Arünü mükikde asürü tüsho Atungpuh miki kingaün; tüsho arünü Rama ching arü yam lim alode yü. Elkananü aniube Hanna kheak nung tüsho Atungpuhnü atamkhüntamnü alojih. 20Kim dükdü ching Hanna mübünkeangde kam tüsho athrürü khülang zübejih. Anihbenü api mung Samuel de ji, tümüde alibenü tha, “Inü api thsungkheak Atungpuh ki kheangkheah.”
21Elkana tüsho api yamkhünnü kam aban laksah-a kingaünpü tüsho apinü thiyuchihchimkhi Atungpuh kilim jihpü Shilo ching wutu. 22Tüshe Hanna a muwutu, tümüde anihbenü aniubuh ki tha, “ Khungarü tsühyungmusu akede, inü api bede arübah, junangde api Atungpuh miki labah, tüsho ju kheak lünnü alabah.” 23Ayamkhünbuh Elkananü api ki tha, “Nünü atsükhi thsang, api tsühyungpü mütsühyi khiungde aleangang; tüsho Atungpuhnü thiyuchihchimkhi dükde dünjishang.” Jumonü alibenü thüyam ching la tüsho atsührü mütsühyung khiungde niuh duhde mütrü. 24Küyimki anihbenü api tsühyungshihde akamkhea, anihbe lung api bebah wutu, ju lung kam mahsam bankhi moshipung 1, ayikangkang khahngak 10 tüsho yukhu mide azahkhi shihküp qiuqiu 1. Anihbenü api ju Atungpuh yam lim Shilo ching bebah arü; tüsho khungarü ju ngangade alakheah. 25Judüki arünü moshipung ju laksah, tüsho khungarü ju Eli kilim bebah arü. 26Tüsho alibenü tha, “O, I tungpuh! Nü rhangdung la khiungde, I tungpuh, I ha ching nü miki, Atungpuh kilim tamkhüntamnüde alakhi liberü ah. 27Ha azürü thsungkheak inü tamkhüntamnükheah; tüsho inü Atungpuh ki kheangkhi apinü I ki jih. 28Jumonü inü api Atungpuh kilim arüngde jih; api rhangdung la khiungde, api Atungpuh kilim jihdo.”
Tüsho arünü ju ching Atungpuh kingaün.
Currently Selected:
1 SAMUEL 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
